منتديات العريجا
مرحبا بك في منتديات العريجا سجل معنا وكن عضوا فاعلا



 
الرئيسيةمكتبة الصورس .و .جبحـثالتسجيلالمجموعاتدخول
المواضيع الأخيرة
» القصيدة الوطنية التي أبكتني (تامن عجايب الدنيا في الحامداب)
الخميس 21 سبتمبر 2017, 10:50 am من طرف Ismail

» من روائع شعراء بلدنا (كله العالم جاء)للشاعر محي الدين الفاتح
السبت 09 سبتمبر 2017, 2:45 am من طرف Ismail

» ديل حبوباتي .. أتحدى العندو حبوبات زيهن (الجزء الأول):
الإثنين 04 سبتمبر 2017, 7:55 pm من طرف Ismail

» يا حليل العريجاء ولقد كبد اللتيم الخصيم
الخميس 27 يوليو 2017, 12:20 am من طرف Ismail

» العريجاء موطن الجمال والطبيعة الخلابة
الأحد 19 فبراير 2017, 4:07 am من طرف Ismail

» مختارات من روائع أشعار المحيناب
الإثنين 24 أكتوبر 2016, 7:44 pm من طرف Ismail

» من أشعار المحيناب
الأحد 23 أكتوبر 2016, 6:32 am من طرف Ismail

» جدي عندما ضحك.. وعندما بكي..
الإثنين 16 مايو 2016, 2:41 am من طرف أبو مصعب

» أمي... جنتي تحت قدميك
الإثنين 16 مايو 2016, 2:31 am من طرف أبو مصعب

أفضل 10 أعضاء في هذا الشهر
Ismail
 

شاطر | 
 

 تحت شجر الخور الظليل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
محمد عنتر

avatar

عدد المساهمات : 1362
تاريخ التسجيل : 25/01/2011
العمر : 35
الموقع : الامارات-ابو ظبى

مُساهمةموضوع: تحت شجر الخور الظليل   الثلاثاء 05 يوليو 2011, 2:46 pm

تعا لو يا جماعة تحت شجر الخور السمح دا
ناخد لينا ونسة وقعدة وننسى هموم الدنيا نفرح
قلوبنا ديل ونتلم كلنا محس ومحيناب وكواهلة وعطياب
وجعلين ودناقلة وشوايقة ومسلمية وفلاتة وفور وبرنو ومساليت
وكلنا نتلما فى جلسة ريد ومحنة والفة ونغمة حنينة
تحت طل شدرة الخور النسامو اهبهب داء
ونبدا يا اخوانا ننم لينا نمة سمحة كدى نحن القاعدين ديل
قبل حو النبى دا ما اجى عشان اكان جا بنخلى النضم لى سيدو

كدى يا مجدى سمعنا نمك

مجدى: نم يا ود عنتر انت اول شايفك مضايق
زى الفى حاجة فى قلبك

محمد عنتر: اديك العافية يا خالى عارفك بتحس بى

احم احم احم احم

اليل اليل اليل

تجيك بمهل والفلجة لما تشوفا
طولا باهى مخروطة ومضمر جوفا
زى مهر السبق متحضرة ومكلوفا
قلبى الكان صميم جابتلو فرة خوفا

الجالسين: هع هع هع
هع هع هع
ابشر ااااااااااااااااا جنى عنتر
عقب عقب

محمد عنتر: خلاص كفاى النسمع الباقين

البعدو
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Ismail

avatar

عدد المساهمات : 2538
تاريخ التسجيل : 05/02/2008
العمر : 37
الموقع : aykabulbul@gmail

