رجع ناكر
من ديوان مشاعر جريحه مايو 2000
بدرالدين الكدّك
وكت تاهت مراكب الشوق
في نيلاً صبح ممدود
قلت ارجع الاقي عيونك الضفه
وفي جواك وطن الفه...
انوم في حضنك المشرور
بطول النيل وادّفّا
ابل من ريقك النديان تراب بلداً
صبح عطشان وزي جفّا
امد ايدي علي الشعر المغطيك
واغطي الشوق بتوب عفّه
الا زمانك الممحوق رجع تاني
وفات بالآهة واللهفة
وفي لحظة سكون الشوق
وكت مطر الكلام دفّق
صحيت من حلمك الصدفه
ولقيتا وعودك الزايفه
وملاذك اصلو مامرفأ
مرقتَ وبي وجع غنّاي انادي عليك
تعال يالفتّ قبل القمره تدخل غيمها تتلفّ
تعال يالشلت فرح اطفال
مشيت في الجبّه تتخفّه
تعال رجِّع حجا الحبوبه
غنواتها وجمال طرفه
تعال راجنّك البنُّوت عشان تمرق
هدير سيره وضجيج زفّه
يغنن ليك عديله وزين
ويتلمّن ليلن يبقي ليل وقفه
تعال ادخل رواكيبنا و بويتاتنا
عشان نتلاقي من تاني
ونزوب في زاتنا بي لهفه
وقلت يرجع رجع لكن
نكر وعدو سرق زاتي ونسي العرفه
سرق زاتي ونسي العرفه