مجادعة بالنميم

بسم الله الرحمن الرحيم

أبناء العريجاء يتغنون بحبها

وصلتني البارحة بعد منتصف الليل رسالة بالموبايل من الأخ/ يوسف محمد الأمين، من السعودية، وهي تحمل هذا المقطع من الدوبيت، الذي يتجلى فيه وصف العريجاء:

الــدَّبُــــــل بـاقــــيــــلا مــن قِــــــــــــــــدَّام
والـرَّايــَــات لِـزمـَـــــتْ يـمـِـــيـنـا تـَمــــــام
والـغـَـــرنـُوق اتـوَســَّــــــد شَمَــــالا ونـَــام
يا ودَّ المايْدة خنقتني العبْرة تِمْ باقِي الكلام

فرد عليه ود المايدة قائلاً:

الـرَّايـَـــات صـعــيـدا وســافِـلا الغـَــرْنــوق
والـدَّبُــل العَـجـيـب بـاقِــيــلا تـالا شـــروق
وكـت نـذكـَّـــرا ويكبس عـليـنـا الـشـــــوق
نســـوِّي تـمــنـِّح اليُـتـَمـَـــا وحنيـن النـوق

*الدبل والرايات والغرنوق ثلاث ترع تحيط بقرية العريجاء من ثلاث جهات

أبو مسلم/ إسماعيل البشير

Admin عدد المساهمات : 302 تاريخ التسجيل : 30/12/2007

سلام وجيناكم

الغرنوق ملا والناس بديدا انشدا
ورجع البلد ولدا للبنادر هدا
الدنكيب رقد في ضل الضحي وانمدا
وفي المثل القديم مابلقي غير من كدا

بسم الله الرحمن الرحيم

كان لي بكرة نحن معاكم:

ملسِّنة في الضَّهاري ونايمة في باجورا
وبالزين والسَّمِــح في كلَّ حَـيْ مذكـورة
مع الأنقـايـة لامَّــــة الفـرْدة والشابـورة
والخـبـر السـعــيـد، بـيَّـارة بـي بـابـورا

ود المايدة

بسم الله الرحمن الرحيم

يوسـف تاني تلَّـب في الساحــة

من كم قبيلة، وزي أولاد راجل اتربينا
في الميدان لعبنا، وفي حـرَّت اسَّامينا
لـو بالغـلــط رميتلك كلـِمْــتنْ شــيـنـة
النـاس تلومـك، وتقـول عليكا إضينـة

(أبو الأمين)

بسم الله الرحمن الرحيم

والله الليلـة كان جبتـو حوى النبي ذاتـو!!

راكـزة على الكنار الماشِّي راس الفيل
وحواشـاتا دايمـاً شـاربـة مويـة النيـل
الوديـان مخـرِّفــــة، والتبـوب بتسـيـل
وأبو دهيسير بتسـرح فيهو عنز الريل

(سماعين ود المايدة)

بسم الله الرحمن الرحيم

جماعتك لبدو لبدة جد

رامية ضليلا فوق سُكَّانا محس وكواهلة
جـمَّــام المكارم شــاربـة مـنُّـو وناهـلــة
دار عـزَّاً قــديـم لي كلَّ خـير مسـتاهـلــة
شاحد الله الكريـم إدِّيهـا عيشـتن ماهلـة

(ود المايدة)

موضوع: جيناكم الثلاثاء 18 مارس 2008, 8:20 pm

شعر قديم دي بره اللعبه لي ود امحد الامين

الناس جادوا ايام الرخاء الانعدن
ويوسف جودو زاد بعد الليالي اسودن
النيل العلي شاطي القبائل هدن
ماصع للحمول بعد الجمال ماصدن

بسم الله الرحمن الرحيم

أمير قعد يعرض برة الساحة، ويوسف ود أمحد اللمين لسع راكز

(يوسف أرسل هذا المقطع بالموبايل)

كلَّ حــيـاتـي تَـبْ مـا حــزَّنـتـني بكـيـت
جـانـي الـفـقـــر خـلاني لـيـهــا خِـتـيـت
فيها درسـت فيهـا زرعـت فيها سعـيـت
لو هلَّ السَّعـَد ليها برجِّعـني رب البيـت

(أبو الأمين المسعودي)

بسم الله الرحمن الرحيم

لمن نشوف آخركم شنو

أم قطناً مفرهـِـد ودابـو شايـل اللوز
ما بقارنوها بالشقلـة وحليلـة القوز
علي جاراتا دايماً شايلة كاس الفوز
حِسارا هَلكنا والدمْعات بسيلن جوز

(سماعين ود المايدة)

بسم الله الرحمن الرحيم

مسدار العريجاء قطع شوط بعيد

(يوسف أرسل هذه النمة بالموبايل)

بشوف الهـوير، بشـوف الفرع يا أحباب
بشـوف القبلي شايل وقام معاهو سحاب
بشم ريحـة الدُّعاش، وهوا النسايم طاب
حقيقـة وما خيال، ما تقـول عليْ كضَّاب

(أبو الأمين)

بسم الله الرحمن الرحيم

نحن نفسنا طويل يا أبو الأمين!!

