يللا نفرح المنتدي

عدد المساهمات : 298 تاريخ التسجيل : 13/02/2012

لكي نفرح هذا المنتدي الرائع المحبوب والحزين في نفس الوقت قررت أن أكتب آخر نكتة سمعتها قبل لحظات من أحد أصدقائي .
في واحدة ماشة في جنازة زوجها وهي تولول وتبكي بأعلي صوتها .. حي ... وووب .. زوجي ورفيق دربي تخليني لمين .. يا جمل الشيل ..أنا مستحيل أعيش بدونك .. مين يحميني .. مين يشيل حملي ..
فجأة سمعت راجل يسير من خلفها وهو يقول :- ياريت لو أدوني المرا دي المخلصة لزوجها ..آه بس لو أعرف عنوانها أعرسها وأنسيها زوجها .
علي طول المرا شبكت ..وآآآآآي يا راجلي يا السبتني براي في جبرة .. مربع 20 جمب الفحص الآلي..عمارة ناصية حمراء .. الدور الرابع ..شقة 12 آآآآآآآآآآآآآه .

لقينا البديل، ونسينا العويل...
عنوان على الهواء مباشرة، وعلى عينك يا تاجر، واللي ما يشتري يتفرج !!

ما أروعك يا أبا مصعب وأنت تجوب كافة أنحاء هذا المنتدى لتنثر فيها الروائع والدرر، رغم قلة الرواد، وجفاف المداد...

لا عدمناك يا رجل، لكن الفيسبوك عمل في المنتديات الالكترونية ما لم يعمله ريكرياتيفو لوبولو الأنغولي وسيوي العاجي في أنديتنا المغلوبة على أمرها...

موضوع: بسيطة الإثنين 15 أبريل 2013, 3:26 pm

في إعتقادي حل هذا الموضوع سهل جدا . لذا إقترح بكل جدية أن ننسحب نحن الكبار ( أقصد سنا) -لكن إنت ما معانا - لنفسح المجال للشباب وعلي رأسهم هذا الشبل الرائع المجتهد ود عنتر ويمكنهم التواصل من خلال هذا المنتدي من خلال الدردشة المتاحة بالمنتدي بدلا عن الفيس بوك بالإضافة لمساهماتهم بالكتابة في هذا المنتدي الجميل فهم جيل المستقبل.

الماعندو كبير اشوف لية كبير !!!!!!!!!!!!!!!!!!!!!!!!!!!!!!!!!!
وين تنسحبو يا ابو مصعب انتو الساس والراس انتو الخير ولبركة انتو
الارشاد والتوجية والتوعية انتو كل شئ وبدنكم لا نسوى شئ

موضوع: رد الأربعاء 08 مايو 2013, 1:06 am

صديق عزيز يحكي لي نكتةقبل لحظات بالجوال ٌقال :- في واحد سوداني بخيل يدعو ويقول: ياريت لو لقيت مليار وخمسة وعشرين مليون .. سألوه طيب الخمسة والعشرين دي شنو ؟ قال :- حق زكاة المليار ...

القدالي والقلابة والمالوفة

بمناسبة القلابة والقدالي دي أحب أحكي ليكم نكتة وقعت بالفعل....
زمان لمن كنا نقرا في المناقل كان عندنا زملاء من مدرسة (أم دكَّتْ الجعليين) الواقعة بين العزازي والقرشي... وكان أولاد القرى المجاورة يأتون للدراسة بمدرسة أم دكت على ظهور الحمير، كما كان حال أبناء القرى المجاورة للعريجاء، مثل القوز والرضيمة والشقلة والنو وطرطشت...