مُساهمةموضوع: رد: تحت شجر الخور الظليل   الثلاثاء 05 يوليو 2011, 4:06 pm

إسماعيل: هييييييييييييييييييييييع !! أبشر بالخير يا ود عنتر، والله أبوك عنتر زاتو وعمك أبو إدريس ما أظن يقدروا يجيبوا نمة زي دي... آجنى إتَّ الدوبيت السمح ده بتجيبو من وين ؟؟!
ود عنتر: دحين إت ماك خالي يا أبو مسلم، قالوا (من شابه خاله فما ظلم)، ولا بقولوا من شابه أباه فما ظلم ! ... باقي المثل ده رايح عليْ؟
إسماعيل: أنا في الحقيقة خالك وعمك.. آها وكت إتَّ غلبتني بكلامك السمح ده، دحين ليك عليْ أكان أقطع ليك هسع دي قطع أخدر فوق شدر الهواير النحن قاعدين في ضلو ده؟؟؟
ود عنتر: كدي قول سمعنا نمك يا خال... ونحن كلنا إضنين، زي ما قال ود بادي...
إسماعيل: عِلا آجنى نوع الشعر الداير أقولو ليك ده، الزي ناس عمك حوى النبي ما بقدروا عليهو!!
مجدي: معقولة يااااااخ... عمنا حوى النبي ده قالوا يناطق الجان زاتو... وقالوا مغانيهو شيطان عديل كده.... حتى قالوا لمن يجادعلو زول بالدوبيت بشوف الغنا مكتوب في الحيطة قدامو..
إسماعيل: ياخي دي خزعبلات ساي، ما تصدقا.... هو أصلاً حوى النبي بعرف يقرا عشان يشوف حاجة مكتوبة في الحيطة؟؟؟!
ود عنتر: لكين على الأقل إنت عارف إنو شاعر لا يشق له غبار في مجال الدوبيت..
إسماعيل: ده كلام صحيح... لكين أنا كان قصدي إنو نوع الشعر الناجرو العبد لله فوق شدر الهوير الضليل ده ماهو من نوع شعر الدوبيت البقولوا حوى النبي...
ود نور الله: نان من ياتو شعر الخرابة ده؟... والله حيرتنا عديل يا ود البشير؟؟!
إسماعيل: يعني هو يعتبر أقرب إلى الشعر الدارجي الحضري، من النوع البسويهو بدر الدين الكدك وخالد الجاك، وقديماً أحمد نعيم، وأحمد محمد الحاج...
البرنس: كدي قول يازول، خلينا النسمع...والله شوقتنا عدييييييييييل لسماع هذه المقطوعة الشعرية..
إسماعيل: إحم إحم إحم يقول خالك الذبيح فوق شدر الهوير الجميل:
شُفنا الشدَر فوق الهوير ناضِر ظريف
نسماتو عاشْقة مراتِع الظل الوريف
لمن فَتَق مِن حولو نُوَّار الخريف
الحِلَّة شافَتْ فيهو جنَّات العَريف
ود عنتر: جنات العريف دي معناها شنو يا خال... طبعاً إنت الموسوعة المتحركة بتاعتنا ؟
إسماعيل: جنات العريف أو (جنة العريف) قصر تاريخي أثري في مدينة غرناطة بالأندلس، تحيط به الأشجار الوارفة والحدائق الغناء...
أمير: يازول هوي، قصر غرناطة الأثري اسمو (قصر الحمراء)...
إسماعيل: فعلاً (قصر الحمراء) أشهر من قصر (جنة العريف)، ولكين القصرين ديل موجودات في غرناطة الأندلسية وهما من روائع الآثار المعمارية الإسلامية..
ود عنتر: ليك علي أكلِّم بدر الدين ود الكدك عشان يجادعك في شعرك السمح ده..
إسماعيل: (يقوم على حيلو وينفض جلابيتو من التراب)... يا اخوانا هوي، ودعتكم الله، خلاص أنا ماشي البيت، باقي مسلم ولدي السنة دي ممتحن الشهادة، ودايرين نراجع معاهو البلاغة شوية...
أمير: آها بكرة ما تتأخر، وحاول تعال بدري شوية، مش كل يوم جايينا مع صفارة الحكم...


عدل سابقا من قبل Ismail في الأربعاء 06 يوليو 2011, 1:56 pm عدل 3 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.google.com.qa
زائر
زائر



مُساهمةموضوع: رد: تحت شجر الخور الظليل   الثلاثاء 05 يوليو 2011, 7:28 pm

والله ما ظنيتنى اقدر علي كلامكم السمح دا لكن هاكن دى زكرتنى ايام صبانا زماان
اكتب يافقير ماتقول مريضك طاب
ماشفت القبيل جابت السلام بالباب
رقت من وسط وقلدت مع القرقاب
فكرك انشغل قلمك مليتو تراب.
كدى ااسماعيل دقيقه ما تمش بى لمتنا دى كدى النمرق على خالد ود الجاك داك قالو جابولو تومات النبارك ليهو ونشرب لنا معاو شاى وبعد داك امشى على ابو مسلم وانشا الله الله يوفقو.وات يامحمد كلم الجنا عنتر دا النهار كولو يلعب بالكمبيوتر بقى من بطن البيت ما بمرق ......
الرجوع الى أعلى الصفحة اذهب الى الأسفل
محمد عنتر

avatar

عدد المساهمات : 1362
تاريخ التسجيل : 25/01/2011
العمر : 35
الموقع : الامارات-ابو ظبى

