| | فش الغبينة |  |
|
|
| كاتب الموضوع | رسالة |
|---|
أبو مصعب
عدد المساهمات : 298
تاريخ التسجيل : 13/02/2012
| موضوع: فش الغبينة  الإثنين 21 يناير 2013, 6:11 am | |
| وردتني هذه القصة من صديقي الفاضل / علي الحسين قبل مدة إن عجبتكم أرجو دعواتكم وإن لم تعجبكم أرجو مسامحتكم .
قرر حاج صديق وهو (معاشي) من سكان أركويت بالخرطوم قرر أن يستثمر جزءا من المكافأة ويفتح صالة للبكاء . يذهب إليه كل من يريد أن يبكي ويفش غبينتو . كتب في دراسة الجدوي أن المغتربين من الشعب السوداني رجالا ونساءا يحتاجون إلي صالات واسعة لكي يتنفس ويبكي ويبكي ويتشفي ويندب الحظ السيئ ... ولكي يلطموا ويجعروا ...
قال له صديقه وجاره مأمون : إتوكل علي الله يا حاج صديق وأعمل المشروع ده وأوعك تتردد .. والله تكسب دهب كمان تفش غبينة الناس دول وتكسب أجر . أول حاجة تعمل ليك قسم للناس الكبار في السن لأن غبينتهم شديده بالحيل وقسم لي ناس الصالح العام .. وقسم لي ناس الركشات .. وأهم قسم في غرفة خاصة للمغتربين وخليهم يدفعوا بالدولار أو في أسوأ الحالات بالريال السعودي . الريالات التانية حقت ناس قطر وسلطنة عمان وأبوظبي ما تقبلها ... وما تنسي الطيارات الوقعت وأهم حاجة ناس السدود بالذات ناس (كجبار المحس ) ودال يجوك من الكلاكلة ومناديل الورق كان جبتها بالدفار ما حتكفيهم حاج صديق مشي للفاضل السمسار في شارع جوبا في سبيل إيجاد مقر للمشروع (بيت البكاء) .. والله با الفاضل أخوي أنا عايز لي بيت كبير .. كبير جدا.. يا حاج صديق أنت ما ساكن في ملكك عايز شنو بالبيت ؟
يا الفاضل أخوي أنا ما عايز البيت للسكن .. عاوزو تجاري !!
قصدك مخزن يا عم صديق ؟؟
مخزن شنو يالفاضل .. عاوز أعمل بيت بكاء !!
بكاء شنو !! المات ليكم منو !! ما تدق ليك صيوان في الشارع وخلص نفسك ..
وما أن أنتهي حاج صديق من شرح المشروع حتي بادره السمسار :- والله دي فكرة بت ستين كلب . الشعب كلو عاوز يبكي ويتفشي ومالاقي ليهو طريقة .. والله أنا أول زول بجي بفش غبينتي .. ناس المحلية مغصوني جنس مغصة .. كل يوم رسوم وضرائب وزكاة ..
المهم أنا عندي ليك بيت كبير ولقطة جنب البلابل . ستة غرف وصالة وحمامتين .. بس يا الفاضل ما حيكون في إزعاج للجيران وبعدين نخش في إشكالات مع ناس النظام العام ويجو يكشونا ؟؟
إزعاج شنو يا حاج .. أنا حأعمل ليك عوازل ضد الصوت عشان الناس تبكي لامن تقول كفاية .
بعد أن عاين حاج صديق للبيت وأبدي إعجابه طلب من السمسار بإحضار سباك يعمل في كل غرفة حوض غسيل وحنفية ويوصلو بالسايفون عشان الزول بعد الجعير والتفشي يقوم يستغفر الله ويغسل وشو ..
دفع الحاج مقدم الإيجار للسمسار تلاتة شهور ورجع البيت شايل ترخيص وعقد إيجار .
يا نفيسة !!! نفيييييسسا ...
أيوة ياحاج ..في شنو ؟؟
خلاص لقيت بيت البكاء ودفعت الإيجار ...
