محمد عنتر
عدد المساهمات : 1362 تاريخ التسجيل : 25/01/2011 العمر : 42 الموقع : الامارات-ابو ظبى
| موضوع: رحلة السحلية المريرة الى الخرطوم ووفاتة الثلاثاء 07 فبراير 2012, 3:18 pm | |
| السحلية كلمات : خالد شقورى
مناسبة القصيده انه وجد سحلية وهو يحضر مباراة في دار الرياضة بام درمان وجري الحوار هناك
خليتي الجناين والريف والخلا وجيتي علي المدائن يا كافي البلاء معقول علي طول الفلاء ما لقيتي هدايا يقولك أأأأأأأ السحلية لا كونوك تجي المدينة دي ماها المشكلة لكن القي شخصك في دار الرياضة وسط الملاء تبقي دي ياها المصيبة وياها المشكلة وده الخلاني يمة بقيت كوم اسئلة ردي ولاتخافي الخلق ديل منك بعاد وبعاد فرق في باصات عصام وفي ركنية رزق وفي كورة عماد الدقت في الحلق ناس احساسها كلو في العين والخلق تعاين للحكم يغلط عشان تنق ناس شايلاها شيمة وجاريها العرق ناسا عايشي دايشي وهما تنطلق ردي ولاتخافي الخنق حالي انا زي حويلك وباقي علي الشنق لو مرقتي قولك ولبستي الصدق في البلد ام حكاوي ببقالك رفق بحجاك وبجيرك من عين الخلق مثلك زول مدردح وجاري ورا الرزق قالت لي انا قبل ابدأ وفي القول ابقي ماضية دايره اسأل سؤال ؟ ليه الخلق دي كلها واقفة راضية مع انو المقاعد كلها قاعده فاضيه قلت لها صمي خشمك يا أم قلبا حنون الزول مابيلومو من بعد الجنون قالت لي زين خابراك مين تكون رغم انك مبدل ولابس البنطلون وبحيلك حيويلتي عشان حالك يهون : هاك مني الحقيقة واسمع ولا تبالي من تبيت وقمت حالي انا ياهو حالي بينات الشقاية والطير والسحالي القي القاسمو الله في القش والعوالي سالمة مسالمة يابا والحن من خصالي وريد خلق الله لينا خلا جنسنا غالي عايشة علي المحبة وما بتعب كتير وان بالغت فت بس حدي الحفير وطول اليوم اغني مع لحن الخرير اعاين لي محمد يقاوم في الهجير وبي طوريتو يقدح مرتاح الضمير ياهو ده حال محمد المر الحلو ديمة ده ياهو حالو وانا بتاملو عالي وقدرو عالي وانا بتاملوا لكن انت عارف محال من يوصولو والايام تمر والحال جد في جد بينهم وبين الفة لا غل لا حسد وفب بوما ماني خابراهو يبقالي الأحد جوهو ولاد عمو زائرين البلد هدومن زي جليدي وعاد مشدوده شد ولونهم خلو ساكت سوالي العقد كلامن زي سلامهم وتب ما ليهو حد الواحد تلقي يسأل وما بيرجالو رد موهن زي محمد بينهم وبينو سد وغايتو بس الرحم حبلو حبل مسد محمد ساقو يوم في بت ياولد واخيرا خلا شغلوا واتيقن رقد سافر بي خيالوا وعقلو بعيد شرد واتذكر ابوهو ود عبد الصمد يوم ناداهو قالوا محمد ااا احمد الواطة الشمس الكرو والكرد وان فارقت يس يختاك السعد وتاني رجع خيالو وشاف ولاد عمو يصورو في الجناين الراويها دمو يدقس وتاني يصحي يلاوي النوم يعمو وبين فرحوا وشقاهو هبت نسمة هادي نام ووجيهو فوق طرف الفرحة بادي واحد في البططن ختا كمرتو غادي وشال براحه منو طوريتو الوسادي خل سيرة محمد تعال شوف الولادي : فتح الموية ساكت في الواطة السهيلة وعاد قدر اليعرفو دار يسقي النجيلة قولت دق يمين طفر خاوي سيلها وشال قش البهائم وغرق كم شتيلة لو مو محمد كان وصل الحليلة محمد قلبو طيب لم كمرتو ليهو وشاف حالو المبشتن بقي يضحك عليهو قالوا الزول بيحفر بي راسو واديهو والطين موهو قاسي بس كيفن تجيهو وكان شفت حالي حالا ليهو يرتو كل ما أمشي اساسق القي الموية تحتي ولم الحالة ضاقت والحل ما خبرتو لقيت كمرتو عائمة وخشيت في كمرتو ولم الغيبه صدو ورجعوا الدار براهم محمد خلو يقرع وانا صديت معاهم قلت القي طريقة امرق خفت اضوق ازاهن وخاصة ان شافني واحد يقول ده دبيب وجاهم قلت الليلة ابيت وبكره اصد معاهم وانزل في بيوتنا واسلم من اذاهم لكن المصيبة امر من الأمر تعل شوف الحقيقة وشوف حكم القدر تاريهم يستفوا ناوين السفر وبدري مع الصباح بكرية الاحد ودعوا دار ابوهم ود عبد الصمد بي ثانية ودقيقة البص ابتعد وعصرا بدري طبه في البلد ام نكت قاعده اسبوع في شنطة لاقوت لاهبوب اكل في الكريمات واقرش في الحبوب وعاد صور البنات مالات الجيوب مرقت انا من كمرتو وخشيت في قميصو البمبي المطبق خاتو عشان خميسو يساسق حفلة حفلة مع ناسا ينيصو واخير لي الشنيطة ضقت وجع رقيصو والليل والنهار جابني هنا الحنون في شمسا يمين جمبو النار تهون في اول دقيقة جايبين فيهو قون خلو عظامو ترجف يفتش في الدرون قلت دي فرصة والكاين يكون : بقيت اقرض قميصو وقلت اقددوا وبراحه انزلق ومشيت فوق مقعدو ولقيت القشر في البيلبدوا وقبل اندس سمح شافتني العيون وعينيك الشقية بتعرف كل لون وقبل تتم كلامها واحد جابلو قون وخلا الناس تنطط وهاجت في جنون وضاعت من عيوني وبقيت انا ما ببالي اكورك ااا الحنيني لو تسمعي تعالي لاغايت الكورة تمت ماردت سؤالي ولما الداره نضفت لقيت بت السحالي ميتة شهيده راقده وماتت موت مثالي وشلتها بي جريده وهناك في ركن خالي دفنتها يا خساره بي قشر التسالي ودفنتها يا خساره بي قشر التسالي | |
|
ابو ممدوح
عدد المساهمات : 807 تاريخ التسجيل : 23/05/2011 العمر : 53 الموقع : السودان
| موضوع: رد: رحلة السحلية المريرة الى الخرطوم ووفاتة الخميس 09 فبراير 2012, 3:05 am | |
| | |
|