مُساهمةموضوع: رد: تحت شجر الخور الظليل   الثلاثاء 05 يوليو 2011, 8:41 pm

الجالسين

هع هع هع ابشر بالخير ابو مسلم نضميك مجية

اسماعيل

دا انا سماعين بتلفت نجرى اخضر نى

مجدى
هع والله شعرت جلدى كلبت وازكرت لى نمة

الجالسين

نم يا ودحمد النسمع نمك

مجدى

اكتب يا فقير ما تقول مريضك طاب
ما شفت القبيل جابت السلام بالباب
رقت من وسط وقلدت مع القرقاب
فكرك انشغل قلمك مليتو تراب

الجالسين

هع هع ابشر يا جنى نمة سمحة

اسماعيل

نمتك سمحة تشيبة اهلك ناس التكينة
مجدى
وين ماشى يا سماعيل الفطور جاى
ام محمد عنتر وام امير عاملات تقلية
وروب مجيهات جية جد
اسماعيل
ما زى فطور ام مسلم
مجدى
خلى الفطور تتكلم فوق حواء النبى شا عر المناقل كلها وفايت ما ترجا
عشان تسمع نمو
الجالسين
صدقت يا ود ام حمد

البرنس
ما بتمشى يا الخال اسماعيل وانا حلفته عليك اكا تنتظر حو النبى دا

اسماعيل
نطط عيونو
الجالسين
هه ههه ههه
اسماعيل
فى مشهد بديع ملص جلابتو وعلقة على شدرة
القرط وقعد بالعراقى بس والناس تعاين

الجمالى
ما داير اتكلم من قبيل لكين الجنى اسماعيل دا اتهوش تب
جيبو الفطور النفطر ونتم الباقى
اسماعيل
اخوك يا ريا وقت الخيول ادبكن
اخوك وقت الرماح اتشبكن
اخوك جبل الثبات وقت القواسى احبكن
كم بكيت وكم قشيت دموع الببكن
مجدى
دا ما بحلك يا سماعين
البرنس
خلى يا خال مجدى ما عندنا كلام الا اجى حو النبى
اسماعيل

قلتة ما بتنضو يا البرنس انا قطاع النفس
دا انا سماعين
الجالسين
ههههه هههههههه
خالد الجاك
سلام عليكم يا جماعة
الجالسين
عليكم السلام

مجدى
ويت انت يا ولد من الصباح
خالد
كنت راجى محمد نوراللة دا على ديوان عمى بخيت
اتاريهو عمل خيانات وجى قبلى
محمد نور اللة
انا من صلاة الصبح طوالى على الخور
يعنى من الجامع وعدل

محمد نوراللة
يا اخوانا قبل ما اجى حو النبى دا
دايرين نسمع نمة من اهلنا ناس ود الهبيل ديل
محمد عنتر
واللة من قبيل داير اقول الكلام دا
لكين اصلك ما بتنسبق على حاجة يا ود النور

الجمالى
اتو يا اخونا ود ام حمد امير دا ملو
ساكت كدى وقاعد بطرف
امير
افو انا ود الخلا البعرف اسودو وضبعو

البرنس

هع عفيت عليك يا خالى

اسماعيل
نفطر لانو الفطور جا وبع داك نتابع النم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Ismail

avatar

عدد المساهمات : 2538
تاريخ التسجيل : 05/02/2008
العمر : 37
الموقع : aykabulbul@gmail

مُساهمةموضوع: رد: تحت شجر الخور الظليل   الأربعاء 06 يوليو 2011, 5:06 am

إسماعيل: آها يا أخوانا بعدما ضربتوا الفطور الكارب ده كدي أسمعوني النقول ليكم آخر مقطع دوبيت ألفتو فوق خريف العريجاء المبشر ده.

مجدي: لكن الجماعة ديل ما قالوا دايرين يسمعولن نمة من ناس ود الهبيل ديل!!

إسماعيل: يا أخوي هوي زول ود الهبيل ده ما عندو ليكم نمة ولا حاجة، اللهم إلا كان يسمعكم أسامي الحلال الواقعة بين ود الهبيل وأبْ قوتة...

ود نور الله: وكمان حوى النبي شكلو كده ما أظنو جايي ولا حاجة.

ود عنتر: طيب يا خال سمعنا نمتك العاجباك دي.

إسماعيل: بالمناسبة أنا خالك، لكن يمكن لو بحَّتنا في الحساب شوية تطلع إنت زاتك خالي.

أمير: دي حتحسبا كيف بقى يا نسَّابة العرب ؟!

إسماعيل: يعني يمكن لو حسبناها عن طريق حبوبتو بت الدحلابي أو جدو أمْحمد ود الضو (رحيمهم الله)، وهم الاتنين من أهلنا المحس.

