قفشات عريجاوية ضاحكة !!!

بسم الله الرحمن الرحيم

قفشات عريجاوية ضاحكة

فيما يلي بعض الطرائف والملح والقفشات الضاحكة من مجتمع العريجاء الوادع. جميع هذه الطرائف تمثل وقائع حدثت بالفعل، ولكن بعضها حديث العهد (وقع خلال إجازتي الأخيرة بالسودان في الخريف الماضي)، والبعض الآخر قديم.

1. قلت للشاعر حوى النبي محمد صالح: " ابراهيم ود الهادي قال إنت أمك دنقلاوية! "، قال لي: " شكيتو علي الله "... ثم أوضح لي بعد ذلك أن أمه كاهلية حسناوية !!! طبعاً حوى النبي بينه وبين ود الهادي مساجلات شعرية ومداعبات كثيرة.

2. الخالة أم الحسن بت العبيد كانت راقدة في مستشفى العزازي، بسبب الملاريا، قمنا بزيارتها في المستشفى أنا والزوجة ومعنا الأخت/ دار السلام البشير. وبينما نحن معها نسألها عن حالها قالت لي مداعِبة: " أنا بعرفك من زمنك داك وكت كنت بتسرق العنكوليب" فجاوبتها على الفور: " الكان بسرق العنكوليب دا عمر مش أنا"، فقالت وهي تشير نحوي بإصبعها: " والله دا إنت دا ذاتك!" فنظرت إلى الأخت دار السلام فوجدتها (ميتة من الضحك).

يبدو أن الملاريا أثرت شوية في راس الخالة أم الحسن، لأني لا أذكر شيئاً عن سرقة العنكوليب هذه التي رمتني بها فحولتُها بدوري إلى عمر!!

3. الأخ حسبو الزين حكى لنا نكتة واقعية حدثت له حينما كان مع زوجته الحالية بمستشفى العزازي والزوجة في انتظار الوضوع بعملية قيصرية، وطبعاً زوجة حسبو الأولى (عليها رحمة الله)؛ كانت قد توفيت عقب وضوعها بعملية قيصرية. قال: " كنت واقف بره المستشفى، فمر بوكسي من أم باجبار فيهو ناس من أهلنا العويضاب، فسألوني (آزول نعلك عافية؟!) قلت ليهم: مرتي جوه حيولدوها بي عملية قيصرية، قم واحد منهم قال لي: آها دي برضها أكتحها "(يعني أكتلها زي ما كتلت مرتك الأولانية)، وبعد داك اتحرك البوكسي وخلاني واقف مذهول!!!

4. زمان في منتصف الثمانينيات كنت خاطب لي بنيَّة من مكتب القليع، وفي يوم من الأيام، والدنيا كانت خريف، وكان في شختور مطر نازل جهة الجنوب الشرقي (ناحية الهدى)، طلعت في اليوم داك ماشي ميدان الكورة، قام لاقاني الخال/ أحمد ود شقلي ( عليه رحمة الله)، أبو عبد الكافي، قام مسكني من إيدي ووجهني جهة الشختور النازل، وقال لي : (سماعين آ ولدي، دحين الصبيب داك؛ نازل فوق مكتب القليع ولَّا دون جاي ليهو؟؟!)

5. عمنا سعد ود حسن (عليه رحمة الله) كان يحب أن يداعب حبوبتنا التومة بت الحسين، رحمها الله (أم بلتنا وحبوبة الجيلي وعبد المحمود)، وأهلنا في القرية يحفظون لهما حكايات كثيرة، منها هذه القصة التي حكاها لي الخال/ إدريس ود رحمة، قال: " التومة بت الحسين جات دكان حسن علي، عشان تشتري ليها حاجة، لقت سعد ود حسن قاعد بره الدكان، لمن شافها قال ليها: يا التومة خلينا ليك دكان ود دعوب، ودكان علي ود الضباح، كمان جيتي لاحقانا في دكان حسن علي!! قالت ليهو: الكلام دا ليْ أنا ست التُّرعة الما جابتني القُرعة؟! " تعني بذلك أنها بنت العريجاء الأصيلة، وسليلة رحمة القصر مؤسس القرية، وملمحةً إلى أن عمنا سعد جابتو التخديرة أو الباجور.

