منتديات العريجا
مرحبا بك في منتديات العريجا سجل معنا وكن عضوا فاعلا



 
الرئيسيةمكتبة الصورس .و .جبحـثالتسجيلالمجموعاتدخول
المواضيع الأخيرة
» الجاك إبراهيم الشايقي (أمير ظرفاء العريجاء)
الأحد 10 ديسمبر 2017, 1:08 pm من طرف Ismail

» مسدار أخوالي صباحي ورحمة
الإثنين 27 نوفمبر 2017, 3:47 pm من طرف Ismail

» بامبيدو يا درة بلدنا الجميلة
الإثنين 27 نوفمبر 2017, 3:18 pm من طرف Ismail

» مسدار أبو الهيثم (فضل المرجي)
الأربعاء 22 نوفمبر 2017, 9:42 pm من طرف Ismail

» مسدار أبواتي العرواب الأماجد
الخميس 19 أكتوبر 2017, 1:22 pm من طرف Ismail

» مسدار السلفية الملتزمة
الأربعاء 18 أكتوبر 2017, 5:59 pm من طرف Ismail

» من أخطاء المتصوفة وتجاوزاتهم
الإثنين 16 أكتوبر 2017, 9:05 pm من طرف Ismail

» الأسلام دين العدالة والتسامح لا الإرهاب والعنف
الإثنين 09 أكتوبر 2017, 7:45 pm من طرف Ismail

» اضحك مع أحفاد جدنا أب تلوشة
الأحد 08 أكتوبر 2017, 4:30 pm من طرف Ismail

أفضل 10 أعضاء في هذا الشهر
Ismail
 

شاطر | 
 

 اضحك مع أحفاد جدنا أب تلوشة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Ismail

avatar

عدد المساهمات : 2547
تاريخ التسجيل : 05/02/2008
العمر : 37
الموقع : aykabulbul@gmail

مُساهمةموضوع: اضحك مع أحفاد جدنا أب تلوشة   الأحد 08 أكتوبر 2017, 4:30 pm

بسم الله الرحمن الرحيم

خواطر ذبيحية (1)
اضحك مع أحفاد جدنا (أب تلّوشة؛ كجول في بطن زول)!!


توطئة وتمهيد:

من هو جدنا أب تلُّوشة؟؟!
هو المحسي القارح، والفارس المغوار، قائد كتائب حلف المحس والمغاربة ضد هجمات الجهدية أيام دولة المهدية .. والذي دوخ الجهادية، وأنزل بهم الويلات، حتى صاروا يتحاشون القدوم إلى منطقته خوفاً من بطشه وسطوته!!

اسمه أمْحَدْ علِي ود رحمة ود عتمان ود رحمة (أبو الجاك وبخيتة)، وكانت شفته السفلى بالغة الضخامة؛ وكان (يستعزَى) في الحروب فيقول: (أنا كجول؛ في بطن زول) ولها تتمة نعتذر عن إيرادها!!

أبوي ضهر الديدب (عليه رحمة الله) قال لي: (جدَّك أمحد علي ود رحمة كان عنده تلوشة متل تلوشة البعير، وكت إزعل تقنب تضرب رب رب رب؛ وتاني فدْ زول بقدر إقيف قدامه مافي! ومن شِدَّة ما جنَّن الجهدية وكتَّل فرسانن، بقوا وكت إجوا قريب من منطقتنا دي يقعدوا يتواصوا: يا أخوانَّا هوووووي؛ أختولنا بلد أب تلوشة، الله لا  طراهو ولا طِرى خلقتو القبيحة دي) هههههههههه

وهو الذي ارتحل إلى جبال النوبة بمفرده لكي يأخذ بثأر شقيقه (عتمان) الذي اغتيل هناك غيلة وغدراً، وعاد بعد أن أخذ بثأر أخيه، وهو يحمل في جرابه (قبَّاض) من أعضاء من اغتالوا أخاه!!

وهو صاحب المقولة الطريفة  التي يتداولها أهلنا إلى هذا اليوم (الحمار أكل الدفتر) هههههه وقصتها أنه كان شيخ حلة العريجاء، وفي إحدى سنوات المحل رفض أن يجمع من بني عمومته (العشور) و(القطعان)، وهي عبارة عن جبايات تؤخذ من الشعب وتدفع للحكومة (أيام الحكم الثنائي) .. وعندما سأله مسؤولو الحكومة عن سبب ذلك، قال لهم: (الحمار أكل الدفتر)!! هههههههههه

هذا الرجل الفارس والقيادي والزعيم لم يترك من الذرية سوى ولد وحيد، وبنت وحيدة؛ هما بخيتة والجاك (عليهم جميعاً رحمة الله تعالى)!!

