أخي أبا مسلم .. تعرف حكاية الراكوبة بالذات شدتني شديد برقت بي في فاشوق ولقد ود أبو دية.. وطبعاً ممكن تكون قش قمح, ومش أي قش(على رأي الكاتب الكريم) أو برضو لو زول بطانة نقول روس نال ومحريب من الوعرة التنا دي (على طريقة العكوداب) أو ميعة ود باكر.. والشعب لعوت و رباط البورة والعضاضة لحا عاشميق من دبة التب جوار الحفير ظانطير(تقع بين عمارة ود البنا, أم طرطارة, الربداء, التماري ,أب جلفة وكاهلي زيدان- بلد عمك دجكين وود عشا).ثم أبشكم بأن الوعرة اخدرت تشت السنة دي بعد الترعة الجديدة. المهم مداخلاتنا ميها غلية عليكم ولكن يمنعها الاستحياء من منداكم العريجاء كله عباقرة(بسم الله ماشاء الله) فالواحد لازم يعمل كم خط رجعة قبل ما يداخل؛ وقبال ما أمرق داير أديكم قفشة في غير محلها يا رب تكون فرش:-
كل زولاً عاجبو الصارو
قال ليك الجماعة قاعدين يتفو شرو كل زول يغني بزولاً ليه في الأنقاذ أو الحكومة. قام الدنقلاوي قال: أنتو الزبير مهمد صاله دا ما سيد مش عارف إيه كدا في الجنة. قام أخوي ملوال قال ليهم: و مال سلفاكير دا أدروب يعني ولا شنو؟ نط أبكراي قال: بالله شيف زي دا نان وتيب مني أركو دا قاعد هناك ببيع كبكب وترمس ولا شنو يعني؟ آها قام ليك ود دار جعل قال: اسمعوني نا هوي عارفين الجنا القاعد فوق روسيهن كلنو دا من وين؟ ما من حوش بانقا الليلتنا دي!! هنا أدروب زعل قرب يطق و قال ليهم: أنا بقي أحسن من الآخر نجيب ليكم: أوباما دا منو؟ ما ود عم أوشيك وأوهاج وأونور ديل!!!
يالا أضحكوا وحركوا لينا الجنبكم ديل
ابرو حازم