6. حكى لي النعيم (حسبو الشيخ الحسن)، قال ليْ: كانت الأيام أيام انتخابات، وناس التصويت قاعدين في مدرسة الحلة، وأهلنا الشايقية بصفة خاصة واقفين مع سيد جلال بتاع الهدى، وهو رجل حزب أمة ونسيبنا، قام جدي الجاك ود ابراهيم (عليه رحمة الله) جا بيتنا وقال لي حبوبتي حليمة بت إبراهيم (وهي شقيقتو): يلا يلا سريع ألبسي توبك عشان تمشي تصوتي لي سيد جلال، قالت ليهو: لكن السَّرف بتي سجلت عمرها 50 سنة، أنا أسجل عمري كم؟؟! قال ليها: ميَّة... ميَّة... ميَّة.. وهو طالع على الباب طوالي!!

طبعاً خالتنا حليمة أكبر سناً من خالنا الجاك، وخالنا الجاك كان يعلم أن حكاية العمر دي ماليها أي أهمية.

7. خطب جدنا محمد نور ود الحسن (عليه رحمة الله) امرأة من نواحي (سنيبرة) و(عثمان فرح)، وكان برفقته في تلك المأمورية ابن أخيه/ حمد ود الشيخ إدريس، وكما هو معلوم فإن حمد رجل فارع القامة، أبيض اللون، وسيم الطلعة، ويرتدي في يده ساعة (رومر)، فلما رأتهما العروس أبدت موافقتها على الفور؛ ظناً منها أن عريسها هو هذا الشاب الوسيم، (انطلاقاً مما جرت به العادة أن الأصغر سناً دائماً ما يكون هو العريس، والرجل الأكبر سناً الذي يرافقه يكون هو أبوه أو عمه). فلما تبين لها لاحقاً أن ذلك (الشايب القصيِّر) هو عريسها؛ قالت: (كُـرْ عليْ! أنا كنتَ قايلاهو أبْ ساعة!!!).

8. جدنا العبيد ود علي ود عبد القادر (عليه رحمة الله)، أبو العمدة والرشيد، كان رجلاً زعيماً في قومه، ولكن كانت زينب بت الشيخ أحمد (أم حمد وحسن الشيخ إدريس) هي الشخص الوحيد في القوز الذي يناطحه ولا يقر له بزعامة. ذات مرة كان جدنا العبيد نزيلاً بمستشفى الخرطوم ويحتاج إلى نقل دم، فجاء أهله من القوز والعريجاء ليعودوه في مرضه، ويعطوه ما يحتاج من دم، وكان من بينهم حسن ود الشيخ إدريس، فقال لهم جدنا العبيد: (بارك الله فيكم يا أولادي، وكتَّر خيركم، لكن حرَّمْ حسن دا ما يديني دم!) فلما سألوه، وهم مستغربون، عن السبب، قال: ( باكر بت الشيخ أحمد بتقول لي: هسَّعْ لامن بتضَّرَّع كدي في الحلة دي!!، أكَّان مو دم ولدي؛ كنت قدلت قدلتك دي؟؟! ).

9. حكى لنا العاقب محمد علي، قال: كنا راجعين من مستشفى العزازي، وماشين على السوق، ومعانا الجاك محمد علي (عليه رحمة الله)، وكان مزيِّن راسو جبنة جديدة تلمع، وكان ماشي معانا شاب من الحلال الورا ديلك؛ ناس بلومة والقليز والمطيمر، لفت نظرو شكل الجاك ود أمحد علي، شاف الزول قصيِّر وصلعتو تلمع!! بقى كل مرة يتأخَّر مننا شوية، ويطق الجاك فوق راسو طقة خفيفة كده، يعني عامل فيها بهظر معاهو!! الجاك فوَّت ليهو الأولانية، وفي التانية اتلفت عليهو وسلَّ سكينو قصبة!! الولد خاف وانخلع، وجا متحوينِّا بي ورا، قال: ( يا أخوانا هويْ... زولكم دا؛ إبرتو ما بتشيل خيطين!!) قال قلنا ليهو: (والله فد خيط ما بتشيلو!!).

