مسدار شدر الهوير

مسدار شدر الهوير

بريقـاً رفَّ مـن جيهــة العريجـا ولالا
خلَّى الدمعـة تذرِف... و الفُـراش ملالـة
حليـل شـدَرات هوايـرنا الوريفـة ظلالا
ونفوساً طيبـة ما بْتعرف تقول ليـك لالا
*****************

حليل شـدر الهوير... قالولنا نوَّر وخـدَّر
وساق الضل بعيد.. والخور طمَـح واتحدَّر
حليل القـام دغيش، سند التقـانت وبـدَّر
حليل الديمـة طربان .. لا زِعِـل لا اتكدَّر
*****************

يا شَـدَر الهوايـر يا النصيـح تيرابـك
حليـل زمَناً قبيـل يـوم كنا فوق ديدابك
قالوا هَرَج سَماك، وحَلَب شَطورو سحابك
وغَصَّـانك رمَى النوَّار وطَـالَ واشَّـابك
*****************

يا شـدَر الهـويـر الخَـدَّرتْ أوراقـك
مفرهِد وضاربة في باطْنَ الأرِضْ عَرَّاقك
قالـوا عَمَـر سحـابك ورفرفـن براقك
واا شوق الغريب الطَّـال عليهـو فراقك
*****************

يا شـدَر الهوير، يا الديمة ضُلَّك سايق
عِلْقَت روحي فيكْ، والدمعة فوق المايق
مفتون بالجَّـدِي الضَّارِبْ خمايْلَك فايق
وصابِر منو فوق حَرْبة، وتمانية طَبايق
*****************

يا شـدَر الهوير الفاح عبير كافـورك
نسايمك منعِشة، وللحَجْرة مليان خورك
حليل زمناً قبيـل، يوم كنا يوت بنزوك
نخيِّم في الحِمَى ونسمع نشيد عُصفورك
*****************

الخـور إنمـلا... وبالحيل طمَـح تنِّيلو
والشـدر الكُبار طـاب للجماعـة مقيلو
حليل أهلي الحنان كل زول ضميرو دليلو
في لقا في محـل، بسخى وبجود بالهيلو
*****************

يا عريجتنا يوت واديـك مخـدِّر زرعو
شدرك في الهوير شايل الثمار في فرعو
وابل الخير عليك باهِل، محفَّـل ضرعو
فارسك في أم عجاج هزَّ وقدَل بي درعو
*****************

ديار أم زين تهـب أنساما ليْ.. وتطيـب
طريت أيامـا، والثمــر المدلِّي رطيـب
طريت القمري واقف فوق غصونا خطيب
والنُّـوَّار فقــع طلق العطـر والطيـب
*****************

شمَخ شدر الهوير، في الحلة فكَّ نسيمـو
وفريق ناس ود اللعيسر، قالوا فرهَد نيمو
الخلَّى قليبي ولهـان، بي غزالو وريمـو
فوسيب كبد اللتيـم اللتـردم هضليمــو
*****************

الجـاب الخبـر قـالْ لَيْ بلدكـم خَـرَّف
وشدر الخور شمَخْ وأصبح هَويرو مَسَرَّف
وناس الحِلـة مرقـت للدُّعـاش تتكـرَّف
حليلك يا العريجـا البي هـواك نتشـرَّف
*****************

شدر الخـور عِلا، وعسَّف عبير نسَّامـو
والمسكيـت كجـر، قفَّـل ورا وقدامــو
مكلـوف (جرجير)المعاصـي لجـامــو
حليـل زمنـو البلاقينـا، وحليل أيامـو
*****************

روعة وابداع ياخال والله ياخال شوقتنا للهوير وشجر الخور والعصريات فى الهوير نمك سمح
ومجية يا الخال . وانت رايع ولله درك وانت تتغنى فى اجمل بقعة فى الجزيرة شجر الخور
الجميل وامسيات الخور الرايعة الخضرة والموية وناس العريجاء الطيبين مجمعين تحت
ظلال الاشجار وصوت الطيور والضحكة والبسمة

ودالحبيب قال
الهوير يالفيك نبت شجر السدر
ويالحبي فيك من صقير كبر
ياللامي كل الحيوانات والعايش فيك الجقر

مسدار الهوير ابداع ادهش زوقنا
خلي الزكريات يوماتي تعرض فوقنا
الخور زي بحر دافر مراكب شوقنا
لي تال البلد الجاريه جوه عروقنا

» مسدار سلام دار فور
» مسدار النصيحة
» مسدار أبو الهيثم (فضل المرجي)
» مسدار المزيرة (مزيرة فضل الله)
» مسدار السلفية الملتزمة