مسدار أبواتي العرواب الأماجد

بسم الله الرحمن الرحيم
مسدار أبواتي العرواب
سلسلة نسبي إلى جدي عبدالجليل ود يوسف

الذبيح (واسمه إسماعيل) ود ضهر الديدب (واسمه البشير) ود علي ود أمحمد ود المحينة (واسمه أحمد) ود عبد الجليل ود النور ود المَكَنَّى (واسمه أمحمد) ود عبد الجليل ود يوسف ود أمحمد ود المهل ود عبد الجليل ود يوسف ود أحمد ود مشاجر!!
*****************
ضهَــر الدّيـدَب .. الشـايْـلَ التقيلـة أم حـيــل
أبوي دابـي الخُشش .. هَـبَّـار شُـروك الليـل
حـلـيـل عمِّـي المقـدَّم .. كان بِعَــدْل المــيــل
وبِـدْفِــق كفُّـو .. للقـاصْــدنُّـو مِـتْـل الســيـل
*****************
وعمي أب سِلْكة شَنحيب الخلا أب عاصْقيل
بعَـقْــدَ الـدَّم .. وللعـشــمـــان بِطَـبْـق الكـيـل
وجِدي علي أب شنب فارسـاً شـديع بالحيـل
ودفَـن الخاتِي في اللَّبقـة .. وسقاهـو الويـل
*****************
وأمْحَمَّـد.. تشـوف ضيفانـو ديـل فـوق ديـل
عَقيـد الصَّـافِـنـات .. فَـزَّار ضُهُــور الخـيـل
ده دُخْرِي الحوبة.. ما بِسكن بيوت ضانقيل
ضُـيُـوفــو بشبِّعُـن شَــيَّـة وتَـمُــــر قُـنـديــل
*****************
وجِـدِّي المِحْنـة دُود فلَـوات وتُمـســاح نيـل
ركَـــز للمِـيَّـة .. ثاااابِـت زي جـبَــل توتـيــل
عُقُب عبد الجليـل في الفَرْســـة وزنُـو تقيـل
عريس رايْهــوبَـةَ الضُّمَّــــر .. عناق الرِّيـل
*****************
وجِـدَّي النُّـور.. تشِــــع أنْـوارو زي قِنـديـل
حليل والدو المَكنَّى .. الما فيهـو ليهو مثيـل
وود يوسِـف دوام مطمُـورتُـو باقـيـة سبيـل
وإيـدو بتَـخْـجِــــل العِـيـنــة البُـروقـا تْشِـيـل
*****************
إسماعيل البشير المحينة

» مسدار المزيرة (مزيرة فضل الله)
» مسدار سلام دار فور
» مسدار الحنين إلى العريجاء
» مسدار شدر الهوير
» مسدار السلفية الملتزمة