أرجو أن تكون هذه القفشات قد أمتعتكم وأضحكتم، وأن تسامحوني إذا لمستم في شيءٍ مما تناولته في هذا البوست ما يجرح بعض أهلنا المذكورين فيه. ونسأل الله الرحمة والمغفرة لجميع الأموات من أهلنا؛ ممن ذكروا هنا ومن لم يذكروا.

</STRONG>

إسماعيل (ود العريجاء)

عدد المساهمات : 99 تاريخ التسجيل : 14/03/2008

الأستاذ المبدع دائما ابو السباع
لك التحية و الإحترام
ما في شك انت دائما تتحفنا بحلو الحديث و الشعر و هذه القفشات و فعلا ظريفة و ممتعة و لكن احب ان اوضح ان الموأة التي تناكف العبيد ود علي هي زينب بنت الشيخ احمد ود عبدالقادر والدة حمد و حسن كما ذكرت و احمد ود عبدالقادر هذا هو شقيق قسم السيد و الحسن و عثمان الإعيسر

جزاك الله خيراً يا أبا محمد، الحقيقة إنت دايماً مرجعنا في هذه الأمور، لاسيما والمرأة ههنا خالتك (بت عم أمك) وقد قمنا بإجراء التعديل اللازم بناءً على هذه المعلومة التي جاءت من مصدر موثوق. وعلى ذلك فإن أبوها أيضاً شقيق كل من محمد علي ورحمة، بالإضافة إلى الأعيسر وجدك الحسن!!)

Admin عدد المساهمات : 302 تاريخ التسجيل : 30/12/2007

القفشه دي مصدرها عبد المطلب محمد رحمه
قال كنا صغار وكان احمد رياض صاحب اختراعات كل مره طالع بي حاجه
حسن شقلي بحاول انافسو كل مايمش المدرسه بجي بي حاجه جديده
قال شقلي برسل طلب اقول لي شوف المعلم عمل شنو طلب اجي اشوف
ويرجع لي شقلي اقول ليهو المعلم عمل طياره شقلي يقول دي بسيطه واقوم
اعمل زيها وتاني اجي من المدرسه ارسلو اقول لي شوف المره دي عمل شنو
ارجع اقول لي عمل عربيه تمشي بي حجر البطاريه اقول لي بسيطه دي بنعمله
قال مره المعلم عمل جرس طلب شاف الحاصل ورجع شقلي قال لي اه قال ليهو
والله المعلم عمل جهاز تجي جنب الباب الجرس جوه البيت ادق تهبش الباب الجرس ادق
قام حسن عاين جاي عاين جاي قال لي هنا وقف حمار الشيخ في العقبه

والله ضحكتني جنس ضحك يا أمير، أصلاً رياض دا كان بتاع قلل، وحسن عمر متشبِّر ساكت، وداير يقطع بحراً ما بقدر علي عومو!!!

زمااااااان عبد الله أخويْ كان يؤلف المدحة من هنا، ويناديني أنا أو عمر، عشان نكتبها ليهو ... وكان في العادة يوقِّع اسمه في خاتمة كل مدحة، كما يفعل كل المداحين، وكان من ضمن المدائح التي كتبتها له مدحة مطلعها: ( يا ربِّ صلِّي على الرسول الكاملا )، وهو دائماً يفخر بهذه المدحة، ويقول: (دي مدحة ما يفسرها إلا عالم !!!).

في يوم من الأيام كان عندهم ليلية وكان معاهم يوسف عوض الكريم، لاقاني يوسف صبيحة اليوم التالي، ودار بيننا الحوار التالي:

- ياخي إنت عبد الله أخوك دا في زول مغالطتو ؟؟؟!!!

- ليه مالو عبد الله أخوي ؟؟!

- دا بقول في مدحة من مدايحو: (عبد الله جابا ونظَّما وهُوَ قايلا)...

عليك الله هسَّع في لزوم للتوكيد المكرر دا ؟؟!

- إذن إنت ما فهمتَ عبد الله أخوي عايز يقول شنو ؟؟!

- عايز يقول شنو ؟؟!

- عايز يقول: كلمات، وألحان، وأداء عبد الله البشير !!!