أها يا حاج .. كان كدة ما فضل ليك إلا الزبائن .. والله يوم الإفتتاح حأجيب ليك نساوين الحلة كلهم يحرروا ليك البكاء جنس حرير . أعمل ليك جنس إفتتاح ياحاج .. وووووب وأحييا ما تديك درب . ناس كلتومة عندهم أتنين ماتو في الجنوب .. حليمة راجلها عمرو 39 نزلوه الصالح العام.. ورقية بت التومة أختها زرعت الكلية في الأردن وماتت في الطيارة الأتحرقت !!!
كفاية يا نفيسة ... إنتي عايزة تطرشقي لي المشروع من أول يوم .. إنتي ما عارفة الإختلاط ممنوع عايزة تجيب لي نسوان كمان يبكن ويتشخنفن قدام الرجال ؟؟ في هذه اللحظات يستيقظ حمادة الطالب في الجامعة من النوم ويتمطي ويذهب نحوهم : والله يا أبوي أجيب ليك كترة جكسويات ... شواكيش سااااااااااكت ... وبالمناسبة يا أبوي عشان نحل إشكالية الإختلاط أحسن نعمل الغرف للرجال والحوش للنساوين !!
تتدخل الحاجة نفيسة : لا.. أنا رأيي كل ناس (غبينة) نعمل ليهم قسم بي حلو.. يعني ناس الصالح العام براهم وناس الحور العين براهم ..وناس الطيارة براهم ..طيب المغتربين ؟ المغتربين يكونو مع ناس الركشات .. وكمان يا أبوي في ناس عندهم (double gabina) يعني زول شالوه الصالح العام قام جاهو ضغط.. أو مغترب عندو ضغط وسكري .. قبل الإفتتاح بيوم تم الإعلان في الصحف المحلية لزوم الدعاية: يتم في الساعة السابعة مساء بتاريخ 05/07/2008 إفتتاح محلات فش غبينك .. صالات مكيفة تحتوي علي عوازل الصوت للبكاء الحار والسكلي والحي ووووووب .. يوجد قسم خاص للنساء والمحل مزود بمناديل الورق وأحواض الغسيل والبراطيش والجزم والشباشب القديمة لزوم اللطم .. الأسعار في متناول الغلابة .. السعر ألفين جنيه بالقديم .. البندول مجاني وكذلك البصل لزوم الإفاقة في حالات الهستيريا.. لم يصدق حاج صديق وهو يري أفواج المواطنين تتداعي نحو المحل .. إضطر لطلب عدد من قوات حفظ النظام العام لتنظيم الصفوف . إنتابت بعض الواقفين خارج المحل حالات الإجهاش البكائي قبل وصول البوابة الرئيسية وغرف البكاء .. عندئذ طلب حاج صديق من رجال الأمن بالسماح للذين علي (الهبشة) للدخول أولا.. صار المتماسكين قليلا يحتجون . يا جماعة شوية .. ناس الطيارة يجو بي جاي .. ناس الصالح العام عشان عددكم كتار خليكم بي هناك في الصف داك .. المغتربين تعالو بالباب الخلفي عشان ممكونين شديد..المغتربين دورو شكلة .. ناس مشروع سندس بي جهة وناس المطاعم في شارع غبيرة بي جهة .. الأمن يتدخل ..
في اليوم الأول إمتلأ المحل (FULL) ألو حمادة ؟؟ أغشي السوق المركزي أشحن بصل زيادة .. حالات الإغماء في إزدياد.. جلست الحاجة نفيسة في كاونتر النساء بينما جلس زوجها في كاونتر الرجال .. يدخل المواطن في غرف فش الغبين ويخرج محمر الوجه متورم العينين مستريح الأعصاب بعد أن قام بفش غبينته .. بعد أن رأي حاج صديق الغباين المختلفة لكثير من الحالات وسمع الجعير والسكلي والنحيب لم يعد ينظر إلي الربح بقدر نظره إلي خلق جو بكائي مثالي مما جعله يحدد يوما في الأسبوع مجانا وبكاء جماعي مرة واحدة وذلك لغير القادرين علي دفع الرسوم .