البرنس: يا أخوانا مسعولين من الخير، الجماعة الحرقوا بيت مسيرة التاماوية، قضيتن حصل فيها شنو؟

إسماعيل: يا زول هوي أسكت أسكت... شايف لي زول من ناس الكمبو ماشي علينا جاي.

مجدي: هههههههههههههه... سلامة نظرك يا ود المايدة... ناس الكمبو بتاع شنو!! ياخي ده قروارة!!

إسماعيل: قروارة وللا ودك، أنا أعرفو ليكم كيف، ونظارتي معلقة في جيب الجلابية هناك في الغصن المفندر داك.

قروارة: السلام عليكم يا جماعة...الله يديكم العافية...
الجالسين: وعليكم السلام يا الجيلي، تعال أقعد بي جاي... دايماً جايي متأخر...
قروارة: بالمناسبة أنا سمعت كلامك يا خال... تطلعني من ناس الكمبو عديل كده !!
إسماعيل: تستاهل، لأنك ليك زمن قاطع الحومة على المنتدى...

ود نور الله: يا أخوانا نسيتونا نمة إسماعيل الكان داير يقولا لينا.

ود عنتر: قول يا خال خلينا نسمع نمك، فرِّج همنا مولاي يفرج همك..

إسماعيل: إحم إحم إحم.. يقول الذبيح العرَّاجي، المصنقر تحت شدر الهوير بالعراقي، واصفاً خريف العريجاء المطير:ـ

حرقوصِك شلع، شال ليلو كلو رفيف
واتحيَّن سماك طلق المطر والزيف
رب القدرة جسَّد فيك جمال الريف
وشال واحي السمايم، وشغَّل التكييف


ود نور الله: هييييييييييييييييييييع... والله آجنى جضَّمت الدوبيت زاتو، وخرقت عادة عديل كده..

إسماعيل: برضو تقول ليْ حوى النبي ود أمحمد صالح !!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.google.com.qa
محمد عنتر

avatar

عدد المساهمات : 1362
تاريخ التسجيل : 25/01/2011
العمر : 35
الموقع : الامارات-ابو ظبى

مُساهمةموضوع: رد: تحت شجر الخور الظليل   الأربعاء 06 يوليو 2011, 5:35 pm

محمد نور الله

حو النبى دا كلامو برا اااااسماعين خلى لكين نمتك عجيبة واللة عجبتنى تب
زكرتنا الخريف والسرحة الرعود والبروق

قروارة

انا فى الدوبيت دا مافى زول بلحقنا تب بدوبى من زمنى الصغير لمن اكنت فى
الخلوات ايام البحر امشى استحم فى البحر واقعد لى فى قيفة فوق ودوبى

اسماعيل

اها سمح ورينا نضميك وات وين مافى غائب الكلام دا اعوج منك
الشى ما لقيت ليك انشاء نص ساعة ساى تورينا وشك

مجدى

خلو خلو يا اسماعيل ما زنكو فى الكلام بنضم بنضم

امير

لكين يا اسماعيل حسابا جنس حساب فى النسب والقرابة
وبتعرف كل شى فى القرابة تربيت حبوبات طلعتة لينا الجنى الصغير ود عنتر خالك

اسماعيل

هه ههه ههههههه ههههه

فتح الرحمن عبد اللة

سلام عليم يا جماعة

اسماعيل

عليكم السلام ود عبداللة حسين وين انت يا ولد مسجل غياب انت
واخو التومات تب ما شيفنكم قاطسين وين

فتح الرحمن

والله الخال متلوم تب لكين ما باليد حيلة كنت مع اهلى ناس التكينة ديلك
واخو التومات دا انا زاتى فاقدو وغائب ليهو زمن

خالد الجاك

ود عنتر ما جيب الجبنة دى بتكون جهذت

مجدى

انت ما شايف فتح الرحمن دا ما اصغر منو ما ترسلو

خالد الجاك

معليش اللوم بجى بالغلطات

محمد نور اللة

واللة الجنى ود عنتر دا دايرنو زاتو انم لينا
نمو سمح خلاص

ود عنتر

والله زاتى يا ود نوراللة من قبيل دايركن تسكتو عشان انم لى نمة

مجدى

خلاص قول نمة فوق البنات باقى نمك سمح فوقن

اسماعيل

الجن ود اختى دا مغروم خلاص

البرنس

يا جماعة خلا ص خلو اللنم

ود عنتر

احم احم احم
الليل الليل اليل

كاتم سرى صابر فوق اذاى بتكوى
اصلو الحب بيكتل يالجبينك ضوى
عاشق عبلة عنتر غير نويح شن سوى

