السلام عليكم

عدد المساهمات : 5 تاريخ التسجيل : 02/10/2011

أهلنا ناس العريجاء سلامات والله الواحد فرحان بالحيل إنو اتواصل معاكم وانشاء الله تواصلكم يمتد لأهلكم في النوبة و التكينة

مرحب حبابك حباب جنى ود حالة حبابك

حجلا فى الرجال سملول بسوق فرسانا

شقاق للخشش قناص خبير نيشانا

ساعات الخمج جنبا سليط بى شانا

وقت المكرمات دخرينا دخرى عشانا

مرحبتين حبابك حباب المقداد ود عبد الرحمن ود بابكر حبابك لى عقابك يا البخيت ترابك

اتفضل خش لجوة على راكوبة اهلك العراجة الراكوبة مرشوشة ومكشوشة والجبنة مدورة

اتفضل اقعد على الهباب الوسيع داك وانت ماك ضيف سيد بيت ودار اتحكر تب وسمعنا نمك

يا جنى ود حالة وورينا ابداعاتك وقفشات فى راكوبة اهلك العراجة نحن سعيدين بوجودك معانا

وربنا ادوم التواصل انشاء الله

حباب ولدنا المقداد، المحسي ود دحالة، سيد الخيل الصهّالة، والإبل الوقّالة،،،

حباب ود النوبة، سيد الناقة الحلوبة، والحُزّامة المكروبة،،،

حبابك، يا أب خيراً مو دابك، يا النصيح تيرابك، في بيتك وبين أحبابك،،،

عمك إبراهيم بابكر (عليه رحمة الله) كان من أعلام العريجاء، وكان ابنه عمر (بقادي) من أميز شبابها، الذين يسرجون صهوة السماء ويلجمون شدق الليل،،،

النوبة بلدنا، والتكينة بلدنا، ومواطن المحس كلها تعتبر ديارنا وديار أهلنا وعشيرتنا،،،

أنا شخصياً عضو قديم في منتديات التكينة، أما النوبة فلم يحصل لي الشرف حتى الآن!!

أبقى داخل لي جوة يا المقداد، وأدينا قبسات من روائع قلمك، وإشراقات مما تجود به قريحتك،،،

والمرة الجاية جيب لينا معاك أخوك معاوية،،،

أخوك إسماعيل البشير (أبو المقداد):ــــ

أبو المقـداد بشوفو الليلـة جرَّ قصيـدو
والعين أم قِضَية إن شاالله تب ما تصيدو
ضرغام العرين باسط الضراع بوصيدو
ينشر في الشعر لامن يفضي رصيدو

» الف مــــــــــبروووووك يامسـلم
» سلام عليكم
» السلام عليكم
» الاحباب عيد مبارك عليكم
» السلام عليكم أبيات وحكم