البكَّايـة ترزِم فـوق تروسـنا رعـودا
والبِلـدات مكـدَّبـة، لا سِعِــد لا بـودة
قام العيش وعلَّج في العزاز والفودة
والسـيَّـالــة فـي وديـانـا خـدَّر عـودا

(أبو مسلم)

موضوع: وراك الخميس 20 مارس 2008, 12:03 pm

امسسسسسسسسسسسسك

برق البرق ساق ام رويق من سافل
نزل المطر شرب عاليها قبل السافل
رجع كور المراح من الصعيد والسافل
بلد عز الرجال مافيك وضيع لا سافل

بسم الله الرحمن الرحيم

يا ريت تبقو راكزين كده وما نلقى فيكم فزرة

ربَّـايــة الهـمَـــلْ يدِّيكي ربِّي العـافـيــة
فيـك كـرم الشمـايـل والمحـنَّـة الدَّافـيـة
ناسِك هاشَّة يوت للضيف تتِبْ مِتْلافية
والوَشْ منطـرح والنِّية دايمــاً صافـية

(ود المايدة)

بسم الله الرحمن الرحيم

يوسف المسعودي مولِّع نار

ما فيكي البقول لي ضيفو سِمْ انْطَمْ
فيكي البرمكي السَّكينـو بِتْسـيـل دم
الضُـل الرهين للجايـَة ما بْشيل هَـم
حَلاَّل الشِّــبـَك، مُقــنـَع بنات العـَــم

(أبو الأمين)

بسم الله الرحمن الرحيم

نزل في الحلبة فارس جديد اسمو الفاروق

فيكي نمينا واترعرعنا وعِويدنا انشدَّا
سماكي ظليل وأرضك طيبة لينا مخدة
يا العرجا التفوقي علي الجمال أم بـدة
عيناً تلحظك بالـرمـــح السنين تنـقــدا

عمر البشير (أبو ماجدة)

بسم الله الرحمن الرحيم

مش لو جبتو عمر، والله لو جبتو ود شوراني!

(دخلت العريجاء في منافسة محمومة مع كل من قريتي القليع والنو من أجل الحصول على تصديق حكومي بإنشاء مدرسة ثانوية، وكانت بانت (طرطشت) تدعم ترشيح القليع، ولكن العريجاء فازت في هذا السباق وحصلت على التصديق وأنشأت المدرسة)

شِلْتِ الكاس علي ناس القليـع والنـَّوْ
وبانتْ صوتا راح، يِبْسَـتْ لهَاتا كَـرَوْ
بنيتي المدرسة وكلَّ الفصول مِن ضَوْ
ختفـْتِ الجايزة شِلتيها وقبَضْتِ الجَّـوْ

(أبو مسلم)

بسم الله الرحمن الرحيم

الظاهر ناسك كبُّو الزُّوغة رسمي!!!

(الخير كلو قادم بمشيئة الله تعالى)

جـاتْـنـا الكهْــربـا، وبُكـرَة البَـلَـدْ بتنـوِّر
وبيَّـارة السُّــرور قبـْل الخـريـفْ بتـدَوِّر
يا الخيرِك دَنا، ووضْعـِـك دَوامْ متـطـوِّر
وراكِي جرِحْنا من لَمَعِي البُروق مِتْعوِّر

أبو مسلم (ود المايدة)

بسم الله الرحمن الرحيم

عمر البشير لا زال يجر النم:

ذكراكْ طيْبة في داخْل الفؤاد محفـورة
ميدانِك جنوبِك وفي الشَّمـال مطمُورة
فيكْ تبَّينا واترعْرعْـنا ولِعبْنـا الكـورة
أولادِك جَرارِقْ في كلَّ الدُّول منشورة

عمر البشير ( أبو ماجدة)

بسم الله الرحمن الرحيم

مسدارك جرَّ يا العرجاء أم جبيناً ناير

تبَرِك قام وشرَّ ملايتـو في الكاجريب
والرِّيحان فتَقْ، طلَقْ العطِـر والطِّيب
منايح الحِلَّة رتعـَنْ جمْ فريقنا قريـب
والضَرِع إنملا، وشبَّع جهالنا حليـب

إسماعيل البشير (أبو مسلم)

بسم الله الرحمن الرحيم

مسدار العريجاء شغَّال تش:

(أرسلت هذا المقطع من الدوباي أمس بالموبايل إلى كل من يوسف وعمر)

الخير دِيمَـــة فالِك، ومالْيَـة مِنُّو يَمِينِك
والجُود والكرَم غُرَّة وبَيَاض في جَبينِك
يا العرْجَــا المِخَـدِّر في مَلايْنـُو عَسينِك
قمـاري الذكْـرَى قوقـَن وهَـيَّجنُّو حنينِك

أبومسلم (ود المايدة)

بسم الله الرحمن الرحيم

فجاء الرد من يوسف مع نسمات السحر

الشـوق والحنين جُـوَّايْ تقـيـل بالحـيـل
قمَـاري الذكْـرَى قـُوقـَنْ وسهَّـرَنِّي الليـل
كل ما أطْرَا العريجا دمُوعي بِجْرَنْ سيل
أنا أبـوك يا الأمين،أنا ود عقيـد الخـيـل

يوسف محمد الأمين (أبو الأمين)

بسم الله الرحمن الرحيم

العالم ديل مالي بشوفم قطعوا الحركة:

طريـت الطلـَّة فوق شـدراً مغـتـِّي هويرنا
طريت الشقـَّة بالفسَحَة الصعيد لي بيرنا
طريـت مرقتنا يوم العيد، صغير وكبيرنا
طريـت الشـَّرْبـَة بالكوز الكبير من زيرنا

إسماعيل ود المايدة

بسم الله الرحمن الرحيم

جاء هذا الرد سريعاً من عمر بالموبايل:

طريت الضحوة في أبْ راشد،والضهريَّة في الخيران
طـريــت الـمـــرقــــــــة فـي العـصـــريـَّـة للـمــيــدان
طـريـت الونـســـــــة بالليـل واللـمـَّــــــة والجــيـران
طـريـت حـمــامـنا في الفـايـِظ، والزول يكون طربان

عمر البشير (أبو ماجدة)

بسم الله الرحمن الرحيم

هذه خاتمة مسدارك يا عريجاء

في الصفحة اليمين بالحبْ حَضَنتِ مدارسك
وضلِّك ساق بعـيـد، والمَوْلى زكَّى مغارسِـك
قبيل سيف النَّصُـر هـازَّابـو ديمــة فوارسـِك
والـعــــز الـمــأصَّـــل مـن جـدودك حارسـك

إسماعيل البشير (أبو مسلم)

والله ابداع وقمة الابداع من اهلنا العزاز الزينين ناس العريجا الطيبين ابداع من كل المتداخلين

على الطلاق لمن قريت نميمكم دا راسى دا كبر وشعرى كل شعره وقفت فى اتجاة براها

وشالتنى الهاشمية وعندى جلابية ام جيبين فى قعر الشنطة لبستة ليك . دقر يا عين من ودعنتر

وعندنا نجيلة فى الشركة كاربة قعدة فوقة وازكرت ليك البلد واكل البلد . ازكرت الغرنوق والدبل والرايات

والمشتل زمان والفرع وبرقان نمرة تسعة الغرنوق والسرحة فى بلدات حاج احمد رحمة الله علية

ازكرت القاشيت وشاى اللبن مع ناس على ود السمين وحرق الفول وسرقة العنكوليب والحمام فى ترعة الغرنوق

ازكرت الحومة فى المشتل واجى الطيب ود اللعيسر اسكنا سكة كاربة ازكرت ملاح اللوبة الحار داك

وقت تصب مطرة دقشية ازكرت لعب التويه ازكرت القنيص مع ناس التنقر ودلوك يا حليلكم يا ناس

العريجاء الطيبين الزينين ويا حليل القعدة على طرف الخور بالليل ويا حليل حكاوى عثمان ود فتح الرحمن

المهم اخده لى بكية بى مخاخيطة بى مزاج ونميت لى نمة كاربة حفظتة من المنتدى

حدب الحلة خرف وخدر الباجور

وفاحت ريحتو صندل وزعفران وبخور

الخلى الدموع من عينى جارية مطور

بريبا رتع بين ود عدول والخور