رحبو معى بالعضو الجديد عمر

الفين مراحب بالخريف الجانا
مو رعد بكضب رشو ما بغشانا
مطرا بلو ظاهر زى تقول فى بطانا
الفين مراحب بالبدر فى دجانا
مو برقا يلوح بى ضمو ما عمانا
قمرا بق ظاهر للسمر نادانا

مرحب حباب عمر اتفضل على البيت الوسيع بيت اهلك العراجة
اقعد معانا تحت شجر الخور الظليل دا وسمعنا نمك فرج علينا ربنا افرج همك
يلا ورينا ابداعاتك وخفشاتك
بس يا ريت تعرفنا بنفسك اكتر يا عمر

حبابك يا عمر في دار أهلك العرَّاجة
النارن تووقد للضيوف سرَّاجة
وإت كاب الرفيق، والعاطلة ياك درَّاجا
حلال للمشاكل، والكرب فرَّاجا

مرحب بعمر الفاروق في راكوبة أهله العرَّاجة، أم همبريباً ضارب، وأم زيراً مليان ونداهو يهتف، وأم بُناً ريحة قلوتو تجيب الضهبان، وأم هباباً يشهي الزول الرقدة، وأم ونستاً تنسي الهموم وتفرح المحزون....

اتفضل لي جوة يا عمر، وصنقر ليك فوق بنبراً وهيط في راكوبتنا دي، وما تنسى تعرفنا بنفسك عشان يتم التعارف ويتحقق التآلف....

كنت مع الدكتور عمر ليلة أمس وجئته بالخبر فكنت اريد ان اكتب الموضوع بنفسي لكني نسيت الباسويرد فسعد الدكتور بسعادتنا وتحمس وطوالي سجل معنا كعضو فمرحبا به بعد أن كتبنا الموضوع كتب داخل البوست الخال اسماعيل ووقتها كان زمن دوام المركز انتهي ،وتفاجئنا بأن الخال توقعه اخاه الفاروق فضحكنا انا وعمر وقلت له دعني ارحب بك فرفض (يبدوا لي ان الدكتور له سابق معرفه بالخال ابو شيماء)

بكري ابراهيم كتب:: كنت مع الدكتور عمر ليلة أمس وجئته بالخبر فكنت اريد ان اكتب الموضوع بنفسي لكني نسيت الباسويرد فسعد الدكتور بسعادتنا وتحمس وطوالي سجل معنا كعضو فمرحبا به. بعد أن كتبنا الموضوع كتب داخل البوست الخال اسماعيل ووقتها كان زمن دوام المركز انتهي ،وتفاجئنا بأن الخال توقعه اخاه الفاروق فضحكنا انا وعمر وقلت له دعني ارحب بك فرفض (يبدوا لي ان الدكتور له سابق معرفه بالخال ابو شيماء)

ألحق يا ود عنتر؛ أتاري العضو الجديد الكنت مروِّبو ليك دكتور في مركز صحي العريجاء، واسمه عمر عبد القادر، وهو ليس عمر البشير، ولا عمر السر، ولا عمر إبراهيم بابكر (بقادي)، ولا عمر حدباي، ولا عمر عبد الله البشير، ولا عمر إبراهيم الهادي (أبو قدامة)...

مرحباً بعمر ومرحباً بجميع أفراد الطواقم العلاجية والإدارية العاملة بمركز صحي العريجاء، الذي فرحنا بافتتاحه من قبل، فهللنا وكبَّرنا ونظمنا روائع الأشعار....

دكتورك خبير في الطب... وعندو براعـة
سمِح البالطـو فوقـو، ودَرْعَـة السماعة
أرضِيْتَك رخام.. غرفك عجبنا وسـاعـا
والبغَشـاك بِطيـب، منَّ الألم في ساعـة
***********************
دكتـورك بفـوق ابن النفيـس والرازي
ماهـر وقلبو طيـب،وللمريض ما بكازي
مستوصف رحـاب..لي مستواك ما بوازي
ريَّحـتَ المريض...من سفـرة العـزازي
***********************
حـدا الميـدان، وغـرب الثانويـة مقرَّك
وللكايـس العـلاج، طـوَّالي عـاتم دَرَّك
خيرك شفنا فاض، إن شاالله ما نشوف شرَّك
يا مركـزنا، يـا البي دم قلوبنـا مَمَـرَّك
***********************
عيادتك مفخـرة.. وفيها الدكاترة تلاتـة
والناس من بعيـد بتجيـك على انجلاتـا
جميـع مُرَضَا البلـد، داويتـا من علاتـا
ناس الحلـة... والغرابـة... والفـلاتـا
***********************

