هيا بنا نتعارف

الإخوة أعضاء منتديات العريجاء العامرة، عايز الليلة أكلمكم باللهجة العامية السودانية عديل كدا!!!! وأقول ليكم نحن أسرة واحدة في المنتدى دا، وكلنا أهل وأولاد حلة واحدة، وعشان نعرف بعضنا، ونمد بيناتنا جسور التواصل والتفاعل، لابد من تحريِّ الوضوح والشفافية عند تسجيل أسامينا في المنتدى. لأننا لاحظنا تسجيل بعض أعضاء المنتدى بأسماء حركية، ورموز ومعميَّات، حاوي ما يقدر يعرفها!!!

وأنا أقول بدل التعامل بمثل هذه الألغاز والطلاسم، الواحد حقو يكتب اسمو عديل كدا (اسمو بالكامل أو اسم الشهرة المعروف لدى الجميع)، سواء كان ذلك بالعربي أو الإنكليزي. بالمناسبة العضو (mosulaiman) هو أخوكم/ محمد عمر إبراهيم سليمان، المقيم بالسعودية.

لاشك أن لكل إنسان كامل الحرية في أن يستعمل ما يشاء من الألقاب والكنى، والأسماء الحركية والرمزية، ولكن حبذا لو كتب بوست صغير يعرف فيه إخوانه في المنتدى من أعضاء وزوار ومتصفحين بأنه فلان الفلاني ابن علان العلاني. ولما الناس يتعرفوا عليهو، بعد كدا ما في مانع إنو يستمر في التوقيع باسمه المستعار أو اسمه الحركي.

أنا ما قلت الكلام دا إلا لأننا كنا نتساءل في حيرة؛ من هو (كابوكي)؟! ومن هو (khojalab)؟! ومن هو (SO2)؟!! حتى أطلَّ علينا فجأةً، ودون سابق إنذار، من أطلق على نفسه لقب (ودالعريجاء)!! تمام إنت ود العريجاء، ومن أعز أولادها كمان، لكن العريجاء أولادها كتار، إنت ياتو فيهم؟؟؟!! يا أخوانا عشان ما نكون زي الجماعة القاعدين في ديوان واحد، وطاقين الحنك طقة جد، وآخر ونسة وقرقراب، لكن ما في أي زول عارف اسم التاني!!!! وبالمناسبة دايماً الناس في منتديات القرى والمدن والأحياء الواحد بكتب إسمو عديل كدا عشان الناس تعرفو وتقدر تتواصل معاهو.

ولا بأس باستعمال أسماء الشهرة والألقاب المعروفة لكل الناس، مثل رياض، أبو رجيلة، النعيم، أب كدوك، يور، ود الحاوي، ود رزوق، قضارف، أبو الجنون، أب لبب، رودس، أبو الليف، الخبير، ود سكوت ... الخ.

أرجوكم ما تفهموني غلط!! وما تزعلوا مني!! واقعدوا عافية.

والسلام عليكم ورحمة الله وبركاته،،،