واحد من أولاد القرى المجاورة طرده الأستاذ من المدرسة، بسبب خطأ فادح ارتكبه، وقال ليه: ( بكرة لو ما جبت معاك أبوك ما تجي المدرسة)... وكان الباقي حصة واحدة على نهاية اليوم الدراسي، فقرر هذا التلميذ أن ينتظر أبناء قريته ليذهبوا سوياً بعد نهاية الحصص... فخرج من الفصل وجلس خارجه ملصقاً ظهره على الحائط من الخارج.. وفجأة شاف ليك قدَّالي حايم بالحتة ديك، وهو شايل قلابته في شنطته، طوالي طلع القلابة ورصَّ ليهو تلاتة دربات كده عملهم (مالوفة) وقبض ليهو قبورة وكج القلابة جنب المالوفة، ومشي صنقر جنب حيطة الفصل، وهو يراقب القلابة... القدالي طوالي طار ورك فوق المالوفة، وسرعان ما رأي القبورة وانقض عليها، فانقضت عليه القلابة نافضة عن نفسها التراب وممسكة بالقدالي من رقبتو... هنا لم يتمالك التلميذ نفسه، فصاح بأعلى صوته: (قَبَضَتْ!!)، فأزعج بهذه الصيحة كل من كان في الفصل، وانطلق يعدو إلى أن خلَّص القدالي من القلابة وجاء به عائداً إلى مكانه وهو (يجنِّح) ذلك القدالي، أي ينتف ريش أجنحته، فوجد الأستاذ قد جهز له أربعة من أكبر التلاميذ فانقضوا عليه وأدخلوه الفصل ليأخذ علقة ساخنة ما أخدهاش حرامي في جامع...

موضوع: رد الجمعة 10 مايو 2013, 12:00 am

أسماعيل كتب :-

وهو يراقب القلابة... القدالي طوالي طار ورك فوق المالوفة، وسرعان ما رأي القبورة وانقض عليها، فانقضت عليه القلابة نافضة عن نفسها التراب وممسكة بالقدالي من رقبتو...

أخوي أسماعيل صدقني إنت قومت نفسي عشان ما أفهم ما قلته أعلاه . يا أخوانا رفقا بالقوارير نحن رطانة.

وبمناسبة الطرد في المدارس أيام زمان أحكي ليكم قصة حكاها لي ود عمنا درس بورتسودان الثانوية قبلنا بشوية وهذا الشخص كان معروف بالشيطنة والفتونة إلي أن هداه الله . حكي لي أنه تناول سجارة (كعبة ) في الداخلية وتم طرده من المدرسة حتي يأتي بولي أمره ولأن والده بالشمالية المحس وخاله المتواجد ببورتسودان آنذاك ويعمل في البحرية( رحمه الله ) كان صارما وصعبا جدا.وما كان منه إلا أن يلجأ لسائق كارو كان يعرفه ويجلس معه دائما لتناول الشاى في إحدي قهاوي السوق .بعد أن حكي له المشكلة إتفق أن يذهب معه كولي أمر بعد أن قبض (طرادة ) نظير هذه المهمة .
الملفت في الموضوع أنه لم يبوح له عن نوع السجارة واعتقد ولي أمره المزيف بأنها سجارة عادية .
عندما وصلا المدرسة سمح مدير المدرسة بدخول ولي الأمر أولا . وما كان من ود عمنا إلا الإنتظار خارج المكتب وهو متوجس من مصيره المنتظر .
وفجأة يسمع ليك صاحبه العربحي صاحب الكارو ينطلق من داخل المكتب وهو يصيح :- كمان بنقو .. إنت ما تشوف حال والدك المسكين ونزل فيه بسوط الحصان اللي كان في يده ...

أبو مصعب كتب:: أسماعيل كتب :-

وهو يراقب القلابة... القدالي طوالي طار ورك فوق المالوفة، وسرعان ما رأي القبورة وانقض عليها، فانقضت عليه القلابة نافضة عن نفسها التراب وممسكة بالقدالي من رقبتو...

أخوي أسماعيل صدقني إنت قومت نفسي عشان ما أفهم ما قلته أعلاه . يا أخوانا رفقا بالقوارير نحن رطانة.