اهلا وسهلا ويا الف مراحب بيك يا دكتور عمر
لقد فرحنا وانشرحت صدورنا وسررنا بقدومك الى
منبر العريجا العظيم وهو منبرك ولاجلك نفرش الارض
بالزهور ونفتح لك قلوبنا بمحبة وصدق ونقول لك مليون مرحب
وانت ماك ضيف سيد بيت ودار اتحكر على الكرسى الوسيع
واعزم الجاين ونتظر منك الكثير يا دكتور عمر لتسعدنا بكلماتك وكتاباتك
واحرفك التى تتدفق زهبا من بين اناملك

وفقك الله وسدد خطاك

طبعا يا ود عنتر والد د:عمر العم عبدالقادر هو دفعة الخال اسماعيل درسوا سويا في المناقل

تسلم يا بكرى ابراهيم واديك العافية على الاجتهادات الكتيرة
وانت دايما مجتهد وربنا اوفقك

تخريمة

لكين يا بكرى كبرت علينا الخال اسماعيل
معقولة دفعتو اولادن دكاترة يا ربى الخال اسماعيل دا نديد من

بكري ابراهيم كتب:: طبعا يا ود عنتر والد د:عمر العم عبدالقادر هو دفعة الخال اسماعيل درسوا سويا في المناقل

كلام ناقص ومبتور يا بكري...

يعني دكتور عمر ده أبوه اسمه عبد القادر كده بس... طيب ياخي على الأقل اكتب لينا اسمه بالكامل عشان نذَّكر زميل دراستنا السابق ده الكان بيقرا معانا زمان في المناقل !!

عموماً مرحباً بابننا عمر في بلده الثاني العريجاء، ومرحباً به بلسماً طبياً يشفي الأسقام، ويخفف الآلام، ومرحباً به يراعاً خلاقاً في منتدى أهله العرَّاجة....

يا خال هو : عبدالقادر ود الفكي ابراهيم دفعتك إنت واستاذ بله ،شقيق النعمه زوجة الوسيله الذي كان يسكن العريجا ، والد مجتبي والنذير وعبدالقادر وغفاري وبيته في العريجا يسكن فيه حاليا الهادي اخوي ، وعبدالقادر مقيم الان بدولة الامارات _ العين ولو عرفته سوف نرسل لك رقم جواله ،قصذنا معاك

بكري ابراهيم كتب:: يا خال هو : عبدالقادر ود الفكي ابراهيم دفعتك إنت واستاذ بله ،شقيق النعمه زوجة الوسيله الذي كان يسكن العريجا ، والد مجتبي والنذير وعبدالقادر وغفاري وبيته في العريجا يسكن فيه حاليا الهادي اخوي ، وعبدالقادر مقيم الان بدولة الامارات _ العين ولو عرفته سوف نرسل لك رقم جواله ،قصذنا معاك

جزاك الله خيراً يا بكري، ونضَّر وجهك، وسقاك من سلسبيل الجنة.... ما قصرت تب، وكفّيت ووفّيت، ومليت الكباية لامن دفَّقت...

عبد القادر إبراهيم محمد، من قرية سعادة الكواهلة (قُرادة قديماً) هو أخي وحبيبي وزميلي سابقاً بمدرسة المناقل الأولية الغربية (ذات الرأسين) وكذلك بمدرسة المناقل الأميرية الوسطى (مدرسة المناقل الحكومية الثانوية العامة (1))، وهو فعلاً شقيق النعمة بت الفكي إبراهيم، زوجة حاج الوسيلة ود يوسف (رحمه الله)، ووالدة المجتبي والنذير وإخوانهم. وله شقيق آخر اسمه حمد، كان له محل لبيع وتصليح الساعات بالسوق الشعبي في الخرطوم....

يرجى إرسال رقم تلفون عبد القادر، ويرجى الحرص لاحقاً على تمليكنا الحقائق كاملة والمعلومات غير مبتورة... وعندنا (المسابقة العريجاوية الخامسة) يرجى محاولة الإجابة عليها، ولو عن طريق الاستعانة بصديق، ويرجى إحاطتنا علماً بآخر أخبار مشروع كهرباء العريجاء !!....

» رحبو معى بالعضو الجديد عبد الغنى
» رحبو معى بالعضو الجديد ابو ممدوح
» رحبو معى بالعضو الجديد القناص
» رحبو معى بالعضو الجديد ابو نبيل
» رحبو معى بالعضو الجديد مبارك خليل ساب