مجادعات ثلاثية بين ابو قدامة وخاليه

بسم الله الرحمن الرحيم

هذه بعض المجادعات التى دارت بينى وبين الخالين ابو مسلم وابو الماجدة فنتمنى ان تدور بيننا فى المستقبل ان شاء الله وكانت اولاها بمناسبة رمضان وبيان الفرق بين رمضان فى قطر ورمضان فى السودان فقلت

رمضان فى قطر ماضقنالو طعما لامع
حليل لمتنا والجيران حليل قعدتنا فى الشارع
حليل لقمتنا بالويكاب حليل تكيتنا فى الجامع
حليل ونستنا والاحباب حليل شيلتنا للشافع
****

فرد الخال ابو مسلم قائلا

رمضان فى قطر خيرو ونعيمو زيادة
قرأن بالنهار والليل قيام وعبادة
افطارات جماعية وهبات ورفادة
والعباد دموعا مبللة السجادة
****

ورد الخال ابو الماجدة قائلا

رمضان جانا الخريف العيناتو دايما كابة
للحين سماهو مزرقنه وامطارو هاطلة وصابة
فاتنا سريع زى خيل السباق الخابة
القرأن نهارو والقيام فيهو الصبى والشابه

****

وثانيها كانت المجادعات فى قريتنا الحبيبة فقلت

قريتنا الحنينة شوفتنا ليها زمان
لو بى أيدينا نقعد فيها زى ما كان
ونسة وضحك وحجرنا والديوان
لكن الظروف غدارة يالاخوان
****

فرد الخال ابو مسلم قائلا

قريتنا الحبيبة حنينا ليها شديد
وزى مايلوح بريق اشواقنا ليها تزيد
ترى المقدور وقع والفرقة ما بالايد
ويوم رجعتنا ليها الدنيا تصبح عيد
****

فورد ابو الماجدة قائلا

صبرك يابن اللاخت إن الزمان دوار
مشتاق للونسه والجلسة جوة الدار
من الشوق العليك كل يوم تقول مسدار
ماتخليك غشيم عيشك تمرقو عدار

****

وستتواصل المجادعات فى الايام القادمة ان شاء الله وانتظرو المزيد من الابداعات الشعرية التى سبيهركم بها هذا الثلاثى المتألق

السودان هذه الايام يضج بالمشاكل
المتضمنة فى انفصال الجنوب عن الشمال ولذلك كان من المؤكد ان نترنم فيه بالنميم

فترنم الخال ابو مسلم قائلا:

ياوطن الجدود بكرة بتروح فى داهية
ياحليل وحدة ترابك والعصور الزاهية
بعد ماضيعوك اهل القلوب اللاهية
جو يرضونا بى حججا عقيمة وواهية
****

فرد الخال ابو الماجدة قائلا:

المستعمر خطط ووضع المنطقة المقفولة
وحكامنا على الكراسى افكارهم مشغولة
فكوه بى بترولووخلولنا القطن والفولة
وابيى موقوتة يكفينا الاله من هولة
****

فرددت قائلا:

ياوطن الجدود جاتك سهامهم نايشة
لى فصل الجنوب من ناس رؤوسهم دايشة
يارب ياكريم فنش مرادهم والحكومة الطايشة
عشان مانرجع للحروب زى الوحوش الهايشة
****

المجادعات التالية كانت بسبب تأليفى لمسدار طويل عن الصوفية وكنت ألفته كله فى منطقة
بعيدة عن الدوحة تقع فى منتصف البحر قريبا من البحرين

فرد الخال ابومسلم قائلا:

لقيت حالول وجوها والنسيم المار
بقيت ترمى النميم وتولف الأشعار
الصوفية ديل نجضتهم بالنار
متين بتحن عليهم وتختم المسدار
****

وقال الخال ابو الماجدة رادا:

مسدارك طويل ماليهو حد بتان
فتيت الجماعة فتة الجيعان
نتحك ليهم خلى السليم مرضان
سهمك خفس الصوفية وثبتوا الكيزان
****

فرددت على الخالين قائلا:

سلامى للخالين الحيروا الافكار
لى شوفة نميمهم مابتشبع الانظار
الصوفية ديل ما نجضوا الانصار
والمسدار انختم وبرضوا ماشلنا التار
****

ارسلت الي الخالين كوبلى من مسدارى الذى الفته فقلت فيه:

دعوتنا ماها جديدة وللقلوب محبوبة
شفتوا السووا كيف للدعوة ما اعجوبة
جيل ملتزم سهاموا للشرك منصوبة
والتوحيد انتشر ياناس النوبة والمهيوبة
****
فرد الخال ابو الماجدة:

منهجنا واضح الكتاب والسنة ليهو دليل
مامعوج ولاضبلان نصيح ماهو البقولو عليل
شباب ذاكر المولى بالقرآن بقيم الليل
ماتابع للبدع والجهل خرافة النوبة والتضليل
****
فرد الخال ابو مسلم قائلا:

الشرك والبدع شانين عليها حربنا
والدرب العديل لى الله ياهو دربنا
والخلق النبيل من نبعو نحن شربنا
صافين غير عكر فاسق ولا بقاربنا
****

