دخل القش ما قال كش !!

بسم الله الرحمن الرحيم

الأحاجي السودانية

الأحاجي السودانية نوعان، نوع على شكل قصص وحكايات، والنوع الآخر على شكل ألغاز وفزورات... والنوع الذي تصدق عليه التسمية هو النوع الثاني، لأن لفظة أحجية في اللغة العربية تعني اللغز والطلسم... وقد اعتادت أمهاتنا وحبوباتنا على استهلال طرح هذه الأحاجي والطلاسم بالعبارة الآتية: (حجَّيتك ما بجَّيتك) وأنت ترد بهذه العبارة: (خيراً جانا وجاك)... وبعدها يتم طرح الأحجية، فإن نجحت في الإجابة عليها فبها ونعمت، وإن فشلت؛ كان التركيب في انتظارك!! والتركيب هو أن تقول لك الحبوبة مثلاً: (ركَّبتك فوق بعشوم... البعشوم وكت يلاقي البعشوم... أبو الكبَّاس يكبس عليك في النوم): وسوف أقوم بطرح مجموعة من هذه الأحاجي المأثورة؛ بعد أن قسمتها إلى ثلاث مستويات؛ أيسرها هو المستوى الأول وأصعبها هو المستوى الثالث. والآن لنبدأ بالمستوى الأول:

نرجو من الشباب أن يشدوا الهمة في الإجابة على هذه الأحاجي لكي نتمكن من الإنتقال إلى المستوى الثاني.

المستوى الأول:

1. دخل القش.. ما قال كش.

2. طويل... وما بِلْحَق الكعكول.

3. عمي تِيَّة تية... مصارينو ميَّة.

4. حبوبتي في دكانا... تاكل في مصرانا.

5. حبوبتي أم كضيم.. فيها فَدْ عضيم.

6. حبوبتي من شِدَّتا ولِضَّتا... شايلة جدي فوق فهقتا.

7. سيفي سليتو... النوبة والعربان ما يرجِّعوه في بيتو.

8. سِرْنا وسَرْسَرْنا.. ودَّ الجِن ما يقُص أثرنا.

9. ديك شرارة.. فوق دبَّة حدارة.. قلوب الناس أبنَّها.. والكلاب نبحنَّها.

10. عنزي هبَّك هبَّك.. أم ضرعاً مشبَّك.. الوادي واديها.. منو البقدر يحميها.

عدد المساهمات : 247 تاريخ التسجيل : 12/11/2008

دخل القش.. ما قال كش.:1/الضل او الدخان

2. طويل... وما بِلْحَق الكعكول.الدرب

3. عمي تِيَّة تية... مصارينو ميَّة./العنقريب4. حبوبتي في دكانا... تاكل في مصرانا./الفانوس ابو شريط5

. حبوبتي أم كضيم.. فيها فَدْ عضيم.المترار

6. حبوبتي من شِدَّتا ولِضَّتا... شايلة جدي فوق فهقتا./الشعبة (اللمينة)7. سيفي سليتو... النوبة والعربان ما يرجِّعوه في بيتو./اللبن8. سِرْنا وسَرْسَرْنا.. ودَّ الجِن ما يقُص أثرنا.النجوم9. ديك شرارة.. فوق دبَّة حدارة.. قلوب الناس أبنَّها.. والكلاب نبحنَّها.

10. عنزي هبَّك هبَّك.. أم ضرعاً مشبَّك.. الوادي واديها.. منو البقدر يحميها.
/المطرة

طبعا بعد المذاكرة واسترجاع الماضي مع العيال وامهم والبحث في النت توصلنا لهذه النتائج

بصراحة ممتاز يا ود الجمالي... وحقيقة إنت وعيالك تستحقون وبجدارة الانتقال إلى المستوى الثاني رغم أن نتيجتكم في هذا الامتحان (7/10)

لأنو عندكم سؤال ما جاوبتوه خالص، وسؤالين كانت إجابتكم عليهم خاطئة !!!

