قصة ألوك ود الملوك

قصة ألوك ود الملوك

لو يوم حصل أمك وأبوك
بقوا يسألوك ..
عن كردنة وقصة ألوك
أوعاكَا تتلفَّت كتير..
تسأل أخوك
أو تتلخمْ ..
تتهجَّا للكلمات تلوك
القصة واضحة ..
وضوح شديد
ما دايرة ليها درس عصر
ما دايرة منَّ القول مزيد
ما تمشي ياخي..
تروح بعيد
كل المفيد
تلقاه عنْدْ ناس الرشيد
الهمبروك
ود الملوك
بقى رسمي من جند الزعيم
قبض الصكوك
مريخنا كهربا في السلوك
تمساحو ببلع ما بلوك
ورئيسو مك..
ووريث مكوك
ملكية كيف؟
ناس كوستي كيف؟
والكرْتِ كيف؟
الود حقيقة ولد حريف؟
أبنوسي فارع ..
وزول رهيف؟
وتعال أقيف
ما قالوا خطفوا الكاردينال!
وعليهو كم حامت شكوك
ياخي انتبه ..
ما يدقِّّسوك
ما يجهجهوك
ما يعشِّموك
مريخنا ما بفك الولد ..
بي أخوي وأخوك
مريخنا مريخ الفلاح
فارس مدجَّج بالسلاح
كابيلا صاح
ود وََنْسي صاح
والوالي صاح
يا ود خلاص..
سيب النواح!
امشي العريجا مع الصباح
اسأل دلوك
واسأل قضارف وأب كدوك
وكان شفت (جرجرة) من بعيد ..
ناديلو عوووووووك
يا أخوانا هوووي ..
أحكولنا عن قصة ألوك
الود ده من أبيي صحيح؟
صاحب لسان ..
عربي وفصيح؟
تيلاد ملوك
دينكا ونَقوك
هبَّار شروك
دولار بنوك؟
يا الكاردينال
ناس الهلال
حتقولوا أيه؟
حتقولوا برضو..
لعب عيال
هاكم نصيحة بلا جدال
كتلوك عديل..
أحسن كتير ..
من جوك وجوك
وكمان سؤال!
الكرْتِ عند فطومة ..
ولَّلا الكاردينال؟
الكرْتِ عند الكاردينال
سيد الرجال
سمح الخصال
بِلْ الكَرَتْ يا كردنة..
في موية من عصراً كبير
وعُصارتو ..
كُبَّها في الجكوك..
واشرب براك
ما تدي زول ..
واضرب معاها صحن سجوك
أو ياخي قوم ..
رب العباد يرحم أبوك
شيل الكَرِتْ..
واطلع على سوق الغنم ..
يمكن يجيبلك عنبلوك
أو بالكتير..
حملاً كعوك
ناس فاطنة ..
أبداً ما هدوك
ديل لسه برضو
وراك وراك..
حيبهدلوك
اعمل حسابك
لا تجن..
أو تعرى في راسك سلوك!