سمرا

السلام عليكم ورحمة الله وبركاته
اخوتي اكتب اليكم احدي قصائدي واريد ان اري نقدكم كما قلت لكم في اول سطور كتبتها في المتدي اني جئت كي اتعلم منكم واقدم الراي واستمتع بالراي الاخر واتمني ان اشكل اضافه
سمرا

سمرا ست كل البنات
رقة ورشاقة ودوزنة
معطار من الشعر الرصين
الق القوافي مزينة
……………………….
شوقك وصل بعد الدعاش
نزلت دموعنا مع المطر
حتي الرعد دقه الطبول
زفة عروس زغرد برق
والريح صدح دندين وتر
بهواك في كل الطقوس
كل الحكيات والسير
في الهجعه والترحال معاي
شنطة سفر
منك سهام النظره خوف
عينيك قناديل للقمر
في شعرك الضلمه بتتوه
وشك نجوم ليلة سمر
ياخضره غازلت الجروف
زي قهوه مصحوبه بتمر
ياطيبه زي اهلي الهناك
يالمه في ضل العصر
اليله جات تضرم دهب
طلة شمس للفضة في النيل الوفي
بي بسمه تتمدد حقول
هشة سنابل القول وصف
رقصة ندي فوق الشتول
باقات ورد في كل بيت
مرجيحه من عطر الفصول
ياسمرا زي وطني القبيل
ساكنه مداخل اي زول
ياسمرا زي وطني الحنين
ساكنه مداخل كل زول


,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
ودمتم سالمين