المسابقة العريجاوية الرابعة

بسم الله الرحمن الرحيم

المسابقة عريجاوية الرابعة

السؤال الأول:ــــ

ما هو أقدم مرفق خدمي تم إنشاؤه بقرية العريجاء علماً بأن معظم المرافق الخدمية الرئيسية بالقرية قد تم إنشاؤها في أواخر خمسينات وأوائل ستينات القرن المنصرم؟:ـــ

1. الشفخانة (مرفق الخدمات الصحية والطبية).

2. المدرسة الأولية (مرفق الخدمات التعليمية والتربوية).

3. بيت المجلس (مرفق الخدمات العدلية والقضائية).

السؤال الثاني:ــــ

معلوم أن جدنا عثمان الحسين صباحي هو صمد ترعة (الرايات)، وجدنا حاج محمد حدباي خرَّاش (رحمه الله) هو صمد ترعة (الغرنوق)، ولكنه قد تم تعيينه صمداً للغنوق بعد استقالة الصمد السابق، فمن كان ذلك الصمد الذي خلفه حاج محمد ود حدباي:ـــ

1. حاج أحمد ود الشيخ إدريس (رحمه الله).

2. حاج العبيد ود خير الله (رحمه الله).

3. حاج عبد الله ود رحمة، الشهير بالضباح (رحمه الله).

السؤال الثالث:ــــ

المقر الحالي لنادي الكفاح بالعريجاء، والمجاور للشفخانة والمدرسة الأساس والمسجد العتيق، قد أقيم على أنقاض معلم بارز من معالم العريجاء، فما هو ذلك المعلم الذي كان يحتل الموقع الحالي لنادي الكفاح؟:ـــ

1. منزل ناظر المدرسة.

2. كشك علي جريجير.

3. بيت المجلس.

السؤال الرابع:ـــ

في مطلع ستينيات القرن الماضي كان بقرية العريجاء أربعة دكاكين كبيرة منتشرة على طول القرية (طبعاً كانت هناك بعض الدكاكين الصغيرة)، ولكن سؤالنا عن أربعه دكاكين تمثل الدكاكين الكبرى والرئيسية بالعريجاء... وهي تحديداً دكان حسين ود أحمد (في شارع النص)، ودكان ود دعوب (مكان دكان سيف الدين الحالي)، ودكان حسن علي الدنقلاوي (مكان دكان ملك الدار الحالي)، فما هو الدكان الرابع؟:ــــ

1. دكان علي ود الضباح (رحمه الله).

2. دكان الفكي الزين علي أرباب (رحمه الله).

3. دكان منوفلي ود القاسم (رحمه الله).

زائر

السلام عليكم ياود الخاله ..... كل الأجابات عارفاها مافي إستحاله .... لكن بدون جوائز يبقي ده ضياع زمن وزيادة عطاله

آمنه عبد القادر كتب:: السلام عليكم ياود الخاله ..... كل الأجابات عارفاها مافي إستحاله .... لكن بدون جوائز يبقي ده ضياع زمن وزيادة عطاله

يا بت الخال، المثل المصري بيقول (منين يا حسرة)، دحين أخير ليك تقطعي العشم نهائياً، وكان عندك حل للمسابقة تسرعي بكتابته وتستعوضي الله صاحب العوض ... فلا إسماعيل ولا ود نور الله ما فيهم زول عندو جوائز... وكان عندهم عمار خليهم يدعموا بيه كهربة العريجاء البقت مصابة بالظلام المزمن دي!!

زائر

عوضنا الله آآآود الماجده أقدم مصلحه في العريجا هي الشفخانه وخليفة ود حدباي علي صمدية الغرنوق أحمد ود شيخ إدريس ونادي الكفاح قام علي أنقاض كشك ود جريجير والدكان الرابع هو سيمي سوبر ماركت علي ود الضباح والعهده علي الراوي

الشفخانة

حاج عبدالله ودالضباح

كشك على جريجير

دكان على ود الضباح

أبوقدامة كتب:: الشفخانة

حاج عبدالله ودالضباح

كشك على جريجير

دكان على ود الضباح

الحبيب الأريب أبا قدامة،،،

حمداًً لله على سلامة العودة،،،

ونسأل الله أن يكتب لك النجاح في كل امتحاناتك، ويجعل التوفيق حليفك ورفيق دربك ما حييت،،،،