طالما أن هذه العبارات ليست مألوفة لديكم يا أبا مصعب، فلك العتبى حتى ترضى...

والحقيقة هي عبارات شعبية موغلة في المحلية (يعني ممكن تلقى ناس من سكان الجزيرة المروية أو منطقة ما بين النيلين الأزرق والأبيض يجهلون بعضها)!!!

القدالي: طائر صغير من فصيلة العصافير، وهو أكبر قليلاً من الزرزور (ود أبرق) ويتميز بذيله الجميل الذي يحمل اللونين الأبيض والأسود...

القلابة: شرك صغير يصنع من الأسلاك ويتخذ لصيد العصافير، ويسميه بعضهم (قلوبية)، وقد سميت قلابة لأنها عند الإمساك بالطائر تتقلب به مراراً لشدة قوتها!!

القبورة: وهي نوع صغير من الجراد يكثر عندنا في فصل الخريف، والقدالي يعشق أكلها، وهي من وجباته الدسمة المفضلة لديه.. لذلك فهي تتخذ طعماً لاصطياده، فتربط في القلابة بكيفية معينة وتدفن القلابة بالتراب بينما تبقى القبورة ظاهرة للعيان ليراها القدالي!!

المالوفة: هي عبارة عن ثلاثة أحجار ترص فوق بعضها، وتوضع القلابة تحتها مباشرة، فالقدالي يعشق مثل هذه الأحجار المرصوصة، ويقصدها من بعيد ليرك فوقها.... وسميت مالوفة أو مألوفة لأن القدالي يألفها ويألف الوقوف عليها ... والله أعلم بالصواب !!

‏ ‏ نكات جميلة جدا اسف علي الانقطاع نسبه لظروف قاسية حرمتنا منكم

عبدالرحمن قدالة كتب:: ‏ ‏ نكات جميلة جدا اسف علي الانقطاع نسبه لظروف قاسية حرمتنا منكم

عوداً حميداً يا قدالة، وليه طولت الغيبة يا الحبيب، ونسال المولى جل ثناؤه وتقدست أسماؤه أن تكون ظرفك قد تحسنت، فعدت إلينا خفيفاً رشيقاً تحلق فوق أجنحة الأشواق تطلعاً إلى نشوة العناق مع الأحباب والرفاق...

أبو مصعب كتب:: صديق عزيز يحكي لي نكتةقبل لحظات بالجوال ٌقال :- في واحد سوداني بخيل يدعو ويقول: ياريت لو لقيت مليار وخمسة وعشرين مليون .. سألوه طيب الخمسة والعشرين دي شنو ؟ قال :- حق زكاة المليار ...

زولك ده يا عبد الله ما عايز المليار ينجرح ولو بمليم أحمر... عايز يستلم المليار شامل كامل صرة وخيط!!

ظروف صعبه
‏‎www.gadala18851.wapka.mobi‎

موضوع: رد الثلاثاء 29 أكتوبر 2013, 11:38 pm

عريس بايخ ومسيخ

في صبيحة العرس قام العريس قبل العروس من النوم
ودخل إلي المطبخ وهو منشرح الصدر وحضر ما لذ وطاب من الطعام
مستخدما أفخر الأواني أجملها وأغلاها
ثم ذهب وأيقظ العروس بكل حب وأدب وحنان
ولم يسمح لها بمغادرة السرير لتذهب إلي المطبخ لتناول الفطور
قائلا :- يانور عيني أنا يشرفني خدمتك فأحضر لها الفطور وهي في سريرها
وبعد أن تناولت الفطور لم يسمح لها بمغادرة السرير لتذهب إلي الحمام لتغسل يديها
بل أحضر لها الماء الصابون والعطر إلي السرير
ثم قال لها ما رأيك حبيبتي نشرب فنجان قهوة في غرفة الجلوس
فوافقت ولسانها تلهج بالثناء ولكن بالطبع لم يسمح لها بأن تحضر القهوة بل حضرها بنفسه
وأخيرا جلس يتونس معها بكل حنيه قائلا :- ما رأيك حبيبتي في كل هذا ؟
فأجابت بكل براءة :- لا أصدق كأنني في حكاوي ألف ليله وليله فعلا كده الحياة الزوجية ولا بلاش
أجابها بكل برود :- دايرك تطبقين ما فعلته كل يوم وإلا سوف تجدين نفسك في بيت أبوك ...