الجا لسين

هههههه ههههه ههههه ههههه

قروارة

عقب عقب عقب ودعنتر

امير

ابشر بالخير نم نم نمك سمح

محمد نور الله

خلو خلو اللنم ودعنتر دا

ود عنتر

عجبكم نمى صاح

مجدى

اى والله

ود عنتر

احم احم احم

قروارة

يا جنى ود عنتر ما تتنحم ساكت كفاك فى الغرام داء
كدى قول لينا النمة القلتة فى ابوك احمد تزكر وقت سا رحين داك
فى بلدات ابوك احمد

ود عنتر

بالحيل بزكر

اسماعيل

خلاص قول لينا فوق ابوك احمد

محمد نوالله

الجنى ود عنتر دا متقدر خلاص

ود عنتر

نبكيك بكى المطور فاقدين وجودك بينا
يا ضو الصباح الكان بنور عينا
كبيرناالبحنانو بسد محل والدينا
نبكيك بالدموع متحزنين يا زينا

امير

وهو يبكى ويقشقش دميعاتو
ويقول ابشر يا ود عنتر

قروارى

خلو اتم يا خوانا ما تقاطعوة

اسماعيل

فى باقى يعنى

قروارة

كتير شديد الباقى

اسماعيل

سمح نم نمك عجبنى خلاص فوق جدك

ودعنتر

نبكيك بالدموع يا فيض بحرنا الصافى
نبكيك بالقلوب وبكى القلوب مو كافى
نبكيك يالبتفزع للمضيق متلافى
نبكيك يا البتصلح كل يو وتعافى

نبكيك البكى الما بجيب غضب خالقنا
نبكيك بالصبر والوجعة ما بتفارقنا
نبكيك يا الفراقك فى القلوب حارقنا
يا بيتنا البلم ويجمعنا ما بفرقنا

نبكيك يا المثلك فى الرجال معدوم
يا البتقوى سويت الفضالة هدوم
نبكيك البكا الما بكرهو القيوم
نبكيك بالصبر لكين حذنا يدوم

اسماعيل

واللة يا ولدى ابدعتة وفتة خالك اسماعيل فى النم
يا ولدى النضمى السمح دا انت بجيبو من وين

محمد نور الله

انا ما قلتة ليكم ود عنتر دا متقدر خلاص

امير

واللة كلامو عجبنى تب

اسماعيل

خلاص يا مير سمعنا نمك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Ismail

avatar

عدد المساهمات : 2538
تاريخ التسجيل : 05/02/2008
العمر : 37
الموقع : aykabulbul@gmail

