بلد مافيها غير شداد

بلد ما فيها غير شدَّاد ؟؟!!



تعالو نكرِّر التعــــــداد
نعدَّ الناس قراب وبُعاد
كبارنا صغارنا والأولاد
نشوف ليه انتو محتارين
ومابين تقلعو الأوتاد
نلاقي حقيقة فيها سواد
بلد صبحت رجل واحد
بلد ما فيها غير شدَّاد ؟؟!!
**********
شنو النقـَّة وشنو الكلمات
خلاص ما دورو تمَّ وفات
خلاص هدَّانا تنظيرات
وشبعان ديمة سفريَّات
شكاوي ولخبطة وحاجات
تخلي الكورة بس راجمات
ولمَّ خلاص جا ودَّع وفات
تجونا تكرِّروا الميلاد
بلد ما فيها غير شدَّاد ؟؟!!
*************
وطن كيف يبقى زول واحد
منو الفي بلدي زول جاحد
عشان ما تلقو زول ماجد
بلد فيهو العشـــــــم راقد
حنينو الفي القليب صاعد
رجال وحريم شباب واعد
يمين كل الوطن أسياد
بلد مافيها غير شداد ؟؟!!
**********
حليل بلدي وحليل ذاتو
وطن دافرات دميعاتو
رجالو خلاص تقول ماتو
يفرِّح ديمـــــة شمَّاتو
موشَّــح هم زعاماتو
وقليل البرعو حرماتو
وصبحت بس قياداتو
أخوي وأخوك وبالعدَّاد
بلد ما فيها غير شدَّاد ؟؟!!
******
خلاص ما تم لينا مُراد
ولا عرف الوطن أعياد
ولا في الدنيا فرهد وساد
حقيقة نقولها بي ترداد
ونصدع بيها في كل واد
لأننا للأســـف بالكاد
بقينا دلاهة عند شدَّاد ؟؟!!