فيك تروح الروح وأنا عندى زيك كم

يانى أنا
راجياك لا تقلق لو غبت تسعة سنة
ويوم بالسلامة تعود تلقانى يانى أنا

لا غيرتنى ظروف لا ريدى صابو عنا
لا قلبى شالو سواك لا عنك استغنى
تلقانى منتظراك فوق نار ومستنى
والله غير لقياك ماعندى تانى منى

كل ما يجينى الليل انا ببكى وإتالم
تلقانى سارحة معاكا وبى لقاك بحلم
مالك قليبى هواكا وجارى مجارى الدم
فيك التروح الروح وأنا عندى زيك كم

طال الزمن بالحيل وانا قاعده مستناك
وبرجاك وما بندم وانا عمرى كلو فداك
بس يوم تعود ارجوك لا تسيبنى تانى وراك
يا أقعد إنت معاى يا اما سوقنى معاك

سألونى عنك يوم وعن غيبتك العزال
قالوا لى فت خلاص غبت وبعادك طال
زول من رحل خلاك لا جية لا مرسال
وكتين نساكى وفات خاتاهو لية فى البال

قالوا لى انسى خلاص زى ماهو برضو نساك
صهين يكون مشغول بى واحدة تانية سواك
إبتسمى للايام تلقى الزمن ضحاك
خطابك إنتى صفوف الاف بتتمناك

ريدت حياتى بقت مقرونة بى انسان
رابطنا فد شريان ساقينا ريد وحنان
بيهو بنعيش احباب فى رقة واطمئنان
ويصبح مصيرنا الموت يوم ينزف الشريان

خلينى فى جواك لا يبقى بينا عزول
نوم مطمئن وارتاح واسمع خلاصة القول
لا مال بغيرنى لا إغراء بينا يحول
لا بيملا عينى سواك لا تانى بعشق زول

همش كلام الناس زى ما جا خلى يفوت
واسمع حديثى عديل لايجيبوا ليك ملفوت
ما ناسيه عهدى معاك جوه الفؤاد منحوت
ويوم ارتبط بسواك انشاء الله قبلوا اموت

للشاعر علاء الدين ابوسير

» قبضه الروح