الحجاب والعفاف انتشر فى قريتنا الحبيبة ولاشك ان هذا خير كثير على الاهل فى القرية فألفت فيه المجادعات التالية ، ارسلت رسالة للخالين ابو مسلم وابو الماجدة قلت فيها :

الحجاب انتشر فى الحلة عامر سوقو
انطلق الخبر شمار الناس مدور فوقو
تلقى المؤيد ، وتلقى الفقد طايوقو
والحق منتصر فى القرية زايدة عروقو
****

فرد الخال ابو الماجدة قائلا:

الحجاب دليلو من الكتاب مو لف
والما تلبسو فى الحال تجيها الكف
العيب من ضعف التربية الما فيها تف
دايرنو اتوزع مجانى مايكون فيهو سف
****

فقال الخال ابو مسلم مترنما:

ياعمر الحجاِب حشمة وعفاف وعبادة
واللابسة الحجاب فى السترة ماخدة شهادة
حريم بتطبق السنة العديل مشهادة
ما مفتونة بالموضة ،ِ ومبارية العادة
****

مازالت المجادعات فى (مشروع الحجاب) تتواصل فقد ارسل الى الخال ابو الماجدة رسالة يترنم فيها عن الحجاب فى الحجاب فقال فيها:

جلبابن هيبة بتطرد المارد النعيل المايل
وسترة مخيفة للطامع اب لعابا سايل
ديل طبقن دين الله الاوامرو جلايل
تابعات طريق الامهات الطبقنو اوايل
****

فرددت عليه قائلا:

زينة البنات ماها المبرجة المفتونة
زينة البنات اللابسة الحجاب مصيونة
السنة مطبقاها , وبالكتاب مسنونة
وللحشمة والعفاف من زمن مفطونة
****

فرد الخال ابومسلم قائلا:
جلبابن وسيع ساتر المفاتن جملة
وبى سدل النقاب بقت الحشم مكتملة
ديل شانات على جيل التبرج حملة
ديل تابعات طريق حفصة وصفية ورملة
****

ألخال ابومسلم وابوماجدةوالاخ ابوقدامة لكم التحية والتقدير.الجدعات الثلاثيا رايعة .اسمحو لنا بجدعة واحدة عن الانفصال .خلهم ينفصلو والباقي البخلوكفانا.مانقص البحر من ملية الجركانة.وينوالخير المدفق منهم عمانا؟مابدرالضرع اكان الحلوب جيعانة

لاتزال المجادعات مستمرة بين الثلاثى فى الحجاب وجاء كل ذلك لما انتشر الحجاب والحشمة والعفاف فى قر ية العريجا
ارسل الى الخال ابو مسلم رسالتين قائلا فيهما:

طايعات ربهن ذاكرات صباح وعشية
تاليات الكتاب ومصححات النية
لابسات الحجاب والحشمة مية المية
ديل متأسيات بى أمنا جويرية
****

اما الثانية فقد قال فيها :

عفيفة وطاهرة مامبتبرجة ومفتونة
ست حشمة ووقار من العيون مصيونة
مزملة بالعفاف , اللؤلؤة المكنونة
سايرة على درب سودة وطريق ميمونة
****

فرد الخال ابو الماجدة مترنما :

طايعة الرب ست العفاف مصيونة
ماها العاصية ديك متبرجة وملعونة
لابسة الحجاب وبالجمال مشحونة
سالكة طريق ام المؤمنين ميمونة
****

فرددت عليهما قائلا :

حشمة وعفاف من الله جات مرهونة
ان سلم العمل فى الجنة فوق مركونة
ست البنات , يالبى العفاف مزيونة
موتى على طريق ام المؤمنين ميمونة
****

ايضا هذه مجادعات بين الثلاثى فى نفس الموضوع موضوع مشروع الحجاب وذلك لما ترك من سعد وفرح ملأ به دواخلنا فنسأل الله ان يتقبل من الجميع

ارسل الى الخال ابو مسلم رسالتين قائلا فيهما:

نقابن ضافى من حولو الخمار مسدول
وجلبابن حشيم , جامع الوساع والطول
هاجرات البدع , والمصدر المجهول
وتابعات سنة المن الله جانا رسول
****

اما الثانية فقد قال فيها:

ماكى الهابق الشاقة الفريق زواعة
راسية وحافظة ميثاق العفاف والطاعة
حجابك سترة من عين الصبى الطماعة
ياشمس الفضيلة , الفينا بق شعاعا
****

فرد الخال ابو الماجدة قائلا :

ماها اللابسة المحزق فى الطريق عريانة
ماها التمضغ اللوبان تسوكبو اسنانة
دى المن زيها محترمة اتقى انسانة
طاهرة نقية باغة العفة من اركانة
****

فرددت على الخالين قائلا :

ماها الكاشفة المفاتن للصبين باغية
لابسة الحجاب طايعة الاوامر صاغية
لابتلوس ولابتكوس بت للتبرج لاغية
خايفة من العذاب ويلو البموت طاغية
****