كدى هسه خلونا ننتظر شوية قبل ما نوريكم حل الأحاجي الواردة في هذا المستوى، ومن ثم ننتقل للمستوى الثاني... عشان ندِّي باقي الجماعة فرصة يحلوا الحاجات الغلبتكم !!!!!

اانابكتب الاجابه فقط حسب ترتيب الاسئله ان شاءالله يكونوصاح بس! 1-الضل.2-االدرب.3-العنقريب4-اللمباالهبوبيه.5-المترار.6-الشعبه.7-طنوب اللبن.8-النجوم.9-البرق.10-االسلوكه. [تربايت حبوبات]شكراكتيرياعمو!

ممتازة يا داليا بت كمال؛ وفعلاً ترباية حبوبات .... لكن نتيجتك هي (6/10) فقط، يعني ناس الجمالي زايدين عليك بواحد !!!!

ترقبي قريباً في الموقع موضوع عن والدك كمال الكدك عندما كان تلميذاً في سنة أولى أولية عام 1965م!!! بعنوان: (ليلة البحث عن كمال الكدك)!!

انابعتقدالاجابه رقم8-كلمه بسم الله الرحمن الرحيم

عدد المساهمات : 247 تاريخ التسجيل : 12/11/2008

ببعد المراجعة والدرس الخاص مع العشاء الكارب مع الاخ اسماعيل بمنزله امس توصلنا الى بقية الحلول وهي كالاتي

5/البلحه
8/المركب
9/البندقية
وفي انتظار المستوى الثاني

Admin عدد المساهمات : 302 تاريخ التسجيل : 30/12/2007

السلام عليكم

والله انا قريت رد الجمالي قلت صاحبنا دي اكون شففوا
ولما جيت لقيت في الرد دا حكاية العشاء قلت انكشف
الملعوب ولا رايكم شنو ياشباب

إليكم حلول المستوى الأول من الأحاجي السودانية:

المستوى الأول:

1. دخل القش.. ما قال كش = الضل

2. طويل... وما بِلْحَق الكعكول = الدرب

3. عمي تِيَّة تية... مصارينو ميَّة = العنقريب

4. حبوبتي في دكانا.. تاكل في مصرانا = لمبة الخيط (حبوبة ونسيني)

5. حبوبتي أم كضيم.. فيها فَدْ عضيم = التمرة

6. حبوبتي من شِدَّتا ولِضَّتا... شايلة جدي فوق فهقتا = الأمينة (الشعبة)

7. سيفي سليتو... النوبة والعربان ما يرجِّعوه في بيتو = اللبن

8. سِرْنا وسَرْسَرْنا.. ودَّ الجِن ما يقُص أثرنا = المركب

9. ديك شرارة.. فوق دبَّة حدارة.. قلوب الناس أبنَّها.. والكلاب نبحنَّها = البندقية

10. عنزي هبَّك هبَّك.. أم ضرعاً مشبَّك.. الوادي واديها.. منو البقدر يحميها = المطرة

موضوع: المستوى الثاني الأحد 27 ديسمبر 2009, 2:23 pm

بسم الله الرحمن الرحيم

الأحاجي السودانية (2)

ذكرنا أن الأحاجي السودانية نوعان، نوع على شكل قصص وحكايات، مثل قصة فاطنة السمحة، وفاطنة القصب الأحمر، وأخدر عزاز في قزاز، وحكايات ود النمير...والنوع الآخر على شكل ألغاز وفزورات... مثل: (دخل القش ما قال كش)، وهو النوع الذي تصدق عليه التسمية؛ لأن لفظة أحجية في اللغة العربية تعني اللغز والطلسم... والآن إليكم المستوى الثاني من هذه الأحاجي المأثورة: حجيتكم ما بجيتكم...

المستوى الثاني:

1. حبوبتي أم سنينة... فيها فد عوينة.

2. قطع البحر... بلا عضُم ضهر.

3. أحمر حيمور.. تمر الديمور.. تمر الـمُـلَّاك.. الما بِنْلاك.

4. أخدر خدير... مربَّط بالجنازير... في بطنو حرير.