ههههههههههههههههههههههها ها ها ها ها هاهاهاهاها
ده والله ياهو البيان بالعمل البقولوا عليهو زاتو
لقد رسم لها خارطة الطريق، ووضعها على طريق العودة إلى بيت أبيها...
لله درك يا أبا مصعب وأنت تثري المنتدى بمثل هذه الحكايات الرائعة،
بالله زدنا من ذلك يا عبد الله ولا تبخل علينا

موضوع: رد الإثنين 25 نوفمبر 2013, 1:40 am

صديقي أمين عثمان من أبناء نوري حكي لي اليوم حوار دار بين شايقى وجعلي .
الجعلي :- أنت بدخن ؟
الشايقي :- أيوه بدخن
الجعلي :- بدخن كم علبه في اليوم
الشايقي :- إتنين
الجعلي :- وسعر العلبه كم
الشايقي :- 3000ج
الجعلي :- وليك كم سنه بتدخن
الشايقي :- 15 سنه
الجعلي :- يعني أنت بتصرف 6000 ج في اليوم علي السجاير يعني 180000 ج في الشهر يعني أنت صارف في 15 سنه 32400000 ج علي السجاير يعني كان هسه يكون عندك برادو !!!!!
الشايقي :- أنت بدخن ؟
الجعلي :- لا
الشايقي :- نان ويني البرادو أللتك ؟؟؟؟

وهاكم دي من عندي :-
صعيدي قبضوه عن طريق الخطأ مع خليه إرهابيه
سأله القاضي :- ما هي آخر عمليه عملتها ؟
الصعيدي :- بواسير

قال ليك واحدة هدندوية عمرها ما عاينت في مراية .. وبعد ما وصل عمرها 50 سنة مشت الحج، وهناك في السعودية شافت نفسها في مراية كبيرة كانت ملصقة بجدار إحدى المراكز التجارية، فنظرت في المرآة ثم قالت: (والله الوشي دي ما غريب علي !!!)
عارف ليه قالت كده ؟؟؟!! لأنها شافت في وجهها شبه أخواتها وأمهاتها وخالتها !!!

موضوع: الخطيب الإثنين 14 أبريل 2014, 1:33 am

تقدم شاب لخطبة فتاة ودار هّذا النقاش مع والد الفتاة :-
الشاب :- السلام عليكم .. جيناكم
والد الفتاة :- عليكم السلام ورحمة الله وبركاته..لكن هل هذا المكان شايفو مناسب لمضغ اللبان ؟
الشاب :- معليش .. أحيانا بلك اللبان لمن أدخن.
والد الفتاة :- كمان !!!! بتدخن من متين ؟
الشاب :- مرات كده لمن أشرب
والدة الفتاة :- ما شاء الله ... والمصيبة دي بتشربا من متين ؟
الشاب :- لمن إتناول سجارة .. سجارتين كده .
والد الفتاة :- أبوك موقفو شنو ؟
الشاب :- ما بشوف أبويا
والد الفتاة :- ليه ؟
الشاب :- أبوي إتزوج 17 مرا وغايب عننا
والد الفتاة :- يعني أنتو عائلة كبيرة ؟
الشاب :- أعوذ بالله .. قول ما شاء الله .
والد الفتاة :- طيب أمك فين ؟
الشاب :- مشت الجنوب ؟
والد الفتاة :- أنتو من الشمال ليه مشت ؟
الشاب :- زهجت مننا وانفصلت ومشت الجنوب .
والد الفتاة :- طيب عشان نخلص .. نرجع لحكايتك مع السجارة الكعبة ديك ..يعني إنت علي طول تكون مسطول ؟
الشاب : - لا .. لا .. بس لمن ألعب قمار .
والد الفتاة :- ياولدي إنت ما سبت حاجة من المنكرات ..أسألك سؤال أخير عشان تورينا ضهرك .
الشاب :- هو شنو ؟
والد الفتاة :- واللي دخلك في القمار شنو ؟
الشاب : - إتعلمتو في السجن .
والد الفتاة :- كمان فيهو سجن !!!!!! وليه دخلت السجن ؟
الشاب : - مشيت أطلب بنت من أبوها فرفض قمت قتلتو...
والد الفتاة : - خلا ص .. خلاص .. نقرا الفاتحة ....

