عابرة ( عصفور الصباح)

عابرة

عصفور الصباح بيغنى لما الليل يولى ستارو
سبحان الوضع يا عابرة فى صدر الكنار مزمارو
كم يشجينى لما يغنى يجلى الماضى بى اسرارو
شايفك بى وضوح يا امانى والكل فى السنين اضارو
فى موكب هوانا ابحرنا فى زمن القدر اختارو
راقدين فى امان وغفلنا من ريح الفراق واعصارو
يوم نزل العزول ساحتنا ما اتنبهنا لى اخطارو
ما قايلين ودادنا الصافى ما حا نجنى غير تزكارو
ما مليت يوم زكراكى فى دربا طويل مشوارو
كالنيل فى البوادى بيجرى يوم ما انعكس تيارو
بطراك وانتى وين ما كنتى لى عشق الفؤاد تكرارو
لو طيفك يطوف يغنينى من ليل النجوم سمارو
حر اشواقى ليك يا عابرة احر من الصيام ونهارو
مترقب زمن لقياكى زى ساعة الازان وافطارو
ما نسانى طول المدة ما زال قلبى فى اصرارو
مكتول العيون يا عابرة من وين دار يفتش تارو
يا كوكب سماى الضاوى ما غارت شهب فى مدارو
كاسيهو الوقار بى حلة اجمل من زحل واقمارو

للشاعر محمد احمد الحبيب