5. مطمورة أب زيد... مليانة بيض.

6. كان شالو رطَنْ... وكان خلوا بَطَنْ.

7. كان شالوه ما بنشال... وكان خلوه سكن الدار.

8. بنات الفَزَع... مربِّطات رويساتِن بلا وجع.

9. ماشي في مشِيْ... وقعَ منِّي شي... ما دنقرتَ علي.

عدد المساهمات : 247 تاريخ التسجيل : 12/11/2008

المستوى الثاني:
نحن جاهزين لكن المرة دي عايزين واحديبدأ ونشوف تربايت الحبوبات

عدد المساهمات : 247 تاريخ التسجيل : 12/11/2008

1/ الابرة

2/الصوت
ومنتظرين واحد ينافس

1-alebra 2-alsot 3-alshay 4-3ash alref 5-alngom 6-algenzer 7-ramad alfaham 8-algataty 9-altofaf. thanks amo

عدد المساهمات : 247 تاريخ التسجيل : 12/11/2008

يعني حليتيها بالانجليزية عشان ماحد يغش منك [
[size=24]بس مادام كتبتي بالانجليزي خليها انجليزي راسو عديل الترجمة الحرفية تخلي الكلمة زي البامية الطبيخ وقامو فركوها عشان تبقى مفروكة/size]

$ابدا والله العظيم ماكان قصدى ياالجمالى اناكتبت من جهازمامعرب !لاكن هاك الاجابه عشان تشف اناعارفه قصدك لاكن الباميه ياها الباميه فى النهايه # الاجابات هى

1- الابره
2-الصوت
3-الشاى
4-عيش الريف
5-النجم
6-الجنزير
7-رماد الفحم
8-القطاطى
9-التفاف

شكرا كتيرياعمو واتمنى ان اقراالمزيدعن زكرياتك مع الوالد وانااخبرته به وهوبخيرلاينقصه الاسماع صوتك وكمان بسلم عليك كتتتتتتتتتتتتتتتتتتتير ودا رقمو
0122248584

الاجابات ماهى مئه المئه ياالجمالي عشان ماتشف ساى اكتب العندك

بسم الله الرحمن الرحيم

حل المستوى الثاني:

1. حبوبتي أم سنينة... فيها فد عوينة = الإبرة
2. قطع البحر... بلا عضُم ضهر= الكوراك
3. أحمر حيمور.. تمر الديمور.. تمر الـمُـلَّاك.. الما بِنْلاك = الشطة
4. أخدر خدير... مربَّط بالجنازير... في بطنو حرير = البطيخ
5. مطمورة أب زيد... مليانة بيض = النجوم في السماء
6. كان شالو رطَنْ... وكان خلوا بَطَنْ = القيد أو الجنزير
7. كان شالوه ما بنشال... وكان خلوه سكن الدار = الرماد أو الهبُّود
8. بنات الفَزَع... مربِّطات رويساتِن بلا وجع = القطاطي
9. ماشي في مشِيْ... وقعَ منِّي شي... ما دنقرتَ علي = البزاق أو البصاق.

ما شاء الله على بتنا دالية كمال، وأثبتت أنها تربية حبوبات بحق وحقيقة، وجدعت الجمالي وأسرته وراها بعيد...

تسلمي يا بت كمال ويسلمن حبوباتك بت المنى بت الأغبش، وطيبة بت أحمد على هذه المعلومات المعتَّقة التي زودنك بها.
لكن الشطة والبطيخ ديل ما عرفتيهن يا أستاذه !!!

المستوى الثالث:

1. عمِّي أبْ أكتاف... بشق الليل ما بخاف.

2. عنزي ووليدا... أكلنْ البِلاد لي حديدا.

3. مشيها تَتَرَبْ.. وجريها تَتَرَبْ.. يا نوبة يا عرب.. شوفوا الشغُل البلا ضَنَب.

4. تلاتْ دَرادِح.. والبيت الرادِح.. تِلِنْقة يِنْقا.. وتِكيكة واقف.