عدد المساهمات : 13 تاريخ التسجيل : 04/06/2008

[b][b]السلام عليكم . . ويا سلام عليكم وعلي القفشات الرائعة والتحية لكل الاهل عبر هدا المنبر الجميل وهذه الواحة الظليلة ]وتحية خاصة للألمعي اسماغيل , وأكيد لنا عودة

[/b][/b]

يحكي ان حسن عمر شقلي كان يعمل في شركة فلاتكو لصاحبها بدوي التيجاني حيث كانت فترتها تمر بازمة سيوله فتتأخر رواتب العمال الي ثلاثة او اربعة اشهر ففي نهاية احد الاسابيع ذهب حسن عمر في زيارة لاسرته بالعريجاء وبعد ان استراح من عناء السفر ساله والده عليه رحمة الله:ها ولد اكان عندك شئ ادينا النخلص سيد الدكان .حسن قال ليهو والله يا ابوى شهرين ماصرفنا مرتبات هس والله اتسلفت عشان اجيكم.فمكث معهم حسن ليلة الخميس والتي تليها وفي صباح السبت غادر الي الخرطوم وفي نهاية ذات الاسبوع حضر شقيقه احمد شقلي الي العريجاء وبعد ان ارناح قليلا اخذ والده يساله عن العمل وعن اخيه حسن احمد قال ليهو والله يا ابوي حسن كويس وطبعا امبارح عقدنا ليهو علي بنت من العسيلات ودخل عليها.شقلي قاليهو كيف الكلام دا الاسبوع الفات حسن جاني هنا قال قرش معندوهس تقولي عرس ؟اصلو ناس العسيلات ديل عرسم دا عيش بي عيش؟

إبراهيم محمد حدباي، الشهير بلقب (أبْ كدوك)، طبعاً راجل زهوج شديد، أزهج من أبو الدقيق – زي ما بقولوا – وله طرائف عديدة اشتهرت عنه في البلد، منها قصة الطوب العجيبة:

قالوا عبد القادر ود الضبَّاح قاول (أبْ كدوك) عشان يدق ليهو طوب. وبعد ما انتهى خلاص من دق الطوب؛ طلب من عبد القادر يديهو قروشو، لكن ود الضباح أبى يديهو حقو، طوَّالي قام صاحبك (أبْ كدوك) وقع في الطوب فجيخ بي كرعيهو، وبقى يمشي ويجي من فوق للطوب وهو يترنم: (أمشي حراً وأجي حراً.... أمشي حراً وأجي حراً) والفرَّاجة ميتين من الضحك !!

اتصلت في صباح هذا اليوم بالأخ/ عكاشة رحمة ( رئيس نادي الكفاح البطل )، وأثناء حديثي معه كنت أسمع أصوات لقط وضحك وضوضاء، فسألته عن ذلك فأجاب: ( نحن قاعدين نفطر في البيت، أنا والجيلي ود خالي الصديق، وحمد ود إدريس؛ بناكل لينا في كسرة بملاح ويكاب )... قلت ليهو: (عليك الله رسل لي منها لقمة لقمتين كدة برسالة بالموبايل)!!

وبعد شوية اتصلت بسفيان الجاك في الإمارات، وحكيت ليهو قصة عكاشة وفطورهم بملاح الويكاب... قال لي: (إن شاالله ما تنفعهم)!!!

طبعاً سفيان ده أبوه خالنا الجاك ود إبراهيم (عليه رحمة الله) كان رجلاً حاضر النكتة.. وكذلك أخوه علي الجاك !!

عدد المساهمات : 247 تاريخ التسجيل : 12/11/2008

عندنا ويكاب كارب وصل للتو من ود الهبيل بس شرفنا ويكاب و ملاح لبن وكما ن ملاح لوبا بالشرموط دا حاجه رهيبة

Admin عدد المساهمات : 302 تاريخ التسجيل : 30/12/2007

فعلا والله اولاد خالك ديل حكايه خاصه محمد دي عندو بلاوي وانا هنا بحكي ليكم حكايه
كنا ساكنين في اركويت مجموعه من العراجه كما يسمون اولاد القوز بيقولوا بيت العراجه وعلي الجاك سكن مكان تاني بس بجي يوم الجمعه في طريقو للدلاله لياخد معاهو اصحابو
عبد المنعم ودعلي وقضارف ويوم جاء الصباح بدري اصحابو كانوا شبه نايمين وانا جالس
بعد مليت الازيار فقال لي اديني مويه اشرب واحدمن الجماعه اصحابو من تحت الغطاء قاليهو
بايته معاك رد ليهو قاليهو تبيت في احمد شرفي طبعا احمد شرفي مقابر في ام درمان
جبت ليهو المويه طبعا جديده جايه من الصباح مسخنه قال لي اسمع المويه دي حالبنها من بقره
وسفيان يجيد الحكي
زمان قال جو الخرطوم جداد كرت هو ومجدي قال ركبنا البص الماش اركويت قال قلت لمجدي
البص فاضي انت اركب في مقعد وانا في التاني عشان شركي اقبض عصفوره ولا قمريه قال كان في واحد قاعد قريب سامع بس ساكت ساي قال البص اتحرك قال اشرت للبص حاجه كبيره
شايله قفاف ومكانس وصحانه النوع البقول للسواق ياولدي اصبر النقعد ما اقع قال بي هتشه قعدت معاي في مقعدي قال الزول القبيل سامع كلامي مع مجدي عصفوره وماادراك قال اتلفت
علي قال لي بختك ام رخم الله عديل

Admin كتب:: فعلا والله اولاد خالك ديل حكايه خاصه علي دي عندو بلاوي وانا هنا بحكي ليكم حكايه
كنا ساكنين في اركويت مجموعه من العراجه وعلي الجاك سكن مكان تاني بس بجي يوم الجمعه في طريقو للدلاله لياخد معاهو اصحابو
عبد المنعم ودعلي وقضارف ويوم جاء الصباح بدري اصحابو كانوا شبه نايمين وانا جالس
بعد مليت الازيار فقال لي اديني مويه اشرب واحدمن الجماعه اصحابو من تحت الغطاء قاليهو
بايته معاك رد ليهو قاليهو تبيت في احمد شرفي طبعا احمد شرفي مقابر في ام درمان
جبت ليهو المويه طبعا جديده جايه من الصباح مسخنه قال لي اسمع المويه دي حالبنها من بقره

طبعاً خالنا الجاك (عليه رحمة الله) كان من ظرفاء العريجاء، من ناحية خفة الظل والنكتة الحاضرة، ومن ناحية الظرافة في حسن الملبس والهندام... كان رجلاً فارع الطول، وكان دايماً يلبس عراقي ساكوبيس وتوب ساكوبيس، ولمن ظهر التوتل الأبيض الخفيف داك حوَّل ليهو طوالي... وطبعاً أولادو إبراهيم وعلي – في الغالب – هم البيشتروا ليهو الحاجات دي....

يوم لقيت علي الجاك في السوق بيشتري في توب توتل أبيض لأبوهو... والتوب من طوله يكاد يكون طاقة بحالها!!! قلت ليهو ياخي التوب ده طويل طول مبالغ فيهو!!!

قال لي:ـ لكن الزول ما أطول من دخان الكَرْسَـة...

(حصل شفت ليك دخان وهو يتصاعد إلى السماء في جو كاتم أو كارِس؟؟؟!! ).

بالمناسبة أنا ناوي، بإذن الله تعالى، أكتب بوست قريباً عن ظرفاء العريجاء، وعلى رأسهم خالنا الجاك وخالنا عمر ود شقلي (عليهما رحمة الله تعالى)

Admin عدد المساهمات : 302 تاريخ التسجيل : 30/12/2007

بعد دخول الكهربا لطرطشت بقت تصدر الايسكريم للعريجا
احمد نعبم عندو فاتحه في طرطشه واحد منهم قالي بكره
جيب معاك موبايلات الحله في الخرج عشان نشحنا ليك

لاقيت محمد على الجاك وقالى كنت عايز أتصل على عمى عمر البشر لكن رقم الموبايل بتاعه العندى ناقص رقم المهم أضاف رقم من راسه وإتصل أول ما الراجل فتح عليه محمد على قال ويـــــــــــــــــــــــــــــــــــــــــن يا عمر البشير رد الرجل وقاليه لا لا معاك على عثمان محمد طه

عمتنا (أم ضُراع)، زوجة جدنا رحمة ود عتمان (عليه رحمة الله)، معروفة بأنها سريعة في المشي بحيث لا يستطيع أحد أن يماشيها... وعندما كان حفيدها (النيَّل) طفلاً صغيراً، كان يتبعها حيثما ذهبت، ونظراً لسرعتها العالية في المشي، كان هو يجري باستمرار ليبقى بجانبها...

