خرفان في الصيوان

زائر

خرفان في الصيوان
أمس ختفنا رجلنا نزلنا شبرة (سوق) الغنم, قلنا نشوف لينا عضة للضحية أي حاجة إن شاء زول. ففوجئنا بلمة وهيصة سادة عين الشمش|. شنو آآآآناس قالو الخرفان معلنة حداد عام.. ضاربة سرادق عام لتلقي واجب العزاء في بعضها البعض. قال اتعهدو مع مقاول فرشات يزودهم بعدد من الصيوانات مع الأباريق وشحنة مناديل فاين لزوم المخاخيت و حاجات تانية لشق الجيوب ولطم الخدود. فعلاًََ شفنا عجباً عجاباً. أول شيء أهل البكا زاتهم خشم بيوت: أجناس وأحجام و أشكال وألوان. بدءاً بال(vip), البيجي الأنيق ستايل من النوع المفكر يدخل سجل غينص للأرقام القياسية.(ضحية ناس جمال الوالي ولا فوق).. وهبوطاً إلى الأبرق البروليتاريا الهفتان بعيد عنك البحرجك مع نسابتك. زي واحد بجغور صومالي كدا منزوع الضنب ما يساوى خمسة قروش سمع سيدو يفاصل ويتمنى منى في سعره قام اتنحنح, كناية عن قوله: بيع يا منافق ليك الحق في كل متنافق أنتن عارف عندي أنيميا( وكمان مثقف بتابع القناة القومية). كذلك رأينا منها المصاب بحمى ما قبل الضبح, وآخر يقرأ بهستيريا في كتاب (كيف تصبح حيوان آخر- لأسامة السيد). لاحظنا بعضها عدواني جداً وشكلو مهووس بالسياسة شبه الكلب شارون (مرمي معفن ليه سنتن كل يوم يقطعوا حتة من مرارتو- يستاهل دا حق صبرا وشاتيلا). لكن في المقابل بعضها مسالم تلقاه حايم بالكوش (يقرض) الدلاقين, بينما آخر رومانسي( يقرض) الشعر وهو يندب حظه: عيد بأية حال عدت ياعيد لنتشوي ثم نتلهط أم لأمر فيك تجديد؟؟؟ أو يغني: ( عدت ياعيدي بدون طقوس .. وين بقرنا وين التيوس .. غابو عني) أثناء مرورنا ضحكنا خروف فشنك لقيناه واقف لسيدو ينفخ فيه بطرمبة كل شيوية, وآخر ألعن يتفاوض مع واحد حمار يشرح ليه إزاي يلبس الفروة في يوم العيد والأجرة 3 كلاليق برسيم, يستلم بعد أيام التشريق. آخر تفتيحة راح فاتح بلاغ في صاحبة ملفق لو تهمة الشروع في القتل العمد مع سبق الصرار والترصد. وواحد تاني مافيا سحب السكين من سيدو وجرسو بيها. وثالث وصلت بيه حالة الاكتئاب أنو قعد يدعي على نفسه بأنفلوانزا الخنازير ولا أي نصيبة تاخدو بس تختيه الساطور. ورابع حنكوشة حنين لجأ للدبلوماسية فتوسل لصاحبه: هانت عليك كالعشرة. الحقيقة في شلة خرفان كدا معرفة قديمة لاحظلنا غيابهن فقدناهن قالو: مشن يعملن حفلة تنكرية مع طيور البطريرق(ضاربات الهم بالفرح) . بعضها للغرابة سمعناه يتبادل عبارات الشماتة .
ـــــــــــــــــــــــــــــــــــــــــــــــــــــــ ــــــــــــ
أخوياً لينا شاف ليه خريفات كدي زي المهجنة ولا معالجة وراثياً مش عارف فأتحفنا بتعليق ظريف قال: اسمعني وأنا أخوك: حاجة من الاتنين:_
هدولا يا إما جمال الله سخطهم
ولا سخلات الله راضي عنهم
و ديل بشتروهم مشاركة ولا كيف .. عجايب
موباااالغة
ــــــــــــــــــــــــــــــــــــــــ
فعلقت عليه بهذه من عندي:
لا وأنت السادق يأ اللخو, حاجة من اتنين:
ديل يا إما خرفان منملة
و لا نملات مخرفة,,,
و ممكن تشتريهم يا أما( مسيار) أو (عرفي)!!! ودي بصراحة مش عجايب ,الضحية بقت رابعة لناس الغول والرخ والخل الوفي...
أنا نصيحتي تفتحو للموضوع من أساسه وتكسبو (الفجر وليال عشر) أحسن وبعدين تتموها شربوت بضلافين.
مع موتي الشديدة
أبو حازم/ دفع الله الأمين (ودالأصيل)
تثبيتة:-
للأمانة شكر خاس للرائع معروف أوشي على الصور التي أوحت لي بها الخرابيط المرتجلة, وما تخاف اللخو حق الملكية الفكرية كلو ح يكب في جزلانك, بقول أحسن ليك من شغلة الرشايدة دي.[/
19/11/2009[/b]