الزول الوفى

موضوع: الزول الوفى الثلاثاء 20 سبتمبر 2011, 2:02 am

الزول الوفى

لما الحروف تمرق تفتش قبلة الزول الوفى
لما العيون تصدق تبين قوة احساسنا الخفى
حتى الاسف يهدى الكلام للبسمة والهم يختفى

**********

ما غاب نجمنا الايوم غابت اغانى الكادحين
وما مات فرحنا الايوم جفا الوفى الساقى الحنين
نحن البقينا بلا عمر ورمينا همنا فى السنين
اصبح عشمنا حزم غنى ترمينا فى الشاطى الامين

**********

لما الحروف تنبض وجع وتنزف على الصفحات اسف
ولما العيون تبدا الطمع وما ترمى الا على الهدف
حتى الشمس يمكن تضن وتمنع ضياها عن الصدف

**********

الدنيا اية غير امنيات منسابة فى مجرى العبير
وغير زفة من الاغنيات ممزوجة بى فرح الصغير
وما دام صحيح انو المصائب حددت سير المصير
كيف يحزن الزول البشوف. وكيف يضحك الزول الضرير

**********

لما الحروف تتحدى حزن الليل تشيلو من الصباح
ولما العيون تتمنى خير النيل يعم كل ابطاح
ما بنلقى فى جوف الزمن الا الغنى الصافى المباح

**********

شوفو الكنار ما لاقى عيش لكنو غرد وانتشى
لمن لمح خيط الندى فى صفحة الازهار مشى
ليه ما نكون زى الطيور الفيها حب الغير نشى
وليه ما نكون زى النسيم نهدى الزمان الوشوشة

**********

لما الحروف تصبح رياح وتوزع الشوق فى الضفاف
ولما العيون تمطر سماح فى عزة الارض الجفاف
حتى الزمن يزهر وفا وتلبس غنيواتنا الزفاف

**********

مليون عشم فى انتظار يتقلى فى حر القلب
ومليون قمر حاقى الطريق يهدينا لو الشوق ضهب
كل العيون تهتف تقول لازم نفى لازم نحب
ما الطيبة يا الناس الحنان راجانا فى اخر الدرب

**********

لما الحروف تصبح عيون وناسة فى جلسة هنا
ولما العيون تصبح حروف افراحا فينا ومننا
يادوب بنعرف كيف نكون ونعرف معنى الغنى

للشاعر خالد شقورى

والله يا ود أختى الأيامى دى جوك شعيرية ساااااااااااااااااااااااكت أظن بعد ده تنزل ليك إجازة شهر و تجينا فرش ولا شنو؟

خالد الجاك كتب

والله يا ود أختى الأيامى دى جوك شعيرية ساااااااااااااااااااااااكت أظن بعد ده تنزل ليك إجازة شهر و تجينا فرش ولا شنو؟

تشكر الخال العذيذ على المرور لكين ود اختك جوى الايام مش شعرية وبس شعيرية وشعريه وشعرية ههههههه حلوة صاح
ود اختك مولع بشعر وكلمات الطنبور واستمتع اكتر مع نغمات الربابة واجد نفسى مع شجى الطمبور الحنين
وبينى وبينك كدا ملتقى ابناء الشماليه فى الجامعة اكان جمب ملتقى ابنا ء الجزيرة وبينى وبينك كدا الشوايقة ديل الله اديهم العافية

محمد عنتر كتب:: تشكر الخال العذيذ على المرور لكين ود اختك جوى الايام مش شعرية وبس شعيرية وشعريه وشعرية ههههههه حلوة صاح
ود اختك مولع بشعر وكلمات الطنبور واستمتع اكتر مع نغمات الربابة واجد نفسى مع شجى الطمبور الحنين
وبينى وبينك كدا ملتقى ابناء الشماليه فى الجامعة اكان جمب ملتقى ابنا ء الجزيرة وبينى وبينك كدا الشوايقة ديل الله اديهم العافية

الأسرة الشايقية الوحيدة في العريجاء هي أسرة جدنا أحمد ود الشايقي، بولديه إبراهيم ومحمد وابنته زينب... إبراهيم جاب أمي المايدة وأخويها الجاك وبخيت، وبقية العقد الفريد من أخواتها (حليمة وبخيتة وفاطمة ومكة)، ومحمد جاب زينب التي أنجبت كل من الصديق محمد علي (أبو الجيلي وعبد المحمود)، والحسن محمد علي (أبو عوض الله ومحمد وسراج والطيب)، وآمنة محمد علي (والدة الفضل وأب كدوك وعبد المجيد، وسعاد محمد علي (والدة أبو هريرة وصديق وعكاشة ومعاذ)...

أما زينب بت أحمد ود الشايقي فقد أنجبت محمد أحمد الزين وأخاه فضل الكريم، وأختهما النعمة (أم علي الجاك وأخوانه)، وأختهما الحرم (أم بريش)، وأختهما حليمة (أم الهادي حسب الرسول). نسأل الله أن يتغمد جميع من توفي من أهلنا بواسع رحمته، وأن يرحمنا إذا صرنا إلى ما صاروا إليه... آمين.

تعريجة: عمك خالد حسين كان برضو بيحب غنا الشوايقة، زمان لمن كنا نجي نلعب كورة في السهلة الواقع سافل بيت حاج أحمد (رحمه الله)، تلقى دايماً يترنم بأهازيج الشوايقة، من أمثال: (أظنك إنخملْ، بي غادي في ضل التمر... يا طير)

تشكر الخال الغالى اسماعيل على المرور والافادة القيمة

وتشكر ايضا لتوضيح نسب وصلة الرحم بين شوايقة العريجا

لله درك يا الخال اسماعيل كل يوم نعرف معلومة جديدة

عن العريجا وتاريخ العريجا وعن النسب وصلة الرحم بين

اهلنا ناس العريجا

وتحية خاصة للعم الغالى خالد حسين