الطيانه

واحد كان عندو طيانه شغالين يبنو ليهو في حوش جالوص ولما نزلو للغدا صاحب البيت جاب الصينيه مليانه كسرة وملاح الجماعه في لحظه انتهو من الملاح صاحبنا مشى جاب الملاح لقى الكسرة انتهت وهكذا بدأ ذهاب واياب بين المطبخ والطيانه وعندو كلب واقف جنب الباب يخرج ويدخل معه وصاحبنا لما زهج من الجماعه والكلب متابعو قاليهو جر الطياني اللياكل راسك

***
يوم كنا في درس فتاوى عن الحج واحد قال للشيخ ياشيخ انا جامعت زوجتي في عرفة ماذا علي الشيخ قاليهو قبل ماتعرف ماذا عليك انت لقيت ليك مكان وين وسط الاثنين مليون ديل
***
قبل خمس سنوات تقريبا مشينا عمرة وكانت ابنتي زلفى في الرابعه من عمرها وفي الحرم بعد كل صلاة في الغالب هناك صلاة على الاموات وطيلة الايام ونحن في الحرم هي تصلي معنا وبعدما رجعنا يوم في البيت وهي تصلي العشاء وبعد العشاء قامت تصلي مره اخرى فسألتها عن الصلاة التي بعد العشاء وانا متوقع الشفع والوتر واذا بها تقولي دي الصلاة على الاموات
*******
عندنا معلم من ود زلم كان يشتغل في ودالهبيل قال هناك بيجتمعوا كل ناس الفريق في الوجبات كل ياتي بما عنده وقال في الغالب الكل ويكه اما بيضا او حمرا والاولاد الاصغر سنا بيرسلوهم للوصله في يوم الولد تأخر ماجاب الوصلة فقام احد الاعمام ومشى يغسل يده وهو طبعا ماشبع لكن زعلان من تاخير الولد فقام واحد من الجماعه قاليهو ياحاج ماتغسل الجنى هسع بيجي قاليهو والله ان جابا فاصوليا ما اجي