مُساهمةموضوع: رد: تحت شجر الخور الظليل   الأحد 10 يوليو 2011, 7:56 pm

أمير: إحم إحم إحم، اسمعوا الصاقعة المدوية دي:ــ
الولد البطبق ا لمسرة فوق المسرة
يخلف ساقو فوق ضهر أب قماقم ويسرى
طبق قربينو فوق جربانو خت أب كسرة
فرقاً شتى من ناس يمة زيدي الكسرة
ود عنتر: هييييييييييييييييييييييع!! أبشر بالخير يا خال، دي نمة كلها فروسية ورجالة وشفاتة..
إسماعيل: طبعاً لأنها من شعر الطيب ود ضحوية، الفارس الهمباتي المعروف. عِلا آجنى مرثياتك القلتها فوق جدك حاج أحمد (رحيمو الله) رهيبة جداً!!
ود نور الله: الله يرحمو حاج أحمد كان من خيرة رجال العريجاء، وهو صاحب مواقف لا تنسى.
إسماعيل: ياخي ده كان متكفل بي جاز الفانوس بتاع الجامع أربعين سنة، وما في زول عارفو غير إمام الجامع...
البرنس: وطيب الناس عرفت كيف؟؟!
إسماعيل: بعدما اتوفى حاج أحمد الجامع ضلَّم من عدم الجاز، وده الخلى الإمام يكشف الحقيقة دي للناس، ويقول ليهم شوفوا ليكم طريقة جيبوا بيها الجاز.
مجدي: بس عيب المرثية إنها هيجت علينا الأشجان، وجددت الأحزان!!
ود نور الله: عشان كدة غيروا لينا الموضوع ده لي حاجة تكون فرايحية شوية..
إسماعيل: لكن الجو شايفو مسخن شوية، وكمان الحزاين دي زادتو سخانة وكتمة..
أمير: محمد عنتر ياخي دكان أبوك ياهو ده قريب، دحين قوم جيب لي خالك إسماعيل ده بيبسي ولا شامبيون يبرد بيهو جوفو...
إسماعيل: جزاك الله خير يا أمير، وسقاك من سلسبيل الجنة.
ود عنتر: لكن يا خال دايرك في الفترة دي تنجر ليك نمة مجيهة كدي فوق خريف العريجاء...
إسماعيل: أبشر بالخير يا ود عنتر، بس إنت أمش جيب الحاجة الباردة، وياما تشوف نجر أخدر...
ود نور الله: لكن شايفك بالحيل اليومين ديل تفلت في كلامك فوق حوى النبي، شاعرالعريجا الأول.. شنو يعني الراجل ما عاجبك ولا شنو؟؟!
أمير: آي والله، الحقيقة أنا شميت في كلامو ريحة الحكاية دي... آها دحين يا إسماعيل اركز عاد وأبقى راجل نحن دايرين نعمل مجادعة بينك وبين حوى النبي.
إسماعيل: حوى النبي أنا ما بجادعو...
ود نور الله (مقاطعاً حديث إسماعيل): ده نسميهو تهرب وللا بطبطة وللا كببان زوغة من المواجهة ؟!
إسماعيل: أنا أبوك آ مسلم، أنا أكب الزوغة واهرب من ميدان المعركة !!!
ود عنتر: اتفضل يا خال هاك البيبسي، لكن ورينا ليه ما داير تجاعو؟!
إسماعيل: حوى النبي راجل ود عمي ونسيبي، وأنا احتراماً لكبرتو وشيبتو ما داير أخش معاهو في معمعمة زي دي.. لكن عندي ليهو القدرو..
مجدي: القدرو ولحم سدرو ؟؟!
الجالسون: هههههههههههها ها ها ها ها ها ها ها
أمير: بالمناسبة حوى النبي ده ما في شاعر قدرو إللا كان تجيب ليهو زول من شعراء البطانة زي ناس يوسف ود الشوبلي وعبد الكريم ود شعيت..
إسماعيل: ود شعيت بتاع شنو ياخي، أنا عندي ليهو زول محلي هنا في العريجاء، زول نديدو وربيعو، وحوى النبي قبل كده ضايق طرشو...
ود نور الله: أوعى بس يكون قصدك ابراهيم ود الهادي ؟؟!
إسماعيل: أيييييييوه؛ ياهو ده زاتو دوا حوى النبي والسم القدر غداهو... وهو بالمناسبة بينو وبين حوى النبي مساجلات مولعة نار عديل كدة...
أمير: ياخوي هوي زولك ده حوى النبي كسحو كسح جد في المساجلات الدارت بيناتن... ودي حاجة ناس الحلة كلها عارفاها...
ود عنتر: عموماً يا أخواننا نحن فخورين بكل شعراء العريجاء، الكبار منهم والصغار، وربنا يكتر لينا الشعرا في البلد عشان نسميها واحة الشعراء أو دوحة الأدباء..
إسماعيل: آها يا أخوانا نمتي النجرتها فوق خريف العريجاء أب سيولاً جارفة أقولها ولا خلاص قنعتوا منها...
ود نور الله: قنعنا منها كيف ياخ... بالله قول أنعشنا، بي حالي الكلام فرفشنا...
إسماعيل: إحم إحم إحم... يقول أبو مسلم العريجاوي الأصيل، فوق خريف العريجا الجميل:ـــ
إنْملن الهـواير، والْمقـابر غرقـن
وشارع النص صبح لي عن رصيفو مترقن
تعول العينة فيك نازلة، وبروقا يبرقن
وفوقك خيَّم الرَّزَمي أب سحاباً زرقن
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.google.com.qa
محمد عنتر

avatar

عدد المساهمات : 1362
تاريخ التسجيل : 25/01/2011
العمر : 35
الموقع : الامارات-ابو ظبى

مُساهمةموضوع: رد: تحت شجر الخور الظليل   الأربعاء 06 مارس 2013, 2:43 pm

الخال اسماعيل كتب :-



أمير: إحم إحم إحم، اسمعوا الصاقعة المدوية دي:ــ




الولد البطبق ا لمسرة فوق المسرة


يخلف ساقو فوق ضهر أب قماقم ويسرى


طبق قربينو فوق جربانو خت أب كسرة


فرقاً شتى من ناس يمة زيدي الكسرة


ود عنتر: هييييييييييييييييييييييع!! أبشر بالخير يا خال، دي نمة كلها فروسية ورجالة وشفاتة..


إسماعيل: طبعاً لأنها من شعر الطيب ود ضحوية، الفارس الهمباتي المعروف. عِلا آجنى مرثياتك القلتها فوق جدك حاج أحمد (رحيمو الله) رهيبة جداً!!


