ابراهيم عبدالرحمن البشير
عدد المساهمات : 100
تاريخ التسجيل : 16/01/2008
العمر : 41
الموقع : الامارت - دبـــــــــــــــي
 | موضوع: لكل مجتهد نصيب  الثلاثاء 21 أبريل 2009, 1:54 pm | |
| لكل مجتهد نصيب كيف؟
اسمعوا هذة القصة
وطبعا الكتابة بالعامية بتكون اوضح
الحاج سليمان جارنا وزى مابقولوا الحيطة بالحيطة عندو 3 اولاد وبت واحدة
عمنا سليمان ماعندو اى برنامج غير الدكان يفتح الدكان من الصباح ويقعد فى العنقريب تحت الشجرة
يرد السلام للبسلم علية ويسبح بالسبحة لمن يكون براه المغربية يفرش البرش ويصلى بالناس المغرب
وبعد الصلاة مرتو الحاجة ليلى تجيب الشاى المقنن وكان مسمية الشرك يعنى بقبض بية الناس للصلاة
صفاتو واخلاقو خلتو محبوب شديد فى الحلة ولو يوم واحد مافتح الدكان الحلة تقوم وماتقعد..
محمد الولد الكبير لى حاج سليمان كان ولد الحلة يعنى اى عرس او اى وفاة محمد وش يساعد المحتاج ويسال عن الغائب باختصار شديد هذا الشبل من ذاك الاسد ..
الغريبة انو محمد دة مابشيل اى مصاريف من ابوة ولمن يحتاج لى قروش بمشى يشتغل طلبة فى الحر الشديد عشان يسدد رسوم الجامعة او يشترى مناديل الورق لى اختو يعنى شايل نفسو وبحاول يشيل مع ابوة
رغم انو والدو كان باحسن حال ..
ابوه رافض شغلو لكن دايما كان محمد بقنعو بى كلام معسول ولطيف
تمر الايام وعمنا سليمان يوسع فى الدكان ويشترى عربية والدنيا ماشة معاه
ومحمد يدخل جامعة الخرطوم والايام تمر
وبعد ايام نسمع الليلة تخريج محمد طبعا الحلة كلها مشت التخريج لانو محمد صاحب جمائل على كل الناس
وفى لحظة التخريج نسمع السيرة الذاتية لمحمد ونسمع مقطع ارقى عافية منك وراضية عنك وكان طلب خاص من امو
ونتلفت نشوف عمنا سليمان ببكى ابوى يقول ليه انت تبكى ياحاج سليمان طيب الليلة البفرح منو
يقول ليه والله ياحاج حسين ببكى لانو محمد من ماقام ماطلب منى شى ولامن بقى دكتور ماطلب منى اى حاجة
وفى اللحظة دى محمد سمع كلام ابوة قال لية ياابوى الليلة دى انا داير عفوك ورضاك
وكنت مابشيل منك عشان ماتفشل تجارتك
والحمد لله انا نجحت وانت نجحت
والزغاريد تنطلق
نجاح محمد كان موضوع الحلة
بقى دكتور وكسب رضى الله والوالدين وناس الحلة
ولكل مجتهد نصيب | |
|
الجمالي
عدد المساهمات : 247
تاريخ التسجيل : 12/11/2008
| | موضوع: رائعه الثلاثاء 28 أبريل 2009, 10:20 pm | |
| وكنت مابشيل منك عشان ماتفشل تجارتك
والحمد لله انا نجحت وانت نجحت | |
|
Ismail
عدد المساهمات : 2548
تاريخ التسجيل : 05/02/2008
العمر : 43
الموقع : aykabulbul@gmail
| | موضوع: رد: لكل مجتهد نصيب الخميس 30 أبريل 2009, 3:38 am | |
| روعتها نابعة من بساطتها... متجذرة في أعماق تراثنا، وطبيعة أهلنا الطيبين... تعبق منها أنفاس الراحل المقيم الطيب صالح (عليه رحمة الله).
ابو مسلم | |
|