موضوع: الجعلي الأحد 27 أبريل 2014, 3:48 am

جعلي في سفر جزلانو وقع منو مشي مسجد الموقف بعد الصلاة قام قال ياخوانا أنا على سفر وقروشي راحت مني هسه داير منكم حق التذكرة البوصلني لكن زول ما جعلي ما داير منو قرش . قام شاب قاليهو يا حاج أنا أبوي شايقي وأمي جعلية ممكن أدفع ؟
الجعليي قاليهو ..
اقعد آجنا حرم وقعة أمك وجعتني أكتر من وقعة قروشي .....

عدد المساهمات : 298 تاريخ التسجيل : 13/02/2012

الرسالة الفائزة بجائزة ألطف رسالة عبر الواتس اب لعام 2013 م بالسودان
**********************
اختارت أمس منظمة تراحيب الاجتماعية الثقافية عبر لجنة مكونة من (د.عمر زين العابدين الحسن (أستاذ علم اجتماع) ود.الفاتح على بخيت (أستاذ التاريخ والمهتم بالوثائق) والأستاذ هيثم كابو (اعلامى وكاتب صحافى وناقد فنى) والأستاذ جمال حسن سعيد (ممثل وشاعر وكاتب مسرحى) هذه الرسالة كألطف رسالة لعام 2013 م تم تدوالها عبر (الواتس اب) :

من مسطول لي ولده:
** ابني الحبيب؛ بكتب ليك الجواب دا ونحنا في قمة الشوق ، فلو ما وصلك وريني عشان أرسله ليك مرة تانية.
** أنا بكتب ليك بي بطء لأني عارف إنه قرايتك بطيئة.. والجواب دا حأرسلو ليك مع أخوك عبدالله؛ وهو هسه نايم ونومو تقيل ، فحأخت ليك الجواب في جيبو عشان ما ينساهو ، ولأنو بينسي كتير. فبالله عليك لو نسي يديك ليه دخل إيدك في جيبه اليمين وشيله براك.
** بالنسبة لى أخبارنا كويسين، والجو هنا جميل جداً ؛ ما نزلت عندنا أمطار الإسبوع الفات إلا مرتين بس. المرة الأولى استمرت ثلاثه أيام، والمرة الثانية استمرت أربعه أيام متواصلة.
** بالنسبة للبدلة الطلبت أرسلها ليك لقيت تكاليف شحنها كتيرة وأكتر من سعرها. السبب إنهو الزراير بتاعتها مصنوعه من معدن تقيل خلى وزنها تقيل جداً، لكن إتصرفت ، قلعت الزراير وختيتهم ليك في جيب البدلة الجواني الشمال.
** أختك مرزوقة حامل لكن هي وزوجها رفضوا يفحصوا عشان يعرفوا نوع المولود. فمابقدر أقول ليك حتبقى خال ولا عم. بس الحمد لله قالوا لو طلع الطفل ولد حيسموه على اسمي؛ ودي أول مرة أسمع واحد يسمي ولدو ولا بتو بابا.
** مشينا أمس مع أحمد أخوك للمول قلنا نتسوق ونتعشى ونقضي وقت جميل مع بعض، بس والله أخوك أحمد دخلنا في مشكله كبيرة بوظت علينا البرنامج إلا الحمد لله اتحلت. أحمد وهو نازل من العربيه قفلها وأمنها وخلى المفتاح جوه العربية. فإضطر ياخد تاكسي يرجع البيت عشان يجيب المفتاح الإسبير ويفتح لينا حتى قدرنا مرقنا من العربية؛ غايتو كانت جنس حبسه.
** أخيراً بنقل ليك أشواق الجميع، ووالله كنت عايز أرسل ليك قروش في الجواب دا، لكن للأسف ما إتذكرت إلا بعد ما قفلت الظرف.
سلام..

