اْمرك عجيب يا مغترب
شايل حقايبك ماشي وين ؟؟؟
ما الغربة طالت يامسيكين
وانت في نص الدرب
اْمرك عجيب يا مغترب !!
والناس هناك ماشايلة هم
لاهم خواجه ولا عجم!!
سكت ليه يامغترب؟؟؟
حاول اْجب؟؟
اْمرك عجيب يا مغترب !!
الناس وراك دفنت اْلوف
وانت جالس تنتحب
الناس هناك هزمت
طوابير الصفوف
وازدادو نجمات في الكتوف
وانت جالس زي خروف
لا فيك لبن لافيك صوف
شعار جميل مكتوب حروف
زول مغترب
انت يا اْبوي مين اللي زيك
انت مازول مغترب
لا ليك اْرض
لا ليك راْي
لا خطة اسكان لا حزب
انت عندك حزب واحد
اسمه حوّل
حوّل فلوس حوّل دولار حوّل ريال
المهم انك تحوّل
اْخوك وراك راقد تعب
جاك اتصال من ناس منال
يا اْخوي حوّل وماتطول
جدي الخضر عضو الكلب
يا اْخوي حوّل
في الشهر مرتين .. يا اْخوي حوّل
ود اللمين جاهو المغص
في الكليتين
خلآهو زي زول الكٍتب
يا اْخوي حول وما تطول
وجيب معاك طقم العشاء
ودهب الكضب
وانت جالس يامسيكين
و الغربة طالت
وانت في نص الدرب
مرت سنين فوق السنين
لا اشتريت قطعة اْرض
ولا سقفت الغرفتين
والحالة طين
يا اْخوي صلي ركعتين
بعد الفرض
يا اْخوي حول جيب قروش
وخاتم الجنيه للسيدتين
اْم العريس واْم العروس
ولا تقول فلنفترض
اْضرب خماسيك في سداسيك
واْضرب الطول في العرض
الغربة طالت
والعيال كبرت وجالت
وانت حالك يامسيكين
والله تغني عن سوْالك
والفكر مشغول
وشايل هم عيالك وين بتقراْ
والغريب كل الحكومات
في البلد تنكر نضالك
وحتي العيال في الجامعات
يامسيكين
بدل الجنيه تدفع ريالك
ومهما تكتب اْو تقول
هذا اختيارك
ومهما تكتب اْو تقول
هذا اختيارك
ومهما تكتب اْو تقول
هذا اختيارك
لا ليك راْي ولا هناك
من يرد ليك اعتبارك
شد حيلك واشتغل
عشرين شغل خارج مجالك
شد حيلك والثغور راجياك كتيرة
ست البنات صارت مديرة
ولسه ما جاها العريس
والبيت ملان
ناس محاسن وناس سميرة
يابا ماتخليك معصلج
وانت ماتخليك عويرة
وما مهم ود اللعم
ومامهم من القبيلة
المهم اْبقي راجل
وما اْكون زولا خميلة
اْلم اْقل اْمرك عجيب يامغترب ؟؟
جيت شباب تلبس خفيف
حتي في عز البرد
بعد السنين الجلود اتكرمشت
واْصبحت ود عم القرد
وآخر المطاف السنين
صارت عجاف
شالوك مقفل في طرد
وآخر المطاف السنين
صارت عجاف
شالوك مقفل في طرد.
اْلم اْقل اْمرك عجيب يامغترب ؟؟
اْلم اْقل اْمرك عجيب يامغترب ؟؟
الإثنين 07 يناير 2019, 9:08 pm من طرف عبدالرحمن قدالة
