مسدار الحجاب في أبهى جلباب

بسم الله الرحمن الرحيم
مسدار الحجـاب
(أختاه الحجاب قبل الحساب)

ما أصلـو الحجـاب سُتْرة وعفـاف وعبادة
واللابسـة الحجاب في الحِشمة ماخدة شهادة
حـريم بتطبِّـق السُّـنَّة، العديـل مشهـادا
ما مفتونـة بالْموضــة، ومِبارْيـة العـادة
*******
طايعـات ربَّهِـن، ذاكرات صباح وعشيـة
تاليـات الكتـاب... ومصحِّحـات النِّيَّـة
لابسـات الحجـاب.. والحشمـة مية الْمية
ديـل متأسِّـيَـات.. بي أُمَّـنا جُـويريـة
*******
جلبابن وسيـع... سـاتر الْمفـاتن جملـة
وبي سدل النقاب..بقت الحشـم مكتملـة
ديل شـانَّـات على جيـل التبرُّج حملـة
ديل تابعات طريق حفصـة،وصفيَّة، ورَمْلة
*******
نقابِن هيبـة، من حولو الخِمـار مضروب
وإنسـانِن محصَّـن.. وبالعفـاف مزروب
أسباب الفـلاح شاقَّـات عليهـا دروب
وأفعال الفُجُـور..شـانَّات عليها حروب
*******
نقابِن ضافي، من حولـو الخمـار مسدول
وجلبابِن حشيم،جامْـع الوسـاع والطول
هاجـرات البِـدَع،والْمَصـدر المجهـول
وتابعـات سـنة الْمِن الله جـانا رسـول
*******
ما حـاكَـنْ فلانـة، البِطَّـريـق تتـبرَّج
تعـرِض في الْمفـاتِن، والخلـوق تتفـرَّج
عايشـات زي مشاعِـل في الظلام تتسرَّج
وتابعـات سُنَّة الفـوق السمـاوات عَرَّج
*******
خايلة الهيْبـة فوقِـن، وكل طبعـة جميلـة
والسُـنَّـة الْمشرَّفــة بشعِلَـن قنديـلا
صايْنات عِرْضَهِـن من كلِّ عيب ورذيلـة
وناشرات في البلاد حشمة وعفاف وفضيلة
*******
عفيفـة وطاهـرة، ما متبرجـة ومفتونـة
سِتْ حِشمـة ووَقـار، من العيون مَصيونة
موشَّحـة بالعفـاف، اللؤلـؤة المكنونـة
سايْرَة على درب سَـوْدة،وطريق ميمـونة
*******
ماكْ مَبْدولة، ماك مجْغوفة، ماك مَطْموسـة
دُرَّة فريدة، في بحـر العفـاف مغموسـة
آفـاق المحامِـد بيك تضـوِّي شُْمُوسـا
ناصْـرة شريعـةَ البشَّرْبُو عيسى وموسى
*******
ماكي الهـابِق، الشاقَّـة الفريق زوَّاعــة
راسيَة، وحافظـة ميثاق الأدب والطاعـة
حِجـابك سُترة من عين الصبي الطمَّاعـة
يا شَمْس الفضيلـة الفينـا بقَّ شعـاعـا
*******
مثبوت الحجـاب... بي حُجَّتـو وبدليلو
منصوص في الكتـاب، من الإلـه تنزيلو
الرجُـل الغيور،صاحـب القيم يا حليلو
يكسي حريمو حشمـة، ويبقى قدوة جيلو
*******
جسـم الْمـرأة عَوْرة، وكلَّكـم عارفنُّو
والبِتْ إن عِـرَتْ، سَتْر العروض كيفنُّـو
مصيرو الحَـيْ يموت، مهمـا كبر في سِنُّو
وراجيهـو الحسـاب الْمافي مهْـرَب منو
*******

واللة يا الخال اسماعيل مسدارك مجية تب
وما فية اى كلام ومفروض يدرس فى كتاب
المدرسة

وياء ريت بناتنا وكل بنات المسلمين
اعملن بيهو واتحجبن والحجاب ذينة
وذيو مافى

بس واللة يا الخال اسماعيل الذمن
العلينا دا الاولاد ذاتون دايرين
حجاب من اللبس الشين البلبسو دا

بالنسبة لبنات حلتنا ديل اللة
اخلى لينا بكرى ابراهيم الهادى
سنة وبحجبن لينا كلهن شغال
شغل جد فى موضوع الحجاب
ربنا اجعلو ليهو فى ميذان حسنا تو

يا محمد يا ولدي الله يديك العافية، ويكتِّر من أمثالك... لبس الأولاد كدي هسع خليهو شوية.. وخلينا نشوف حكاية موضات البنات الطالعة جديدة دي ... إنت أظنك ما سمعت بالتقليعات الجديدة:

· أديني حقنه.

· إظهار رقم.

· فصل الدين عن الدولة.

· مسكول.

· خارج عن الخدمة.

· شطِّفني.

· أوصف ليك بيتنا.

· الشريعة طرشقت.

بسم الله الرحمن الرحيم الحمد لله والصلاة والسلام علي رسول الله وعلي اله وصحبه ومن والاه .اما بعد . الخال العزيز : فقد أتحفتنا بهذا المسدار الرائع ، أسأل الله الكريم رب العرش العظيم أن يسير هذا المسدار علي خطي مسدار التوحيد الذي بلغ إنتشاره الأفاق فأينما تذهب تجد الناس يردوده ويحفظوه خاصة الشباب السلفي فهؤلا يقولونه في الحلقات واركان النقاش (الكولنق) ولقد إنتشز في الاونه الاخيره بواسطة الجوال .

» مسدار الحجاب - للشاعر إسماعيل المحينة
» مسدار شدر الهوير
» مشروع حملة الحجاب بقرية العريجا
» مسدار المزيرة (مزيرة فضل الله)
» مسدار سلام دار فور