بعد ثلاثة أيام دخل عليهم شخصان يحمل أحدهما كاميرا والآخر دفتر وقلم .. نحن من جريدة الإثارة وعايزين نعمل لقاء.. تقدم حمادة إليهم ورحب بهم وجلس معهم في الكاونتر .. طلب الصحفيان المرور في الغرف والصالات المختلفة ليروا كيف أن المواطنين (يفشو غبينهم) هذه صالة الغبين الجماعي .. في هذه الصالة أكثر من مائة شخص من مختلف الأعمار ينتحبون بطرق مختلفة منهم من يبكي بحرقة ومنهم من يتمتم ومنهم من يلطم وجهه ويصيح بهستيريا.. وقف الصحفي بعيدا قرب المدخل وهو يتابع هذه الحالات التراجيدية وصار ينظر إلي أحد المواطنين يضرب رأسه مع الحيطة بحرقة وهو يجهش بالبكاء ويردد :
أنا مالي ومال كدة !!!
أنا ملي ومال كدة !!!
سأل الصحفي حمادة ؟ الزول القاعد يضرب راسو مع الحيطة ده مالو ؟؟؟
رد حمادة :ده أمبارح ناس الضرائب جابو ليهو ضرائب أكثر من راسمالو .. عشان كده بيضرب راسو بالحيطة ..
الصحفي اسمو منو ؟؟؟
ده الوالد صاحب المحل !! حاج صديق..
| |
|
| | |
mohammedmlik
عدد المساهمات : 292
تاريخ التسجيل : 10/03/2011
العمر : 37
الموقع : الدروشاب الخرطوم بحرى
| | موضوع: رد: فش الغبينة الإثنين 21 يناير 2013, 2:22 pm | |
| ابومصعب
متعك الله بالصحه والعافيه بقدر ما امتعتنا بقلمك الحصيف
واستراحتك تفوق الروعه دررا
اصحكتني بقدرما ابكتني فالواقع اسوي والناس تحتاج الي مدن للبكاء
والنواااااااااااااااااااااااااااااااااااااح
شكرا علي كل هذا الالق | |
|
| | |
Ismail
عدد المساهمات : 2548
تاريخ التسجيل : 05/02/2008
العمر : 43
الموقع : aykabulbul@gmail
| | موضوع: رد: فش الغبينة الثلاثاء 22 يناير 2013, 3:40 pm | |
| استراحة رائعة بروعتك يا أبا مصعب، وأروع ما فيها خاتمتها التي حولت الردحي والسكليب لصاحب المحل زاتو....
ولكن هذا الموضوع قد تم نشره بهذا المنبر من قبل، بقلم الأستاذ دفع الله الأمين (ود الأصيل) ربما قبل أكثر من سنتين!!!
أرجو أن لا يكون هذا الكلام قد سبب لك إحباطاً يا عبد الله، فأنت بحق أحد القناديل المضيئة التي تبث النور والدفء في أوصال هذا المنتدى... | |
|
| | |
أبو مصعب
عدد المساهمات : 298
تاريخ التسجيل : 13/02/2012
| | موضوع: رد الأربعاء 23 يناير 2013, 6:05 pm | |
|
أخوي وصديقي أسماعيل مالك تجرجرنا لحدما نجي في عقر دارك ومن أجلك وتعاكسنا في كتاباتنا وشنو الخلاك تمشي تفتش . الحمدلله أنا ذكرت مصدر القصة (صديقي علي الحسين ) في بداية المقال إذن هو يشيل شيلتو . بالمناسبة قابلتو بالأمس قلت ليه :- مالك تديني حاجة بايرة قال لي معليش الدور ده عندي ليك قصة طازة وبالفعل ناولني قصة رائعة ومثيرة أكثر من (فش الغبينة ) بعنوان (جلطة نفيسة) لكنني رديت عليه لا..لا..لا أنا ماداير. وفي الختام شكري وتقديري لصاحب الكلمة المتفردة ود الأصيل
| |
|
| | |
Ismail
عدد المساهمات : 2548
تاريخ التسجيل : 05/02/2008
العمر : 43
الموقع : aykabulbul@gmail
| | موضوع: رد: فش الغبينة الخميس 24 يناير 2013, 2:06 am | |
| | |
|
| | |
أبو مصعب
عدد المساهمات : 298
تاريخ التسجيل : 13/02/2012
| | موضوع: رد الخميس 24 يناير 2013, 1:34 pm | |
|
أخوي أسماعيل آسف حتي ولو الشعب يريد فأنا لا أريد . أين الضمان ؟؟ وماذا أستفيد ؟؟ لو رديت علي هذه المرة قائلا:- قمة في الروعة يا أبو مصعب لكن موضوعك كتبه الأخ أبو ممدوح قبل خمسة سنوات لكن فات علي لأنه كتب بعنوان مختلف. (الله يشهد الموضوع أمامي )
| |
|
| | |
Ismail
عدد المساهمات : 2548
تاريخ التسجيل : 05/02/2008
العمر : 43
الموقع : aykabulbul@gmail
| | موضوع: رد: فش الغبينة الخميس 24 يناير 2013, 4:03 pm | |
| يعني يا أبو مصعب تبقى علينا المقولة البتقول: (البمرق النصيحة ود جار النبي بقلع بلاده)...
