من أعجب العلاقات العريجاوية - علاقة أبي ممدوح مع الكدادكة !!

من أعجب العلاقات العريجاوية
(علاقة أبي ممدوح مع الكدَادْكة!!)

علاقة أبي ممدوح بالكدادكة من أعجب العلاقات الرحمية العريجاوية وأكثرها تشابكاً وتداخلاً... وبما أن أخاكم الذبيح هو أحد نسابي العريجاء المعروفين، وقد شهد لي بذلك الخال عثمان الحسين صباحي، حين قال لي ما معناه: (إنت في الحساب أنجض من رياض!)، وهذه شهادة أعتز بها وأفخر وأتسامى على الخال رياض، على الرغم من حيازته لشجرة النسب العملاقة التي تفصِّل أنساب جميع أهلنا محس العريجاء....
أقول بما أنني نسَّابة العرَّاجة في هذا المنتدى فسوف أتصدى لشرح هذه العلائق المتشابكة، بشيءٍ من التفصيل.... وقد انتبهت لهذه العلاقة حين خاطب بدر الكدك أبا ممدوح بقوله (يا ابن خالتي)!!
(أبو ممدوح) هو كوكب المنتدى الزاهر سراج الدين الحسن، و(الكدادكة) المقصودون هنا هم أحفاد عمنا الكدك من أبنائه الكبار، الأشقاء الثلاثة أحمد وعلي وآمنة، وأمهم هي (طيبة بت عبد الله ود الضو)...

1. أولاد علي ود الكدك (رحمه الله) ... ديل من ناحية ببقوا لي سراج الدين أولاد خالته، لأن والدتهم (طيبة بت أحمد) هي بت خال والدة سراج الدين (أسماء محمد عبد الله) فالأولى هي ابنة عمنا أحمد ود علي ود المحينة، والثانية هي ابنة عمتنا آمنة بت علي ود المحينة، وهما أشقاء من أب واحد وأم واحدة....
ومن جانب ثاني سراج الدين ببقى لي أولاد علي ود الكدك ابن عمتهم... لأن والدة علي هي طيبة عبد الله الضو، ووالد أسماء (أم سراج) هو محمد عبد الله الضو، وهما أشقاء من أب واحد وأم واحدة....

2. أولاد أحمد ود الكدك (رحمه الله)... ديل سراج الدين ببقى ليهم ابن عمتهم، تماماً كما هو الحال بالنسبة لأبناء على ود الكدك، إذ أن على وأحمد أشقاء...
ولكن من ناحية ثانية أولاد أحمد ود الكدك ببقوا لي سراج الدين أعمامه... لأن والدتهم الحرم بت ود إدريس هي خالة الحسن محمد علي (والد سراج) فهي أخت أمه زينب محمد الشايقي (أخوات بنات أم) وأمهما هي (آمنة بت عبد الله) شقيقة منوفلي ود عبد الله (عليهم جميعاً رحمة الله تعالى)...

3. بنات آمنة بت الكدك (رحمها الله)... هن بنات عمي عبد الجليل الثلاثة، القسم (في القوز)، والحرم (في أم درمان، وهي نسيبة سراج الدين)، وحسنى الداية (في العريجاء)...
البنات ديل سراج الدين ببقى ليهن ابن خالتهن بنفس حساب أولاد علي الكدك وأولاد أحمد الكدك....
ولكن من ناحية تانية هن ببقن لي سراج الدين خالاته، لأن والدهن عبد الجليل ود علي ود المحينة (رحمه الله) هو شقيق آمنة بت علي ود المحينة والدة أسماء (أم سراج الدين)....

شفتوا جنس الشربكة دي كيف؟؟؟!!
وشفتوا النسَّابة بتاعكم ده رهيب كيف في تفصيل الأنساب، وسرد السلالات والعلاقات الرحمية بين كافة أهلنا العراجة ؟؟؟!!

هههههههههههههه لا والله ماف كلام ياخال ربنا يديك الصحه والعافيه ونسّاب مافي كلام

تسلم علي المعلومات الجميلة ومفيدة ودي حقيقة وشربكة شديدة

لقيت خالك كيف يا سراج ؟؟؟!!

والله ما في اي شخشخه

تسلم يا غالي... وآهو نحن مطمئنين على العقاب طالما إنكم إنتو موجودين !!!!