بينما كنت أجهز نفسي صباحا للخروج من المنزل متجها إلي الصحيفة قالت لي زوجتي وهي تسألني :ما مشيت لي حاجة نفيسة عشان تعزيهم في وفاة حاج عبدالمنعم ؟!
وفاة شنو؟
حاجة نفيسة جاتا جلطة وراقدة في المستشفي.
معقولة ؟ المرة دي والله مسكينة .. راجلا حاج عبدالمنعم فراشو يا دوبك إترفع
ما هو الفراش ده ما ذاااتو المصيبة!!
مصيبة !! ما فاهم حاجة
حاج عبدالمنعم تدرج كموظف بنك حتي صار مديرا لأحد الفروع قبل وصوله لسن المعاش قبل سنوات قليلة متزوج من نفيسة زميلته في العمل قبل أكثر من ثلاثين عاما أنجبا خلالها عددا من البنين والبنات . لم يكن لحاج عبدالمنعم مشاركات إجتماعية بل كائنا (بيتيا ) ما أن يعود من عمله بالبنك ويقرش عربيتو فهو لا يغادر منزله إلا لأداة صلاة العشاء بمسجد الحي . من صفاته أنه كان هادئ الطباع حسن الهندام خفيض الصوت يتحدث إليك همسا ، توفي بصورة مفاجأة قبل حوالي أسبوع .
كيفن الفراش هو المصيبة ؟؟ ما فاهم
طيب النحكي ليكا:
قالو ليكا تاني يوم للوفاة .. والبكاء حاااار والنسوان ديل يعملو ليك في البدع ونفيسة دي تردح وتشيل وتوصف . الليلة وين يا الحاج الصلاي ..خليتني أنا والمعاي
الليلو وين يا الأمين البامنو هو الملايين
وووووب يا المثالي المشيت خليتني في حالي
وووووب يا الواضح أب كلامن ما فاضح
الليلة وييينك يا الأرباب الماك كضاب
الليلة وييينك يا الحنان الحافظ للقرآن
ووووووب ووووووب وووووب
حاجة نفيسة تشيل وتردح والدموع دي ما تديك الدرب والنسوان المعاها شغالات ليها كورس قالو ما يشوفو ليكا إلا (مرا) طويلة وعريضة وقيافة.. التوب ما توب ..واللبس ما لبس.. والحنة ما حنة والدخان ما دخان .. تدخل ليك عليهن ومعاها تلاتة بنات الشعر كيفن والبلوزات كيفن ومما دخلن قعدوا يصرخو بي أعلا صوت لحدت ما وقفو ليكا بيت البكا علي فد كراع...
أها وبعدين ؟
بعدين بعد ما أخذن بكيتن .. وكل واحدة شربت ليها كباية موية باردة مشن قعدن بعيد .. يتخجخجن ويبكن والنسوان ديل كووولهن سابو البكا وقعدن يعاينن ليهن !
أها وبعدين ؟
أها قالو أخت حاجة نفيسة الصغيرة قالت ليها برااااحة في أضانا : إنتي النسوان ديل من وين ؟
قامت حاجة نفيسة ردت عليها قالت ليها :يعميني قبال دة ما شفتهن !
أها والحصل شنو ؟
الحصل إنو النسوان قالن لي حاجة نفيسة أمشي أسألي المرا دي وقولي ليها إنتي منو ؟
قامت الحاجة مشت علي المرا وقلدتا وقعدن يبكن زييييين وبعد ما قعدن في الواطة ومسحن دموعن قامت الحاجة سألت ليك المرا .
قالت ليها : ما إتعرفنا علي بعض يختي !!
أها المرا قالت ليها شنو؟
قالت ليها أنا إحسان زوجة المرحوم علي سنة الله ورسولو وديل بناتو هادية وهديل!
وده الجاب لي حاجة نفيسة الصدمة وجاب ليها الجلطة ؟
لا لا.. حاجة نفيسة كانت متأكدة من المرحوم عشان أصلو ما كان بيطلع من البيت ..طوااالي قالت للمرا قومي أمشي من هنا قبل ما نجيب ليكي البوليس يا مرا يا محتالة .. الحاج ده من بيتو ما بيطلع إلا يمشي يصلي العشاء في الجامع ويقعد ليهو ساعة ساعتين في (حلقة التلاوة)
أها وقالت ليها شنو ؟
قالت ليها ما أنا ذااااااتي (حلقة التلاوة) دي ذااااااااتا !!
الإثنين 07 يناير 2019, 9:08 pm من طرف عبدالرحمن قدالة