ود نور الله: الله يرحمو حاج أحمد كان من خيرة رجال العريجاء، وهو صاحب مواقف لا تنسى.


إسماعيل: ياخي ده كان متكفل بي جاز الفانوس بتاع الجامع أربعين سنة، وما في زول عارفو غير إمام الجامع...


البرنس: وطيب الناس عرفت كيف؟؟!


إسماعيل: بعدما اتوفى حاج أحمد الجامع ضلَّم من عدم الجاز، وده الخلى الإمام يكشف الحقيقة دي للناس، ويقول ليهم شوفوا ليكم طريقة جيبوا بيها الجاز.


مجدي: بس عيب المرثية إنها هيجت علينا الأشجان، وجددت الأحزان!!


ود نور الله: عشان كدة غيروا لينا الموضوع ده لي حاجة تكون فرايحية شوية..


إسماعيل: لكن الجو شايفو مسخن شوية، وكمان الحزاين دي زادتو سخانة وكتمة..


أمير: محمد عنتر ياخي دكان أبوك ياهو ده قريب، دحين قوم جيب لي خالك إسماعيل ده بيبسي ولا شامبيون يبرد بيهو جوفو...


إسماعيل: جزاك الله خير يا أمير، وسقاك من سلسبيل الجنة.


ود عنتر: لكن يا خال دايرك في الفترة دي تنجر ليك نمة مجيهة كدي فوق خريف العريجاء...


إسماعيل: أبشر بالخير يا ود عنتر، بس إنت أمش جيب الحاجة الباردة، وياما تشوف نجر أخدر...


ود نور الله: لكن شايفك بالحيل اليومين ديل تفلت في كلامك فوق حوى النبي، شاعرالعريجا الأول.. شنو يعني الراجل ما عاجبك ولا شنو؟؟!


أمير: آي والله، الحقيقة أنا شميت في كلامو ريحة الحكاية دي... آها دحين يا إسماعيل اركز عاد وأبقى راجل نحن دايرين نعمل مجادعة بينك وبين حوى النبي.


إسماعيل: حوى النبي أنا ما بجادعو...


ود نور الله (مقاطعاً حديث إسماعيل): ده نسميهو تهرب وللا بطبطة وللا كببان زوغة من المواجهة ؟!


إسماعيل: أنا أبوك آ مسلم، أنا أكب الزوغة واهرب من ميدان المعركة !!!


ود عنتر: اتفضل يا خال هاك البيبسي، لكن ورينا ليه ما داير تجاعو؟!


إسماعيل: حوى النبي راجل ود عمي ونسيبي، وأنا احتراماً لكبرتو وشيبتو ما داير أخش معاهو في معمعمة زي دي.. لكن عندي ليهو القدرو..


مجدي: القدرو ولحم سدرو ؟؟!


الجالسون: هههههههههههها ها ها ها ها ها ها ها


أمير: بالمناسبة حوى النبي ده ما في شاعر قدرو إللا كان تجيب ليهو زول من شعراء البطانة زي ناس يوسف ود الشوبلي وعبد الكريم ود شعيت..


إسماعيل: ود شعيت بتاع شنو ياخي، أنا عندي ليهو زول محلي هنا في العريجاء، زول نديدو وربيعو، وحوى النبي قبل كده ضايق طرشو...


ود نور الله: أوعى بس يكون قصدك ابراهيم ود الهادي ؟؟!


إسماعيل: أيييييييوه؛ ياهو ده زاتو دوا حوى النبي والسم القدر غداهو... وهو بالمناسبة بينو وبين حوى النبي مساجلات مولعة نار عديل كدة...


أمير: ياخوي هوي زولك ده حوى النبي كسحو كسح جد في المساجلات الدارت بيناتن... ودي حاجة ناس الحلة كلها عارفاها...


ود عنتر: عموماً يا أخواننا نحن فخورين بكل شعراء العريجاء، الكبار منهم والصغار، وربنا يكتر لينا الشعرا في البلد عشان نسميها واحة الشعراء أو دوحة الأدباء..


إسماعيل: آها يا أخوانا نمتي النجرتها فوق خريف العريجاء أب سيولاً جارفة أقولها ولا خلاص قنعتوا منها...


ود نور الله: قنعنا منها كيف ياخ... بالله قول أنعشنا، بي حالي الكلام فرفشنا...