الجالك خلف ثلاثة أبناء هم: راشد وعاصم وعصام، وأربع بنات هن: رابحة وبخيتة والماجدة .. أما بخيتة فخلفت خمسة أبناء هم: علي وعوض والنور وإبراهيم وأحمد، وخمس بنات هن: عائشة وفاطمة وآمنة ومكة وبتول .. وقد توفيت البنات الخمس، وكذلك شقيقهن عوض (عليهم رحمة الله تعالى)!!


متن الخاطرة
طرائف أحفاد أب تلوشة:
1) سعيد جاد الرب قال لي: (عاصم رجع من السعودية نهائي .. سألته عن السبب، قال لي: دقيت كفيلي هههههههه قلت ليهو: بركة الما كانت جنبك سكين وللا كنت بعَّجت الكفيل ده، وخليت مصارينو جارات بالواطاة .. ضحك وقال لي: الحمد لله إنها وقفت على كدة!!)

2) راشد شاف ناس شيخ حمد ود الشيخ إدريس (المؤذن) والبخيت ود نوح جايين بشارع بيتهم .. قال ليهم: (تاني أوعى تجوا ماشين بي جاي؛ أنا عندي بنات) هههههههههههه .. شيخ حمد المؤذن والبخيت ود نوح يا رااااااااااشد!!!!!!!
ياخ الجماعة الاتنين ديل عمرهم لا يقل عن 70 سنة، وبعض أولادهم أكبر من راشد ده زاتو .. وهم دراويش حتى النخاع! .. شيخ حمد ده شيخوهو ناس شيخ الجيلي (أب شام)، بتاع طابت؛ منذ أواخر ستينيات القرن الماضي، والبخيت غرقان في الدروشة للطيش، ههههههههههههههههه

3) ولنأخذ أحد المواقف الطريفة لوالدهم؛ جدنا الجاك ود أمحد علي (عليه رحمة الله) ...
كان زول قصير، وعنده ربطه في لسانه (بتمتم)، وكان صعب جداً، وتمباكو مُرْ بالحيل ههههههه
العاقب قال: (كنا طالعين من مستشفى العزازي، وماشين على السوق، ومعانا الجاك ود أمحد علي، وكان حالق راسو صلعة تلمع .. وكان معانا ولد من الحلال الورا العزازي دي (شكير، بلومة، أم شديدة، المطيمر ... الخ) بعرف واحد مننا، والولد ده بحب الهزار  والمزاح .. قعد الولد ده كل ساعة يرجع خلف شوية ويطق الجاك فوق صلعته، والجاك فوَّت ليهو الحكاية دي في المرة الأولى والتانية، وفي التالتة كررررررر سل سكينو قصبة واتدَّرع الولد .. آهااا الولد قام خاف، وجرى اتضَّارى في ضهر زولو البعرفو وقال لينا: (يا أخوانَّا هوووووووي؛ زولكم ده إبرتو ما بتشيل خيتين)! قال: (قلنا ليهو: والله فت خيت ما بتشيلو) هههههههههههه




رجاااال التَّمَـدَة بالحيل دوَّخُـوا الجهديَّة
ديل داحرين (دكين) قبال تجي المهدية
الوااادي الوسيع بونو .. ووطاااتو نَدِيَّة
بي حد السيوف كاااسبنُّو .. ماهو هديَّة
******************
أبْ تلُّوشة .. شاااال تُركاشو قرقر بَرَّة
بِنَتَّر .. تقووول رعَـد الضراااااع الكَرَّه
الجهَديَّة يوم لاقـوهـو ضااااقـوا المُـرَّة
جفلوا .. وهجُّـوااا من رِدَّ البلد بالمّـرَّة
******************
من رحَمَة القَصَر جِرِّق دَحَالة أبْ شُوشة
لي مَكْ البقَـر .. والقااااارح أبْ تلُّووشــة
من حوضاً عزيز؛ طينتك قبيل مخموشـة
والجهديَّة .. في التاااريخ قلبتي ديوشـه



كتبه إسماعيل ود العريجاء
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.google.com.qa
 
اضحك مع أحفاد جدنا أب تلوشة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات العريجا :: العريجا ( الماضي الحاضر المستقبل )-
انتقل الى: