يلا يا اخوانا سمعونا نمكم فرجو علينا ربنا افرج همكم

ود الشايقي أخويْ يا الغالي يا ابوصهيب
ويا دُخـري السنين.. حاشاكا من العيب
معروف بالشهامـة.. وبالكَسِب والجيب
وجدك كان قبيـل صنديد رجـال فَرَنيب

صدق القال قبيل حور العيون كتلنو
مابضوق عافيه زولا بى سهامن أذنو
واحدين بالغباين من قماحن جنو
وأنا تلتين عمرى راح وباقى التلت قسمنو

البوب. ليهن الفي الريف جمالن حار
درسن جامعه ما جابن جنيه وعار
لا مسحن كريم لا سون البوبار
سمحات بي ام لخوخه ودهنة الكركار

سماحة العفه والزوق والحديث الناقع
وديساً كل ما سندوهو ينهد واقع
تجهر ونورا يشلع من تلاته مواقع
جبينه وخدها وفاطر سنونا الفاقع

جبينك يندى حاجبك يندى
كفلك عالي تحت الهاف مياخد سندة
جوز عينيك كهارب الغيّرولو التندة
نهدك مدفع ألمانيا الضرب هولندا

ياقمري العصير يا فاري قيف لي شوية
ارجاني النجيك ........ واديك امانة قوية
إن زرت الحبيب ..... قوليهو صفي النية
ريدك في القلب داقيلو شاية قويييييية

يا طير القطا الدايماً محلّق فوقنا
ناديناك لمن جفّت مجاري حلوقنا
طالبنّك جناح نوصلبو لي معشوقنا
نشرب من دنان وصلو ونبلّل شوقنا

شايل ليلى بتقلب وأزوم من نارى
هلكنى الشوق والجرح الدميهو مجارى
يا الجدى الرتع وسط التبوس مضارى
مالك بالعناد رحت وقصدت ودارى

طرفى البقيم ليلى المكاجر ساهد
عارف أسبابى طامح الصدير الناهد
حالى البى يعلمبو الكريم الشاهد
عاشقك ضمه فى طيب اللذايذ زاهد

الليلـة الغميد طـار مني، قول يا كافي
بتقلَّـب على جمــراً بِهبُّـو الزافـي
بعد ما كُتْ مروِّق وفي الجسـم متعافي
ضُـقْ حال الغريق اللي الزبـد مِتلافي

جَدْيَ الريل جفل وأصبح نفور ومجافي
نشَّـف عيني، ودَّر صبري، زاد إتلافي
بعد ما كنتَ زي جمـل البجـا العنَّافي
ضُـقْ حالـة مبارك، وزنقـة القذافي

السيـل وهَّـط العالي، وعِنا الشَخَتور
وإتخلَّط رحـل ... عاد كبُّو مو معبور
الوادي الرَّفَس سقَّايـو في الصنقـور
ضَهبان سيلو في صدرو الشّدر مَدفور

للصفقة أم رسيس وقفَنْ بنات الحُـور
وكيف رص القزاز بِتلامَعَـنْ في النور
كفل البرمـي سيدو وباللِّجام مهجـور
فِيهِن بيْنة كيف شُوفتَ المنارة أم سُور
*****************

مرقت مِنَّهِن راخيـة القدم في فتـور
وبِتْوازِن رزيـز الهـزَّة، والطمبـور
الدّيس جرَّ فوق حِجْلاً رطَنْ معصـور
وتتمايح فريـع بانة، وصديرا نفـور
*****************

تموحي تحاكي فرع الخيزران تتني
رخرخ وشيلو متل البرتكان متحني
يا طير قولو بي موجب سؤالك عني
لهاتي تقطر المده ولساني يغني

[rtl]

ها الأيَّام بقيت سُقـدة ومنامي خَـزاز

وحاكيـت دَحَّـة الوِزَّة، ورسيس الباز

الخـلاني يابس ... ضـبَّـة في عكاز

بلا الزول المخسَّـل، مو اب كتيفاً غاز

*****************

[/rtl]

[rtl]ها الأيَّام بقيـت سُقـدة، ومنامي قليـل

وحاكيت دَحَّـة الوِزَّة، ورسيس الخيل

الخـلاني يابس ... شمعـة في قنديل

بلا الزول المخسَّل وعُنقو فيهـو التِّيل

*****************

[/rtl]

البـارح بعد ناس الفريـق ما هجعــوا
عقبان عاودني طاعوني المكتر وجعو
يا الحبّـان مطـاردة العريـب النجعـوا
ما بتبقـالي متل القدمـوني ورجعـــوا
******************

قطـع الكبري كاسـح والمحطات فاتن
ودودو بالطريق، واتدلّى بي حليللاتن
وكــــت أذكـــّــــر حــنــيــن أمــاتـن
عينـي والغمـيـد يقــع الخصـام بيناتن

غزالاً برعى بي حدباً صقيعـــة وصَـيّـة
ديمة مجافي خالف لي عشوقو الكيّة
فرقو قلاني فوق جمـر أم لهيب الحيّة
سبعة أيام تمـــام مابيـة الغميد عينيّا