المرة دي شايفك أدليت بدلوك في الدلاء، وساهمت في إجابة أسئلة المسابقة العريجاوية !! دي برضها خطوة عديلة بإذن الله تعالى،،، لكن حاول مراجعة هذه الإجابات، وإذا عندك مصادر حاول استعلامها عن هذه الأسئلة،،،

فقط من أجل تصحيح المعلومة: جدك حاج عبد الله ود رحمة ود الفحل هو نفسه الضبَّاح وليس ود الضباح !!! وهو طبعاً والد كل من حاج محمد (أبو رياض ورودس)، وعلي – رحمه الله – (أبو عبد المنعم وفيصل وعبد الله ومحمد)، بالإضافة إلى مبشر، وأحمد (الباسم) وعطا، وعبد القادر،،،

عدد المساهمات : 234 تاريخ التسجيل : 18/10/2010

اشكر كل من ساهم في البوست، الواحد كان عاوز اشارك في الاجابات او حتي طرح سوال ،ولانو ماء نشاءت او ترعرعت في العريجاء هنالك طعف في معلوماتي وتاريخي عن العريجا
بس علي فكرة جد الواحد من خلال المسابقة عرف الكثير عن تاريخ العريجاء ونتمني التواصل

عدد المساهمات : 234 تاريخ التسجيل : 18/10/2010

بس برضو نحاول
الاجابات
1/الشفخانة
2/حاج العبيد
3/منزل ناظر المدرسة
4/دكان الفكي الزين
نتمني تصحيح المعلومات اذا كان يوجد خطاء

السلام عليكم

اديك العافية يا الخال العذيذ اسماعيل على المسابقات الرايعة دى
والشكر لكل المتداخلين فى حل هذة المسابقة والتحية ل امنة
عبد القادر ونقول لها عندك مصدر الاجابات معاك فى البيت معناها لو
فى جوائز الرماد كال قشمنا نحن المتغربين ديل ما عندنا اى مصدر الا
نتصل والشبكة فى العريجا اللة اكون فى عونا

ونقول للبرنس يا ود الخالة قعدة تسبقنا فى الاجابات
التقول لعبتة معانا كرعت وادسيت معانا ورى الشسفخانة
على العموم الشكر لكم جميعا
والمسابقات يا الخال اسماعيل بقت مولعة نار صعبة

الاجابات

الشفخانة

حاج العبيد ود خير اللة

بيت المجلس

دكان على ود الضباح

زائر

والله يامحمد عنتر المصادر متوفره عندي بكثره بس الشفقه تطير .. هسي يا سمعه ما بتديني فرصه تاني أصحح إجاباتي؟

آمنه عبد القادر كتب:: والله يامحمد عنتر المصادر متوفره عندي بكثره بس الشفقه تطير .. هسي يا سمعه ما بتديني فرصه تاني أصحح إجاباتي؟

للأسف الشديد يا بت الخال مافي أي فرصة تانية.... والطلقة بعد ما تمرق من البندقية تاني ما بترجع ليها كلو كلو...وكفاية إنو الجماعة قاعدين يغششوكم، ويدوكم الإجابات على طبق من ذهب...

ولمعلومية الجميع؛ الإجابات التي وردتنا حتى الآن تصنيفها كالآتي:ـ
عندنا زول نتيجته (3 من 4)، وزول نتيجته (2 من 4) وزول نتيجته (1 من 4) وزول نتيجته (0 من 4) !!!

فهل بين أعضائنا الكرام من يقفِّل المجموع ويجيب (4 من 4) علماً بأن هناك سؤال كل الناس جاوبوه غلط؟؟!

(4-0) اكيد دا انا اللة اكضب الشينة بس يا الخال اسماعيل

واللة الشلاقة كاتلانى اسع اكان صبرتة لمن الشبكة جات ما كان
احسن لى والغريبة ابو دا ( حاج عنتر) رسلنا ليهو تلفون جديد عشان

المسابقات دى لانو بقول تلفون كعب
برضو شبكتو كعبة
اللة اعين بس

تخريمة

يعنى يا الخال اسماعيل المسابقات دى خسرانين فيها اموال طايلة

بعد كلو نجاوب غلط

يا ود عنتر ياخي ما تخليك عنتر زي أبوك وتبطل الجرسة والبطبطة الكتيرة دي.... بالمناسبة الزول الجايب زيرو ده ما إنت ولا حاجة... دحين اطَّمن ياخي، وخت في بطنك بطيخة من بطيخ محمد الأمين المسعودي....

