ياحليلك
ياجماعة بالجد ياحليل رمضان العريجا الاهل واللمة والحبان والجيران الضحكة والبسمة والبهجة
من الساعة 12 :OO ظهر ابلو الابرى الماخمج الحلو مر امك تقوم تتكلفت بتوبة وتمشى تفتح
شوال الابرى الماخمج اتخيل الابرى فى شوال والله نعمة . الام تبل الابرى فى الجردل المشدر
ابو رسمات فى النص وتنده عليك ياولد قوم من النوم قوم على حيلك الصلاة دى جات رمضان دا
قالو نوم وانت من تحت الملاية تتكلم بصوت منخفض يمة قايم قايم . وتجد امك ماسكة ليها مسواك طويل جايبنو من الكمبو من شجرة على جرنبو ... هع مسوا ك السرور القدر الشعبة .
وبعد داك تجى العصرية يا ولد امشئ جيب السكر وجيب معاك بن وشاى حب وماتنسى عرق الدوة
اهم حاجة . ويابت انتى قومى على المواعين ديل جهزى الجقاقة والكور ديل وختى البليلة دى فى النار
وتعال ساعدينى هنا اتعلمى انا عايشة ليك لمتين . تعالى حركى البصلة انا داخله التكل اعوس الرهيفة
دى .. البصلة ماتحرق اول مماتحمر كبى فيها موية ... ونزلى معاك الكورة الفى الرف دى ... طبعا كور
زمان الحمر المكتوب عليهن رمضان كريم والله ياحليل زمان الدنيا بخيرة
وامك ماشاء الله تلقاها لاعب وسط متقدم ولياقة الف رابطة الدفاع بالوسط ومغزية الهجوم من الوسط
الله احفظة لينا واديها لينا الصحة والعافية ....
ويابت الروب لاتكبيهو كلو خلى ليك رواب فى كباية ..... واجهزو الجقاقة وا املوهن تاب بالحلو مر والليمون
والابرى الابيض واتوهطا تاب فى الصينية وتلقى صحن البليلة ماسك الطرف الشمال على حسابو وكورة الملاح بكل بسالة وجدارة ولياقة الف فى الطرف اليمين وطبعا صحن اللقمة الماخمج من خلفهم على ايدى الصغير فى البيت صحن اللقمة لم يكون فى الصينية هع كيف اكون فى الصينية ود ا المدرب زاتو لا زم اكون على الخط برة هع عفيت عليك ياصحن اللقمة .....
وتمشى تلقى الفرشات مفروشات طوااااااااااااااااااااال وتقعد بمزاج وتبدا تعلق الليلة ياناس ودحمد
ملاحكن شنو ...... ان شاء الله تقلية باقى بت حامد دى تقلية مجية وكاربة وياناس ام حد على قربو جاى
وعليك الله ياتميم كب لى من الشئ الاصفر فى الجق بتاعكم دا ..... تميم طبعا بى ضحكة دا قمر دين
يا ود عنتر يامتخلف باقى انتو مابتعرفو الحاجات الحلوة دى ..... والناس كلها تتضحك بصوت عالى والله
ياتميم ايامك قمر الدين كمان ..... تسمع صوت من اخر الفرشة ياجماعة الله اهديكم خلونا نسمع الاذان دا
يا اخوانا الرادى دا ماتختوة لينا فى اذاعة ود مدنى ختوة فى ام درمان ......
اسكتو خلونا النسمع دق النوبة ........ يا اخوانا الجاى داك منو يا ود حمد ماعرفتو اكان كدى كبرت تاب
دا وليد السر شايل صينتو ..... ودحمد مالو بقى كدى رمضان كملو تااااااااااب ههههههههههههههههههه
وبعد تفطر تاااااااااااااااااب تمعسة معسة جد وتقيف نار شرق والصلاة يا الله تصلى المغرب
وترجع البيت للجبنة والشاى وتمشى تتديها مرقة على الهوير الرهيب داك احم احم .......هههه خلوها مستورة احلى حاجة فى الدنيا ياحليلك يا الهوير .......................................ز
وبعد داك تبدا كورك للناس للللعب يا وليد اب زنقلة الحابس عقاب البسكلة تعال للعب
ويا النزير اب شتح الحابس عقاب القدح تعال لللعب
ايام والله وياحليل رمضان وايام زمان
وياحليل اللمة والجيران واللعب مع الاصحاب والمرقة على الاهل والجيران والاحباب
ورمضان كريم عليك تصومو وتفطرو على خير
ونعتزر عن الكتابة باللغة الدراجية الركيكة
وتحية للكل المغتربين عن الوطن واصبرو واصبرو على اكل الرز المابشبع هههههههههههههههههه
الإثنين 07 يناير 2019, 9:08 pm من طرف عبدالرحمن قدالة
