من ألم المسالك يا زعيم كفارة

بسم الله الرحمن الرحيم

ديوانك مشرعة للضيوف أبوابو

بمناسبة الوعكة الصحية التي ألمت بالخال بخيت إبراهيم الشايقي، وخضوعه لعملية جراحية لاستئصال غدة البروستاتا المتضخمة وتفتيت حصوة في الحالب، جادت قريحة ابني أخته إسماعيل وعمر بهذه المرابيع من النميم، وتم إرسالها إليه وإلى أبنائه بالعريجاء.

إسماعيل قال:

ود الشايقي يا خالنا وكبير العايلة
ياب كفاً متل مطر السحابة الشايلة
يواليك ربي بالعافية وتدوم في الزايلة
ترجع للعقاب، تحَجَى وتعَدْل المايلة

وقال أيضاً:
يا ود البكفي الديش سلات ومرارة
ياب سدراً ملان حكمة وصمود وجسارة
بتعَـدْل الـعَـــــوَج، والفتنـة تكتـل نارا
من ألـم المسـالك؛ يا زعـيـم كفـارة

أما عمر فقال:
ديوانك مشرَّعة للضيوف أبوابو
رُكَّازة الضعيف دايماً غطاهو وكابو
المرض صوَّب عليك نشَّابو
يشفيك الإله يا الخال تكون في رحابو

وقال أيضاً:
يا الخال الحنين ليكا بنقول كفارة
الحارَّة التجي ياكا البقود تيَّارا
قدورك للضيوف دايماً مشعللة نارا
يشفيك ربي من العين ويطفي شرارا

ردا على رسالة ارسلها لى الخال ابومسلم فى مرض جدى بخيت ودالشايقى قلت ليه:
ودالشايقى يابونا الديمة نيتك صافية
معروف بالكرم وماهى نفسك جافية
اسأل ليها الكريم يديم عليها العافية
وما تضوق التعب يارب دوام متشافية