مسدار للقتالى العميد الركن ود أبراهيم

مسدار للقتالى العميد الركن ود أبراهيم

أتحزم مرق ومد ضراعو للاصلاح
وأتلبب هموم عازه أم صباحا راح
البختف متل صقر الخلا أب جناح
معروف عوسو فى ساعة الدواس كلفاح

ما بضاره فى العركه العجاجه سحابه
بورى وشيهو للدوشكا الطنينو ربابه
مسنود قلبو بالتقوى ودعا التقابه
حامد ربو كان قسم الشهاده وجابه

اللضارو فى عرق الغبش والدين
قسموها البلد شقوها لى نصين
بعد ما كنا فى غوب الجنوب ظاهرين
مغصه أدوهو فى غفله وفراغة عين

ماهماهم الشهدا القبيل الراحو
والوجع السكن جوف اليتامى الناحو
بعد فات الكبير مغبون وقفى مراحو
خله الدين وراهو بقت الشماته سلاحو

بعد قال الجهاد مشروع وفرضة عين
ولمه عديدو من عزوة شقى الكادحين
قال الرقدو فى تراب الجنوب نايمين
لاطوف الأجر ركبوهو لا مركب شهادة الدين

أتحيرنا فى المشروع ومن كلام الساده
ما عرفناهو من الدين ولا ساكت عاده
ما دام البكاتل وخاتى عمرو وساده
يمكن أموت فطيس لا أجر لا شهاده

دفرو التلوب للعركه أم صقورا فرت
أخوان جدية الكجر أم قرونا جرت
وكتين قرقر القربين والنفوس أنصرت
ما شاف العدو صفحة كتوفن ورت

قالو كبارنا مضمون سوح قفانا مؤمن
شدو الخطوه دكوهو العدو الأتكمن
تاريهم كتار لانت حلوقن جمن
أدونا القرون وحلبو القشاطو مسمن

علوها السوح وفقه الستره قالو مباح
ساترين العيون بالطاره وغنى المداح
حليل ناس عبيد وود على الفتاح
مو قايلين بيبقى مال الغلابه مباح

لامتين الغبش حجر المعيشه يكدو
يرقعو فى الرزق ومال الضريبه يقدو
باروهو الصبر لا عن نهاية حدو
قصر الليد غلب حق الوجيبه نمدو

.

وفى غرب الجبال لليله ناس بتموت
فارشين الأرض وسو الحجاره بيوت
تطير نيفاشا الباقيالنا شوكة حوت
لا أنبلع الحلو وى سلامتو بفوت

قبيل قلتو الملك جنى الخسيس عقار
ببقى معانا فى صف البلد مختار
طلقتو أيديهو فى البلد النعايمو كتار
بقالكم سوسه ينخر فى العضام حفار

زمان قالو الدبيب صغيرو ما بتربه
وما سمعنا العبوب ضرعو المحين كبه
البقنص يكوس للشينه يوت يدبه
خيرا منو معدوم مابتشوفو الحبه

فارسا حدو فوق صغر النفس والضيم
تشهدلو البدودن فوق ضهور الغيم
عرف الحاله وقفت وليل ضلامه دهيم
مرق النسلو من صلب التقى أبراهيم

منو الغيرو بيخوض لهب أم لفيخ ويقوده
كباس دهمة الغوب البنحط دوده
ماك شبه الببيع شرف البلاد وعهوده
شن لماك مع الدفنوها فى حفر الطمع موؤده

واحدين للفساد جمله وفرد يشابو
واحدين شتتو الظلم البسم تيرابو
كان وقع القدر بالشين مسر كرابو
بنشوفن كتار قفوا الكراسى وعابو

شايلاك العيون وكادنين هواك حجاب
يعمر هوشنا وكت نسمع نباك أنجاب
يا بلد الزمن ضرعو البجف حلاب
شينه علينا باكر كور فزعنا أن خاب

للشعاعر ود البادية