السلام عليكم السوال الاول هو .بيت المجلس والثاني .حاج عبد الله ودالضباح والثالث .كشك علي جريجير الرابع. علي ودالضباح ولكم التحيه ونعتذر لعدم التواصل

عدد المساهمات : 234 تاريخ التسجيل : 18/10/2010

الخال اسماعيل لك كل التحية والاحترام علي المواضيع الجميلة ،الظاهر الزول الجاب زيرو دو انا لاني عارف معلوماتي ضعيفة لاني مالعبت كروع مع ناس محمد
تخريمة: اجاباتي كلها تختلف عن اجابات الاخوان بس ماحبيت اغشش نفسي حبيت اعتمد علي نفسي لاكين الصفرة دة كان يستاهل الواحد يغشش نفسو

البرنس كتب:: الخال اسماعيل لك كل التحية والاحترام علي المواضيع الجميلة ،الظاهر الزول الجاب زيرو دو انا لاني عارف معلوماتي ضعيفة لاني مالعبت كروع مع ناس محمد
تخريمة: اجاباتي كلها تختلف عن اجابات الاخوان بس ماحبيت اغشش نفسي حبيت اعتمد علي نفسي لاكين الصفرة دة كان يستاهل الواحد يغشش نفسو

ابننا الغالي عادل محمد يوسف (البرنس)...

أولاً نحييك ونكبر فيك حبك لأهلك العرَّاجة، وصدق انتمائك لقرية العريجاء، على الرغم من أنك لم تنشأ فيها، ولم تترعرع بين أكنافها...

لكن يا الحبيب مثل هذه المسابقات لابد لها من شوية (تغشيش)، ورجوع إلى (الجماعة الكبار) فكثير من هذه الأحداث والوقائع عايشناها نحن أيام طفولتنا، وبعضها وقع قبل أن نولد... فإذا كان خالك إسماعيل الآن في العقد السادس من عمره، فكيف يكون بإمكان شاب صغير في مثل سنك أن يجيب على هذه الأسئلة اعتماداً على ذاته فقط ...

تخريمة: معليش يا برنس؛ إنت سبَّبت لينا إشكال بهناك، في بوست (المسابقة الإسلامية الثقافية)، وربما يكون ذلك لعدم تركيزك في قراءتك شروط المسابقة...

عدد المساهمات : 234 تاريخ التسجيل : 18/10/2010

بعد التحية والاحترام مشكور علي الاشادة التي محل فخر واعتذاز عندي ،وكنت بتمني لو نشاءت بها
وبالنسبة للاشكال الحصل بيهناك مش عدم تركيزاو جهل او عدم ادراك بقانون المسابقة يل انا طرحت السوال علي لاخت امنة بقولي (هاك سوال)وكمان اعتزرت عن خرق القوانين في التخريمة وبكرر اسفي واعتزاري للمرة الثانية
تخريمة:ياخال بعد دة الواحد يغشش نفسو ساااااااااااااكت والله يا ابوي امحمد بعدة انا جايك ود عنتر شايفو وقال الشبكة فيها عدم استقرار ياود الخال هو البنتظر ليهو شبكة منو والله مسج نجيب الحل ماتقوا الرسالة مادايرة شبكة كتيرة انشاء خط بتجي

حل المسابقة العريجاوية الرابعة:

الإخوة الكرام إليكم حل المسابقة العريجاوية الرابعة:ـ

 السؤال الأول: بيت المجلس (مرفق الخدمات القضائية والعدلية).
حيث تم تأسيس بيت المجلس عام 1959م، وتم تأسيس المدرسة الأولية عام 1962م، وتم تأسيس الشفخانة عام 1963م.

 السؤال الثاني: حاج أحمد ود الشيخ إدريس (رحمه الله).

 السؤال الثالث: كشك علي جريجير.

 السؤال الرابع: دكان علي ود الضباح (رحمه الله).

» المسابقة العريجاوية الرابعة عشرة
» المسابقة العريجاوية الحادية عشرة (المسابقة الأحمد نعيمية)
» المسابقة العريجاوية الأولى
» المسابقة العريجاوية الخامسة عشرة
» المسابقة العريجاوية رقم (20)