أظنك تعلم أخي أنه من الإنصاف أن يحفظ حق من نشر الموضوع أولاً...
وفي بعض المنتديات يتم حذف المواضيع المكررة، فيتم الإبقاء على الأقدم ويتم حذف الجديد!!
| |
|
| | |
أبو مصعب
عدد المساهمات : 298
تاريخ التسجيل : 13/02/2012
| | موضوع: رد الخميس 24 يناير 2013, 5:04 pm | |
|
الحبيب كلو كلامي ده مزح إنت أخدت جد ولا شنو . أنسى الموضوع ده واشرح لي هذه المقولة التي ذكرتها لأني بصراحة ما فهمت
| |
|
| | |
Ismail
عدد المساهمات : 2548
تاريخ التسجيل : 05/02/2008
العمر : 43
الموقع : aykabulbul@gmail
| | موضوع: رد: فش الغبينة الخميس 24 يناير 2013, 5:45 pm | |
| - أبو مصعب كتب:
الحبيب كلو كلامي ده مزح إنت أخدت جد ولا شنو . أنسى الموضوع ده واشرح لي هذه المقولة التي ذكرتها لأني بصراحة ما فهمت (ود جار النبي) هو أحد زعماء قبيلة الكواهلة، وكان ناظر خط (مشايخ الإدارة الأهلية) في عهد التركية أو عهد الإنجليز، ويقولون - والعهدة على الراوي - أنه كان جباراً ظالماً فكل من يشهد شهادة يبين فيها الحقيقة التي تكون دائماً ضده يعاقبه بأن يصادر منه أرضه الزراعية (والبلاد هي حقل الذرة الذي يروى بالأمطار)!!! تعريجة: بالمناسبة أنا اتذكرت محمد محي الدين، فهو كان معنا في داخلية مروي في سنة أولى وربما كان معنا في نفس الغرفة... نعم أتذكره جيداً فهو كان (كبكابة) يعني قرّاي شديد (ترزي بس) بس إنت توهتني عنه باسم بري دا، ولو قلت محمد محي الدين بس لكنت عرفته من أول وهلة... وكمان زميلتنا المحسية بتاعة الأكورديوم برضها اتذكرتها، والحقيقة إنها كانت قصيرة شديد... | |
|
| | |
أبو مصعب
عدد المساهمات : 298
تاريخ التسجيل : 13/02/2012
| | موضوع: رد الخميس 24 يناير 2013, 6:14 pm | |
|
برضو كنت منتظر ردك حول ترجمة الحكمة التي وردت علي لسان مبارك ساب بالرطانة والإنجليزي
| |
|
| | |
Ismail
عدد المساهمات : 2548
تاريخ التسجيل : 05/02/2008
العمر : 43
الموقع : aykabulbul@gmail
| | موضوع: رد: فش الغبينة الخميس 24 يناير 2013, 6:22 pm | |
| - أبو مصعب كتب:
برضو كنت منتظر ردك حول ترجمة الحكمة التي وردت علي لسان مبارك ساب بالرطانة والإنجليزي مش لما أعرضها أول على مبارك ساب وأشوف ال feedbak بتاعه!!! | |
|
| | |
| | فش الغبينة | |
|