إسماعيل: إحم إحم إحم... يقول أبو مسلم العريجاوي الأصيل، فوق خريف العريجا الجميل:ـــ


إنْملن الهـواير، والْمقـابر غرقـن


وشارع النص صبح لي عن رصيفو مترقن


تعول العينة فيك نازلة، وبروقا يبرقن


وفوقك خيَّم الرَّزَمي أب سحاباً زرقن


لنا عودة ياخال وتسلم ياملك

Cool Shocked Surprised Sad Mad bounce
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Ismail

avatar

عدد المساهمات : 2538
تاريخ التسجيل : 05/02/2008
العمر : 37
الموقع : aykabulbul@gmail

مُساهمةموضوع: رد: تحت شجر الخور الظليل   الأحد 10 مارس 2013, 1:34 pm

والله يا ود عنتر دا بوست من أجمل بوستات المنتدى وأروعها،،

وهو عبارة عن فكرة مبتكرة ونمط جديد من أنماط الاستراحات الممتعة،،،

بعون الله تعالى سنعود إليه ونبث الروح في أوصاله من جديد،،،

ولكن شايف الجماعة كلهم جفلوا من المنتدى، وتركوه خاوياً على عروشه،،،
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.google.com.qa
محمد عنتر

avatar

عدد المساهمات : 1362
تاريخ التسجيل : 25/01/2011
العمر : 35
الموقع : الامارات-ابو ظبى

مُساهمةموضوع: رد: تحت شجر الخور الظليل   الأربعاء 13 مارس 2013, 1:58 pm



هلا بالخال اسماعيل منور ياملك الملوك . بصراحة بوست ترتاح فية النفوس وتحس بنفسك فى العريجاء
اللمة والشلة وقعدة الناس ونتمنى منك ياخال . ان تنشر مداخلات رايعة تجذب الناس للمنتدى دايرن
منك مداخلة ياخال تجعل زوار هذا المنتدى اكثر من 500 زائر
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابوصهيب ودالشايقي



عدد المساهمات : 18
تاريخ التسجيل : 28/12/2012
العمر : 42
الموقع : السودان

مُساهمةموضوع: رد: تحت شجر الخور الظليل   الخميس 14 مارس 2013, 12:49 am

ودعنتر
بعد نمت خالي في خريف العريجا انقوم نتفرق واناشايف احمد نعيم لملم الطماطم بتاعتو النهار زاتو سخن.
اسماعيل
انا شايف هناك في رول ماشي علينا والزول اب دقن دي من اولاد خالي بخيت اه الزول طلع ابو صهيب
ابوصهيب
السلام عليكم
الحصور
عليكم السلام ياودالشايقي
ابوصهيب
مالكم قايمين كراعي حار
مجدي
والله اصلا كون ماشين علي فريكم لكن اسماعيل قال الا تنتظرو الجاي داك
اسماعيل
هلا ياود عمتي كراعك تب مي حار لكن نديك نمه
ودالشايقي اخوي الغالي ابوالصهيب
يادخري السنين حاشاكا من العيب
معروف بألشهامه وبالكسب والجيب
وجدك قبيل صنديد رجال فرنيب
ابوصهيب
ابشر ياودعمتي لكن مالاك ماقولت لي من الاول ياود خالي ابوي دا ماعاجبك لا من تقول لي ياود عمتي
اسماعيل
والله ياابو الصهيب ابوك كلمة خالي ذات عليهو شويه لكن بكره تعال بدري انشا الله ان كان في العمر بقيه حا اوريك القولت في ابو عوضيه (ماحوي النبي) اه اجماعه في رعايت الله وبكره نواصل(انشا الله)
ابو صهيب
‏(سبحانك اللهم بحمدك الا اله الا انت استغفرك واتوب إليك)
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ابو ممدوح

avatar

عدد المساهمات : 807
تاريخ التسجيل : 23/05/2011
العمر : 46
الموقع : السودان

مُساهمةموضوع: رد: تحت شجر الخور الظليل   الخميس 14 مارس 2013, 4:22 am

بسم الله الرحمن الرحيم


والله وريتونا يا شباب الابداع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://[url=http://www.gulfup.com/][img]http://im17.gulfup.com/2
Ismail

avatar

عدد المساهمات : 2538
تاريخ التسجيل : 05/02/2008
العمر : 37
الموقع : aykabulbul@gmail

مُساهمةموضوع: رد: تحت شجر الخور الظليل   الجمعة 22 مارس 2013, 3:22 am

والله يا ود الخال، نعم الإبداع ولو من الجوال...

دي حلتنا المرحة يا ود الشايقي، البوست دا كنا بديناه أنا وود عنتر، لكن قبلك ما لقينا لينازول وازرنا فيهو !!!

وحباب الحبيب القريب أبو ممدوح، صاحب الوجه الصبوح، والديوان المفتوح!!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.google.com.qa
 
تحت شجر الخور الظليل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات العريجا :: المنتدي الادبي والثقافي-
انتقل الى: