شاي بي لبن

موضوع: شاي بي لبن الأربعاء 02 فبراير 2011, 10:24 pm

(شاييك باللبن)
واحد في شاهييك باللبن
برادك اللون السواد
وأنا سود أيامي الزمن
قنانتك العطر البفتك من يباس عمري الحزن
وأنا يمة مليت العذاب
كوسيني في عينيك سكن
واحد في شاهييك باللبن
وأنا هسي بتقريف دموع
مافضلت دمعة عيون
مربوط لسان حال الكلام غيرك ولا قادر أكون
زمنآ مكلفت بالوجع
مفتوح علي شارع الجنون
عينيك مرفأ الإنتظار
راحة المسافر في الظنون
أنا داير أقولك جملتين
حطب العواسة حذاري منو عماكي ما خلالي عين
قدد مسام روحك تعب
ملأ دفتري و
ملأ دفتري الملاكي دين
ملعون أبو الما بفقدك
وإعرف زمانوا بلاكي شين
وأنا داير أقولك يا الحنينة
ذي التكنو غناك معاي
يايمة هداني التعب
فرتق حبال صدري الجواي
يايمة ذي ما قلت ليك
لقيت قمر ليلي و سماي نوري ووهج ضلمة حروفي مصب كلامي ومنتهاي
ذي التقول الما كان في شئ
فكاني في أول طريق
والريد عذاب ما بتمشي
سال الدمع يا يمة رقراق
قشقشي وبعد المتاهات الودار
خليني جنبك أنتشي
وأنا يمة ما خليتلوا شئ
والله سكنتوا الوريد
والله ما هلا الصباح قبال يدخل لي جسمي ريد
والله كل ما يكون حداي أنا قاعد أحس الدنيا عيد
حزن المسامة الشابي في جوف الحكاوي تكون سعيد
وأديني شاهييك باللبن
خليني أظبط رأسي جنبك
وأعرف إنو شنو الحصل
أنا يمة سكنتوا العروق
ختيتوا في جوف المقل
وأنا يمة شلتوا رذاذ كلام
ما إحتجت لي حتة وحل
شلتوا ومشيت زاد أمنيات فرح الغناء وكان الأمل
هسع أقبل أمشي وين
هسع أقبل أمشي وين
وأرجع أقول للناس شنو
هي الناس كلامها مسيخ وشين
وينوا الكتبتوا علي دماي
سميتو ضوء ليلي الحنين
ولا اللهيب الفي حشاي
أتناسي وإبرد لا متين
ناوليني شاهييك باللبن

واللة يا ود الخالة قصيدة عجيبة وكمان شاى اللبن المغنن داك ريحة الغنانة طاقة
واللة يا ود الخالة شكلك الشوق كاتلك واذيدك شوق للبلد حليل القعدة فى بيت ست الكل اومنا زينب ربنا احفظة وادية العافية واللمة بعد المغرب لشاى اللبن وكل الاحباب والاقارب قاعدين

موضوع: رد: شاي بي لبن الخميس 03 فبراير 2011, 12:11 am

ياسلام ياودالخاله طريتنا شاي المغرب والقعده مع امنا زينب والخال ابوجاكو والطيب وبكرى وخالد وهلما جرا الله يديها الصحه والعافيه

قصيدة رائعة يا ود الخال.... ذكرتني بقصيدة خالك محمد حسن حدباي (كفتيرتك)، وهي منشورة في هذا المنتدى