الحاجة مبروكة

موضوع: الحاجة مبروكة الإثنين 11 يوليو 2011, 4:49 pm

الحاجة مبروكة الحنية والشفقة على فقدة الجار وزيارة المريض
وصلة الارحام فى الافراح والاتراح الحاجة مبروكة الانسانة البسيطة
يملؤ قلبها الحنية والخير على اهله وناس الحلة والبعيد والزائر
محبوبة بين اهلها وناس الحلة ذلك لطيبه قلبها ومعشرها الطيب
كانت تمرض با حساسها وشعورها اذا مرض احد من اهلها او جيرانه
وتفقد الناس فى العشية وتصابحهم عند الصبحية بالخير ماب تقصر
تب كيف امسيتو وكيف اصبحتو وكيف قيلتو انشاء الله مبسوطين
وتجدها زاهبة الى الجامع بالتوب الابيض والسبحة السوداء المميذة فى كل وقت من اوقات الصلاة
وكانت بعد كل صلاة عصر تمرق على طرف الحلة تلقت الوقود لمن تصل الحواشات تلم فى الكروق وجريد
النخل والشوك وكانت صديقة دايما للخلا والوقود وصار الوقود صديقا لها

ولكن

سبحان الله مغير الاحوال من حال الى حال تغيرت الحاجة مبروكة فى كل نظام حياتة
حاربت الوقود والمرقة وصارت صديق البيت
وتعالو معاى نشوف سبب الحرابة والفقدة من شلة الوقود للحاجة مبروكة
بلسان شاعر الطمبور العملاق خالد شقورى

قصاد الساقية اتلمن كروقة وجريدة وشوكة
وشقاية عويد مشقوق كانت بدرى سلوكة
طلحيات وعيدان منقة يابسة بقت على الدوكة
ولا حطب سدر فى الساب تقول دقولو دلوكة
وكتيت تمر وراس واقود قصاد تملاات على الروكة
عقدو الاجتماع الطارى بخصوص الحاجة مبروكة

رئيسم عود طلح سالم محزق بالروى اتفلت
وقال بسم الله قول موزون فيه الحكمة اتجلت
هى ليها شهر واظن اكتر علينا الرايقه ما طلت
وما مرضانى كان مرضانى كان جات بتها انسلت
وما ظنينا ام الخير من الواقود تكون ملت
طيب ما لا يالسامعين مالا الرايقه ما اندلت
نطت غادى كروقه قالت يبقى انشلت
رد عليها ساق عشر زعلان ضمه اتفلت
قبيل ما قلنا اكان قشرانى كان جات بتها انسلت
جريده مزهجا الاشميق معوكسى ولسه ما اتبلت
قالت يبقى جاها سفر وفى البلد الهناك حلت
رد عليها عيود مشقوق كيفن للديار خلت
وهى الكانت تصيدا الرجفه لو فات يوم وما اندلت

ولما خلاص غياب الحاجه حير شلت الواقود
قالو نرسل الشوكه بينات شق كراع محمود
اصلو نسيبا وود خالا بيغشاها ومصيرو اعود
ويلقى سؤالنا ردود ويلقى سؤالنا الف ردود
مشت الشوكه وسط الشق ابدا ما لقتلو حدود
هى خايفه تصل لحيمو الحى وينو الحى مع محمود
تربال ما بتفرز كراعو وايدو جنب العود
وصلو البيت مع الازان وباتت وعرفت المستور
وجات الشوكه صبحا ليل ترجف زى جنى مسحور
مرقت روحا من الشق ورقدت فوق كويم الصور
ونادت بحسيس مبحوح تعالو انا جيت ملانى خبور

وتانى اتلمو ناس واقود نيم وهشاب حطب وحراز
وبدت الشوكة تحكى الحال معبوره ودميعا رزاز
قالت جاها من برا جناها الكان زمان قفاز
اكان شفتيهو يا لكروقة املس ولابس الهزاز
جاهم شايل الخلاطة والتلاجة والبتو جاز
والبوتجاز اكان شفتى النويرا الفية شمسا ضاربى جوة قزاز
الشاى سوا رمشة عين خلا الحلة نوما خزاز
حليلك يا لجريد الكنت اسرع من قنيص الباز

فى ايدا الغويشة دهب فنت فى الركن حجلا
كمان الحنا ليل ياليل تلمع فى بطن رجلا
بقت تشرب لبن بدرا باعت بقرتا وعجلا
رمت فى الحوش صباح الخير وقامت قلعت فجلا

وحتى التكل الكان وسخان صبح مطبخ مجير
وحتى المرق الشايلو سنين فى ما سورة السقف اتحير
خلاص الحاجة مبروكة حالا المايل اتغير
بعد ما نار بقينا وسخ عليك يا الكوشة نضير

وعاد اكان لى جرار الموية صادو الصادنا يا الاخوان
وحتى القربة بس كاويق مطوطوة راقدا فى الديوان

خلت سيرة العشاء فى الخلوة وقولة يا ستار يا هادى
وطول الليل مقابلى التلفزيون اصلو مؤنس من لا الرادى
شا فتلها شفع فطر وبطر قالت اريتو دا حال اولادى
وما عا رفاها دعاية دعاية تخوزق الجاى والغادى

مسكينا الحاجة الاتغشت فى الجاة الجاها بلا جيها
الحال يعجب صح وحالا زين لمين لى بيتا مواليها
ما كان ابدا تتنكر للنار الكانت تطفيها
بى نفخة قوية ولا موصة ولاتلم هبودا عليها
وينا صلاة مع الازان سهر الليل ما اثر فيها
وينو مشيها للجيران الكانو زمان ما كانو زويها
وينو قعادا مع الحبان والجبنة التنت بكريها
عميرها سرح فوق الخمسين كيفن تنساك يا ما ضيها

إلا إلا وباكر وبكرة مصيرو الحال يتغير
جنا ها بفوت
وغازا بيكمل
وجازا بيكمل
ونارا تموت

وترجع ليك يا درب الساقية شايلا عزابا وشوق وهموم
تحقب قشها تقسم نصو وترفع نصو مع محمود
تنوم فى راسا كداد المعزة وتصحى على السعن المقدود
وتبقى حياتا حليلة ويكة وقربة وموية وراس واقود
وتبقى حياتا حليلة ويكة وقربة وموية وراس واقود

» الحاجة طلعت تفتيحة !!
» الحاجة امنة البشير الي جنات الخلد