ود الشوبلي ينوب عن أهل اعوض في الرد على محمد موسى

بسم الله الرحمن الرحيم

ود الشوبلي ينوب عن أهل العوض في الرد على محمد موسى

شاعر البطانة الكبير يوسف ود الشوبلي يتصدى للرد على الكوميدي الشهير محمد موسي... بسبب استهدافه لأهل العوض في أشرطة نكاته الشهيرة ... ( معليش نحن أهل العوض الرجعتولو الباقة !!! )

رسالـة بليغـة من أهل العوض مخصوصـة
للإبن الظريـف ... ود المـدن ود موسـى
بدور رد السـؤال لو باللغـة المهموســة
فينا نقيصـة، ولا الصورة جات معكوسـة؟
******

جبتَ الفتنـة، تعلـن حَرْبِ بى جاسوسـا
والسبب الفنيلة، الفي الوسـخ مدسوسـة
نحن نفوسنا في بحـور العفـاف مغموسـة
ميَّة غمسـة.. لاعار، لا دنس، لا سوسـة
*******

نحن أهـل العوض، والعـزة ما بنكوسـا
أصحاب سمتة.. وأصحاب فرسـةً موروثة
نحن أنعامنـا....بتعاف ترتـع المعفوسـة
ونحن جدودنا عادي بطيِّعـوا الجاموسـة
*****

إيانا أهل العوض..أهل النحاس أب رنّـة
أهل البَدرة والمهيـوب، وأهـل الشنّـة
أهل عـزة، وأهل سمتة... وعروض ومحنة
ناس الباديـة.. ناسـاً عشـرتن تتمـنى
******

نحن أهـل العوض حافظين عهـود ما خنَّا
للجـار والعشـير بي شينـة ما تعجلنـا
بيوتنا مسيد ضيوف،زمن العـدم ما بَخَلْنَا
وما بصـح الوليد.. في أعرافنا يتْجاهلنـا
*****

ونحن أهـل العوض لا تقينـا، لا تبدلنـا
واثبين كالأسـود...من واجبـة ما اتماهنَّا
في البر، في البحـر... تلقانـا وين ما كنّا
في قمم الرجـال كضب البمِسـو حِصِنّا
******

نحن أهل العوض في الحـالي والفـات كُنَّا
كـج شـرك الكلام في سيرنا ما بعطلنـا
بوْعِيـكْ كان دَقَسْ في أصولنا مِتْجاهلنـا
بنحسب في الجـدود ستين.. ومن غير إنََّ
*****

ربّونا الشيـاب.. فوق مامـا ما اتعجنـا
حافظين اللسان... حافظين كرامـة أهلنا
أشبال من أسود... في ضبعـة ما اتهجـنَّا
سايرين سير كرام ..لامـن نلاقي أجلنـا
*****

يا ود موسي، ما بواخـذونا بي بنـولِّـد
والمـا عنـدو رأي حقـو يتبـع ويقلَّد
لو مـا مخَّك المخمـور.. صحيـح متبلِّد
جامعـة موسكو ما جـابت دكاترة تولِّد
*****

ما راعيت شعـور الناس شعـورك فاترة
بتسيء للعـزاز.. أهل السيـوف الباترة
أَمَانة تَدخِّنك شطـة..ودموعك قاطـرة
ما سمعـت الولادة أتخصصـولا دكاترة؟
******

نحن أولاد عرب لينـا الشـرف والعـز
بنسرح بالرزق نحلـب، نصـُر، ونجـز
يوم الحـارة، والعركـة السلاحهـا يرز
ثابتين كالجبـال الشامخــة.. ما بنفـز
*****

المخسوفـة، والمرقوعــة.. ياها لباسنا
والمجلـوبـة، والـمقنيَّـة من ميراثنـا
الجـار والعشير.. من الكتـف لى راسنا
في المال والعروض تخشى الملوك من باسنا
*****

ليـه يا إبني بتـذم الرجـال بالعايلـة؟
ما بعشُّوا الضيوف تحت السحابة الشايلة
ما سْمِعْ في أم همج كاكوم عقيد الزايلة؟
ما سْمِـعْ بالنمر حرق الخديوي القايلة؟
*****

لسـانك فكَّ.. يا ود موسى مابتستامن
تشحن في النفوس من الغبينـة مُدامـاً
ما سمِعْ بالحرَايْر الفي البحـر بترامـن؟
العربي إن رقص ؛ألبـل قرونن قامـن
******

رغم الغطرسـة.. النافخاها حبة كاشـك
تلقى أصفـارنا أكبر من مساحـة داشك
شبعانين طحـين.. من الفطير ودراشـك
أخير تبعد بخاف من شوكنا يخرب شاشك
*****

ومهما زعمـت من عزة ونفـخ فشفاشك
أعلم طينّا أنصـح من تراب خشخاشـك
شوف ليك ناس رخاس تاخد عليهم فاشك
أول غلطـة؛ كان تنيتها بنعـل خاشـك
*****

أولاد العـرب... والغير عرب أخـوانك
إحذر واكترث... حاسب قوافي لسـانك
والرمي فوق جماعـتك... بالتعابير خانك
في نص البحـر بتدور تكـج صيوانك؟!
*****

نحن نضافنـا، يا ود موسي مو صـابون
نحن نضافنا فى عروض، والشرف مصيون
نحن نضـاف ضُراع بالدُّكـري المسنون
طيبين عُشـرة ... لكن للخصيم طاعون
*****

نحن سماحنـا مو كريمـات، ولمعـة لون
نحـن ولدنا عاشميـق عَكْسِ للعرجـون
لينـا عروض وسمتة بيحكمـن قانـون
سماحـة الزول يفرّج كربـة الممحـون
*****

نحـن دفعنـا يا ود موسـى ما جركان
وما بْنَتْسمَّـى بالجبنـة، وحليب الكان
نحن دفعنـا نوق.. أمَّـات سنامـاً بان
ونحن ضربنـا للعـوق انفجـار بركان
*****

نحـن إن قلنـا؛ بنقـول الكلام حقاني
وكان غنينـا، بنخت الشعـر فى معاني
عزيزين فى النسب.. من ذلة ما بنعـاني
نحسب فى الجدود ستين.. ومن غير عاني
*****

غبار الكبريـاء المـن المعـالم حاجـب
أحذر منّـو، لا ينَسِّيك حقوق الواجب
من أمثال تراثنا الفي العُـرُف والواجب
مهما العين تطول ما بتعلى فوق الحاجب
*****

عشان ما نغلط ونشيل النقط من شينك
أوعى تعضعض الناس البوضحوا شينك
هسَّه وقعت في الحَلَّة، ووجب تكشينك
شن ودّاكا لي شعـرا البطانـة تشينك
*****

الطامـع في كثيرة الغير قليلتو تضيـع
وسيد بيت القـزاز ما بيبدأ بالجدّيـع
بولاد الحديـد القاسـي في القطّيـع
العربي إن حرن؛ وسط المحاص ما بطيع
******

نحن أصلنا لا بنخـاف، ولا بنتهـدد
ولا بنكـل، ولا بنمـل، ولا بنتردد
للزول البخـون عُشرتنـا ما بنتودد
بنبقالو البلا الفي كل فِجَـة مَمَـدَّد
***********************