قمة الروعة يا الحبيب عبد الله بدوي...
والله مشتاقين ليك شديد...
لعلك إنت طيب والأسرة الكريمة، ولعلك مرتاح في العمل،،

ما أروع بصماتك في هذا المنتدى الذي ظل صامداً رغم تقلبات الدهر وتغولات الفيس ووسائط التواصل الاجتماعي الأخرى، مثل تويتر، وفليكر، وانستغرام، وواتسب، وفايبر، وسكايبي وخلافها ...

موضوع: رد الجمعة 30 مايو 2014, 11:25 pm

إسماعيل كتب : -
قمة الروعة يا الحبيب عبد الله بدوي...
والله مشتاقين ليك شديد...
لعلك إنت طيب والأسرة الكريمة، ولعلك مرتاح في العمل،،

ما أروع بصماتك في هذا المنتدى الذي ظل صامداً رغم تقلبات الدهر وتغولات الفيس ووسائط التواصل الاجتماعي الأخرى، مثل تويتر، وفليكر، وانستغرام، وواتسب، وفايبر، وسكايبي وخلافها ...

الأخ الغالي أسماعيل .. أشكرك علي شعورك الطيب .. كيف حالكم مع الأسرة الكريمة ..
بخصوص هجران وعزوف الأحبة عن هذا المنتدي الرائع المحتشم بكل أسف سوي كانوا من أهل العريجاء أو خارجها أقر بكل صدق أنني لم أشعر يوما بالأهمية وبأني من الأعضاء المساهمين والفاعلين بهذا المنتدي بل كنت دائما أستفيد من المواضيع والإسهامات المطروحة .. وربما كنت أفيد أحيانا.
لكنني في نفس الوقت أقر وبكل صدق أنني كنت من أكثر العاشقين والمحبين لهذا المنتدي .وإليك الدليل :-
أولا :- قبل عام كامل تنبأت بل أحسست بقرب أفول هذا المنتدي بسبب ظهور هذه الوسائط العجيبة وفتحت هذا البوست تحت عنوان (يللا نفرح المنتدي ) بعد شعوري لعلامات الحزن علي وجه هذا المنتدي .
ثانيا :- إستفتحت الموضوع بطرفة تلك الزوجة التي ودعت زوجها ورفيق دربها لمثواه الأخير وهي تبكي وتولول وعندما وجدت البديل نست زوجها . سبحان الله فكأن لساني حالي كان يقول لا تستبدلوا الفيس والوتس أب برفيق دربكم .(أرجع لبداية البوست )
ثالثا :- أحببت هذا المنتدي لأنني من حيث لا إحتسب جعلت جل أهلي وأبناء قريتي من المتابعين والمحبين لهذا المنتدي لسبب تواجدي بينكم .لتأكيد ذلك سوف تجد أعلي نسبة مشاهدة لمواضيعي .. معزرة لا أقول ذلك لجودة إسهاماتي لكن لتواجد أحبائي وأهل قريتي داخل حوش العريجا .
تعريجة :- سألت إبنتي (إبنتي مروة تالتة طب )ما معني فليكر زي ما عمك إسماعيل قال ردت نوع من أنواع التواصل قمت أنا رديت ( يا بنتي أنا أول مرة أسمع إفتكرتو نوع من البسكويت )....