5. شعيبة.. والشعيبة فوقها قريبة.. والقريبة فوقها كلفَّتْ.. والكلفَّتْ يمشي ويتلفَّتْ.

6. خمسة بُلْبُلات.. شايلات بُلبُلة.. شاقَّات الطِّليح.. ماشَّات دنقلا.

7. جاتْ تطفِّر.. أم عصَباً مصَفِّر.. الجُنون أخوانا.. والرسول مُقرانا.

8. الهَرْبَعَة.. أم كرعيناً أربعة.. إن قامت مشَتْ.. الدنيا انكفَتْ، وفي رواية أخرى (صفحة بور... وصفحة ميتات).

9. شدراتي في بلادي.. جمُالي أبنَّهِنْ... وجمُال الناس أكلنَّهِنْ.

10. سوَّيتو صَريف... أبَى ما يقيف... قدنُّو خيول الرِّيف.

شدوا الهمة يا شباب... عشان كل مرة نجيب ليكم حاجات حلوة زي دي!!!

أصلاً الشدر الكبار فيهو الصمغ... وزي ما قال الخواجة:
(Old is gold)

عدد المساهمات : 247 تاريخ التسجيل : 12/11/2008

اها يا اسماعيل شوف ليك دليل تاني غير الزول ده

يا ود الجمالي... يعني ما تتفاعل إلا مع موضوع الأحاجي والغلوتيات ده!!

ما شايفنك يعني علقت على الإستايل الجديد والرائع لهذا المنتدى، ولا شكرت الإدارة على هذا الجهد المقدر!!!

ولا باركت لينا إنتصارات نادي الكفاح بالعريجاء الذي اكتسح فرق المنطقة كلها، وتأهل للدرجة الأولى، ثم أحرز كأس الصداقة بكل جدارة واقتدار !!!

دي ما المحريَّة فيك يا أبو محمد... ولسه نحن راجنَّك... والما دارك ما عاتبك !!!

بصراحة ماعارفة اكتب شنومحتارة اكترمن الجمالي الله يسترمن المستويات الجاية

حل المستوى الثالث:

1. عمِّي أبْ أكتاف... بشق الليل ما بخاف = الدلو

2. عنزي ووليدا... أكلنْ البِلاد لي حديدا = المرحاكة (الرحى البلدية)

3. مشيها تَتَرَبْ.. وجريها تَتَرَبْ.. يا نوبة يا عرب.. شوفوا الشغُل البلا ضَنَب = الضفدعة

4. تلاتْ دَرادِح.. والبيت الرادِح.. تِلِنْقة يِنْقا.. وتِكيكة واقف = اللدايات + الحلة + الملاح + الكنش (المفراكة)

5. شعيبة.. والشعيبة فوقها قريبة.. والقريبة فوقها كلفَّتْ.. والكلفَّتْ يمشي ويتلفَّتْ = الزول (الرجلين + البطن + الراس)

6. خمسة بُلْبُلات.. شايلات بُلبُلة.. شاقَّات الطِّليح.. ماشَّات دنقلا = أصابع اليد + اللقمة + الحلق + البطن

7. جاتْ تطفِّر.. أم عصَباً مصَفِّر.. الجُنون أخوانا.. والرسول مُقرانا = الخيل

8. الهَرْبَعَة.. أم كرعيناً أربعة.. إن قامت مشَتْ.. الدنيا انكفَتْ، وفي رواية أخرى (صفحة بور... وصفحة ميتات) = الفروة

9. شدراتي في بلادي.. جمُالي أبنَّهِنْ... وجمُال الناس أكلنَّهِنْ = بناتي؛ لا يتزوجهن أبنائي، ولكن يتزوجهن الأباعد

10. سوَّيتو صَريف... أبَى ما يقيف... قدنُّو خيول الرِّيف = الكضب (الكذب)

في انتظار المستوى الجاي ان شاءالله نشارك

عدد المساهمات : 247 تاريخ التسجيل : 12/11/2008

اها يا اسماعيل شوف ليك دليل تاني