[
هل مسلم اسماعيل البشير إذا سمع قصيدة المنجل المركوز
لشاعر طابت الاستاذ عبدالباسط عبد العزيز
بصوت الفنان الأمين عبدالغفار
هل تحرك فيه ساكن ويفهم منها حاجة
********
المُنجَل المَركوزَ
********
سلامْ يالمنجل المركوز على ضَهرَ البلد تِقياتْ
ومرحبْ بالترسْ ناكوسى يدفِقْ صُرة البِلداتْ
سلامْ للجَنَى البَدَّر زَرعْ جَدعَـاتْ …
للباجور عُمومْ من سوبا لى بَركاتْ
********
نَعَمْ إنو البلد نَيـَّلْ شِربْ من تُرعتو الجَرايَّة
إيدَياتِكْ على الفايتْ البعيد دنّاية
إنتى لَتيبَة إنتى شَـرايَةْ …
إنتى كِسـيرة فى مُخلايَة …
مُخلايةَ الجَنَـى البَدَر بعد ما صَلى …
شَـالْ سَلوكْتو والجَرايَّة …
إنتى التايَة
********
إنتى كَديبَة الظُهـرى الرَزَمْ قِـدَّامى
حِـنْ أخوالى جُود أعمـامى
إنتى المَسْـرة فى الدَغَشْ أبْ سِقيطـاً حامى
********
إنتي جنينة تمزج للرهد ألوان
إنتى الخَلوة فاتِح بابا لِلضيفـانْ
إنتى مَراحِـبْ أهلاً طالعَةْ مِنْ ديـوانْ
********
يا مُسدار الشَالَنْ ليلَّنْ رَتَعنْ …
ركَزَنْ فوقْ دانقَة ود حامِدْ
يا خَلواتْ بالضيفْ إدَفَّـنْ …
مِن زِيفة الصَـقطْ المِتهاوِدْ
أضربوا الكَفْ تِمـوها جَرايِدْ
********
يا جِنَيَّـات الوادى الرَّاقِـدْ
يا كَتلَةْ صافية وكَتْفِيــةْ
ويا مُهْـرةْ حَبُوبتى رِقيةْ
فيكى سُيوفْ السَوُ الدَّيَـةْ
وقَرضُوالفَزْعـَةْ القِـدَامِيَّةْ
********
يا عَمَّ الهادى عَقَـبْناكُم شِرِبـنَا قَـهاوى
دخلَنْ فُوقنا دُعْجَنْ .. قَفَرنْ بى مَهاوى
وبى عديلة الله البيضاء
قَـجَّتْ فوق فُرقَانَة الفَـرْحَـةْ
ورَقَصـتْ نِعْـمَةْ البِتْ السَـمْحَة .. لون القَمحَة
وبَشَّـتْ فوق وِديانَّا الفرحة
تباركْ الله … يا رسُول اللهْ
مِنْ عِينْ الحَسودْ خَـلق الله …
يا رسول الله
********
والله يا طِينَة جزيرتى الخضراءْ
لِغيرِكْ إنتى ما غَنيتْ بِدوبايَة
ولغيرِكْ إنتى مابنكَتِبْ حَرفـاً
يسيلْ مُرتاحْ على دَواية
لِغيرِكْ إنتى ما حسيتْ إنو الدُنيا سَوَّاية
********************
كما أرجو تشرح للجيل الجديد ملحمة طه وريا للشاعر العبادي
لانهم ربما لا يعرفون العوس
وهل يفهمون هذا المقطع الجميل على لسان المك نمر مك الجعليين
حيث قال مخاطبا الشكرية
بقيتو رجال تغيرو تصلو لي عن وكري
يا قراضة القبائل النص جمعكم مكري
البيناتنا خربت أرجو عاد عوس فكري
الإثنين 07 يناير 2019, 9:08 pm من طرف عبدالرحمن قدالة
