قصة بيت

موضوع: قصة بيت الأحد 02 مارس 2014, 12:49 am

رجعت البيت بعد صلاة المغرب قبل ساعه وفتحت قناة النيل الأزرق واستمتعت بقصيده معبره ومؤثره لشاعره سودانيه أسمها داليا لكن للأسف لم يسعفني الحظ لللإستمتاع بها من البدايه فقد بحثت عنها حتي وجدتها :-

حكاية بيت / الشاعرة داليا الياس

مُناي في الدنيا سُترة وبيت..

وأصل البيت حنان وأمان.. مودة وريد

محال البيت يكون بس طين.. وزنكي وحيط

ولا ممكن يكون سكر وصلصة وزيت

كلام البيت كلام تاني.. كلام إحساس مقدس وشرع رباني

وريد إنسان عزم وإختار

فتح باب قلبو لمّاني.. بني العش الصغير طمّني آواني

٭ ٭ ٭ ٭

بيوت الدنيا مختلفات وما كل البيوت واحد

في بيت داااافي.. وبيت باااارد

وبيت عمران هوى وتحنان.. وبيت جامد

بيوت مليانة فرحة وحب

وخير وأمان

بيوت عدمانة من الود..

زمن مسكونة بالأحزان

بيوت زااااهية.. وبيوت وااااهية

بيوت تديك سلام وأمان

عشان فيها النفوس صافية.. وفيها التقوى والإيمان

٭ ٭ ٭ ٭

بيوت متروسة مال وإثاث

وخالية من الأمل والناس

بيوت لا لمبة ولا بوتجاز

وناسا لُطاااااف حُنان ولُذاذ

في بيت عاااالي وحوشو كبير

وسيدو وزير خيرو وفير

وليهو غفير .. وبيت من طين

في راكوبتو بس فد زير

ورغم الساكنو زول مسكين

بس حقاني عندو ضمير.. بيوت البهجة عنوانا..

وطول اليوم ضحك وهزار

وبيوت طوالي حرقانة

مولعة زي تقول من نار

بيوت بتراعي حق الجار .. وفيه من الخيار أخيار

بيوت لا بتعرف الجيران..

ولا بتستطلع الأخبار

بيوت تمليك.. بيوت إيجار

وماااابتلقاها بالهين .. ولازم تكرم السمسار

وشوف في سكتك كم بيت .. وفي كل البيوت أسرار

٭ ٭ ٭ ٭

وفي بيت مسكون.. وبيت فاضي .. وبيت جاحد.. وبيت راضي

وبيت مشكلتو معروفة

ووصلت محكمة وقاضي.. عشان عُشرة سنين هانت

وكل واحد بقى في وادي.. وفي بيت حدادي مدادي

بس مافيهو غير إتنين.. وبيت ملياااان تقول نادي

٭ ٭ ٭ ٭

وفي بيت سكانو متآلفين.. على الحلوة وعلى المُرة

وبيت سكانو مختلفين.. ما بتفقوا بالمرّة

وبيت ستو مرة ضيفان.. مرة سُترة

ما بتستاهل الهجران.. ولا بتستاهل الضرة

بيت ستو دوام.. بتباري في النسوان

لا بتعرف تكرم الضيف.. ولا بتورِّق الخُدرة

٭ ٭ ٭ ٭

وفي بيت محروم من الأطفال

من ضحكة عيون حلوين

وكل يوم ناسو عند دكتوركبير.. أتعابو بالملايين

وبيت أطفالو زي عشرين .. ومحتاجين حق كراسة ما لاقين

وبس عايشين على الله.. ما قادرين يسدوا الدين

وناس تانيين.. مرتاحين.. وهَم في الدنيا ما شايلين

٭ ٭ ٭ ٭

وياما وياما تلقى بيوت .. بيوت صاخبة

وبيوت لا ليها حس ولا صوت .. وكل ناس البيوت بتموت

ويبقى البيت شبر واحد.. وبكرة تكون بيوتنا قبور

لا هم مويه لا هم نور .. ويبقى مُنانا في الجنة

وننسى حكاية السُترة.. وحكاية الريد

كأننا لحظة ما كنا.. ولا فتشنا يوم عن بيت

حليل البيت.. وهم البيت.. وناس البيت

حليل الدنيا بالفيها!! وكل الفيها لا ماليها ولا مكفيه.ا..

موضوع: رد: قصة بيت الأحد 02 مارس 2014, 7:03 pm

روعة يا أبا مصعب ...
قصيدة جميلة وهادفة وذات مضمون رائع ...
حقيقة البيوت خشوم بيوت !!
وأعجبها القبر صندوق العمل !!
لله درك يا أبا مصعب وأنت تسعى جاهداً لإبقاء شعلة هذا المنتدى متقدة لا تنطفئ..
بالمناسبة بالأمس اتصل بي الأخ/ أمير محمد حمد، الآدمن بتاع المنتدى، بعد غياب طويل..
ولما سألته عن سر غيابه المتطاول عن المنتدى وعن قروبات العريجاء بالفيسبوك،
قال: خلاص طلقنا التكنولوجيا، كما قال أحد الشعراء: (هذا الشعر طالق)!!
ولكنه قال في النهاية أنه اشترى جهاز إنترنت ووضعه في البيت إيذاناً بتدشين مرحلة جديدة من مراحل التصالح مع التكنولوجيا، أي أنها كانت طلقة رجعية ... ههههههههه