رحبوا معى بالعضو عبدالله بدوى المحسى

الف مرحبتين بيك يا المحسى فى دارك ودار اهلك العراجة ومرحبتين حبابك أتفضل خش
لجوة الدار دارك والبيت بيتك أتفضل على الراكوبة مرشوشة ومقشوشة والهباب الوسيع
والجبنة والبن وريحة القلية وأهلك الطيبين دحين يا ود المحسى اتهوض على الهباب
وشم ريحة القلية وقبل ما اطلع البكرى الماخمج سمعنا نمك وفرج علينا ربنا افرج همك
ويا ود المحسى المنتدى منتداك دحين يا اخوى نحن فى انتظار مساهماتك وابداعاتك فى المنتدى
ومنك نستفيد ..... وماتنسى تعرفنا بنفسك اكتر

’,، أهلاً .. وسهلاً .. ,’،

,’، (( عبد الله المحسي )) ,’،

,’، نحن سعداء بتشريفك لمنتدانا
’,، فأهلاً بك عطْراً فوَّاحاً ينثرُ شذاه في كلِّ الأَرجاء ,’،
,’، وأهلاً بك قلماً راقياً وفكراً واعياً نشتاقُ لنزفه ’,،
’,، وكلنا أملٌ بأن تجد هنا ,’،
,’، مايسعدك ويطَيِّب خاطرك ’,،
’,، فِي إنْتظَارِ هطولِ سحابة إبداعك ,’،
,’، نتمنى لَك التوفيق ومزيداً من التوهج ’,،
’,، تَحيّاتِي وَتَقْديرِي ,’،

حباب أخونا عبد الله بدوي المحسي الأصيل، حبابك عشرة، ومس كاغنا، ودبايوا، وكتيوة... الأولى دي حقة المحس، لكن الاتنين التانيات ديل حقات الهدندوة...

مرحب بيك يا عبد الله في منتدى أهلك العراجة، وإنت شرفت المنتدى، ونورت الديار، والعريجاء بشكل عام أهلها خليط بين المحس والكواهلة، وقبلك كان معانا عضو نشط محسي سكوتي من قرية مجاورة لمدينة عبري، اسمه (مبارك خليل ساب)...

أتمنى أن تكون أنت صديقي وزميلي السابق عبد الله بدوي، الرجل البشوش، الذي لا تفارق الابتسامة شفتيه، والذي حفظنا منه قصيدة (عديلة) ورددناها معه في غرفتنا حين كنا في سنة أولى جامعة، وكنا نسكن في داخلية (مروي) التي حولوها أخيراً إلى عيادة أو Clinic

مشلا فينتان تلي جفينا
أمون صفيح مولار كفينا

عدد المساهمات : 298 تاريخ التسجيل : 13/02/2012

اهلي واحبائي اهل العريجا اتشرف بمعرفتكم جميعا .اعدكم بانني سوف اكون على تواصل معكم مستقبلا .الاخ اسماعيل انا عبدالله بدوي بشحمه ولحمه وبارك الله في التكنلوجيا .امس اشتقت ليك شوق السحاب الراحله وادخلت كلمه اسماعيل البشير جامعه الخرطوم في محرك البحث وقلت انا وراك انا وراك .واتزكرت الايام واالزكريات قبل 31 عاما (اكي جله اكه مشكا)

عبدالله بدوي المحسي كتب:: اهلي واحبائي اهل العريجا اتشرف بمعرفتكم جميعا .اعدكم بانني سوف اكون على تواصل معكم مستقبلا .الاخ اسماعيل انا عبدالله بدوي بشحمه ولحمه وبارك الله في التكنلوجيا .امس اشتقت ليك شوق السحاب الراحله وادخلت كلمه اسماعيل البشير جامعه الخرطوم في محرك البحث وقلت انا وراك انا وراك .واتزكرت الايام واالزكريات قبل 31 عاما (اكي جله اكه مشكا)

يا حليلك يا عبد الله بدوي وحليل أيامك التي لا تنسى، أتذكر إذ كنا في سنة أولى جامعة، في تلك الغرفة الجميلة في داخلية مروي ومعنا الأخ بشير أحمد إسماعيل أو بشير (المان) بتاع بارة، وكنا نردد سوياً أغنية عديلة، بعد أن حفظتها لنا جميعاً وشرحت لنا تلك القصة الجميلة التي كانت سبباً في تأليفها (ألي لقل جغرافيا سأبة منو، ألي لقل أستاذ لتونا منو... أستاذ مهمد رشيد لتونا منو) وكيف أن ذلك الشاعر العاشق قال لخطيبته: إن شاء الله ما تقدري تدخلي إلا المدارس الكرور: الابتدائية في صاي، والمتوسطة في عبري، والجامعة جوبا.... زي ما قال أحد الظرفاء عن دراسته: قال أنا قريت الأولية صغرى، والوسطى شعبية، والثانوي معانة، والجامعة جوبا....

أتذكر يا عبد الله يوم زرتني في مكان عملي بمدينة الرياض عاصمة السعودية في عام 1984م، وكان معك شقيقك (عكاشة)، وذكرت لكم قصة الحديث النبوي (سبقك بها عكاشة) وإنت كان ليك تعليق ظريف على قصة الحديث دة ؟؟!!

والله يا عبد الله زي ما قلت بارك الله في التكنولوجيا، بالله استخدمت محرك قوقل للبحث عن صديقك القديم، ونجحت في الوصول إليه، والله حكاية عجيبة.... (إكى جله اكه مشكا... أوري غريسكا اكه جله... اكه كاجرين نايغا ككه... كنفديلة) معليش لأني لا أعرف لغة المحس فأنا أكتبها كما يتفق (على عواهنها)

» رحبومعي بالعضو محمد عبدالله حبيشي
» رحبوا معى بالعضو سيف 2008
» رحبوا معى بالعضو اشراقة
» رحبوا معى بالعضو كيوات
» رحبوا معى بالعضو طارق النور