كنا ذات يوم واقفين في (شارع النص) وجاءت هي عابرة والطفل الصغير (النيل) يجري بجانبها، فنظر إليه أخونا أحمد محمد كرم الله (أبو الحسن) وقال: [الشافع ده ممَّا يكبر حقو يودوه الجيش طوَّالي]!!

تعريجة: طبعاً أم ضراع (واسمها الحقيقي آمنة عبد القادر فضل المولى) هي والدة كل من مضوي وفاطمة (والدة راشد وعاصم وعصام) ورابحة (زوجة علي ود العبيد في القوز) وقسمو (زوجة محمد ود عبد السلام)، بالإضافة إلى الهيف (عليها رحمة الله)، وهي والدة الهادي والنيَّل...

موضوع: رد قفشة السبت 24 مارس 2012, 5:45 pm

االأخ أسماعيل بعد قراءة قفشتك إتضح لي بالدليل القاطع أن أهل العريجا هي أسرة واحدة وتمتاز بالمحبة والعفوية التي تجدها دائما في القري المتماسكة والاصيلة - فقد تذكرت موقف وانا فى المتوسطة فى احدى الاجازات دخلت بيت فى الحلة بقريتى (قرقود المحس) وفور دخولى طلب منى قريب لى وهو جالس فى عنقريب بانزال برش الصلاة من فوق التكل لان طوله لايسعفه وبالفعل قمت بانزاله دون أى عناء وقال لى فى حينه بالرطانة (اكا داخليلا كمن ارجه تجنا) معناه بالعربى ياعبدالله انتو بتـاكلوا لحم الجمل فى الداخليات)؟ وبصدق شديد خرجت منه وانا اضحك بدون أن آخذ أى شئء فى نفسى 0
تعرف لو حدث هذا فى زماننا وفى أى مكان آخر لحدث قتال

ملحوظة: الغريبة وانا اكتب هذه القفشة اكتشف لاول مرة ان هنالك تشابه فى كلمة الحمل بالانجليزى كمل وبالرطانه (كمن)

تسلمو يا شباب علي القفشات الجميلة الخال إسماعيل أخونا عبد الله المحسي ود عمي

تاني واحده ممكن.

ramy osman كتب:: تاني واحده ممكن.

اقتباس :: تسلمو يا شباب علي القفشات الجميلة الخال إسماعيل أخونا عبد الله المحسي ود عمي

دي واحدة تانية كمان يا رامي ويا سراج، وهي عن ابن خالتي الحسن محمد علي (عليه رحمة الله) وهو رجل سريع البديهة وصاحب دعابة ونكتة حاضرة.... هل عرفتموه؟؟! هو والد عضو المنتدى المتوهج دوماً سراج الدين (أبو ممدوح)...

قال ليك جاء حرامي بالليل في الحتة بتاعة بيوت ناس الحسن وأخوه الصديق... وبعدين أهل البيوت قاموا صحوا بيهو، والحسن والصديق طاردوه، وسكوه لامن مرقوا وراه بره الحلة، لكن ما قدروا يلحقوه...
الصديق لامن سمع الجوطة وقام من نومه قام جاري بي درب الحرامي وتوبه البتغطى بيهو لسه فوق كتفه، بعد داك قام رمى التوب في طرف الفريق وانطلق بأقصى سرعة...
لمن الحرامي أفلت منهم جوا الاتنين راجعين ويتكلموا مع بعض ويتحلفوا على الحرامي، لمن وصلوا طرف الفريق، الصديق شاف التوب مرمي في الشارع، قايلو ده توب الحرامي، قام قال للحسن: آزول آبشُّوف تويبو؟؟!
الحسن رد عليه ساخراً: ده تويبك إتَّ، مو تويب الحرامي!!!

هذه نكتة جديدة لنج حكاها لي ابن خالتي، الأخ حسبو ود الزين:ــ

قال ليْ بيشتغل معانا في العربات درفون فلاتة، هو (محمد ود فكي ميكائيل) الشهير بلقب (ود الشيخ)، وقال لي الفلاتي دي مدردح وتفتيحة شديد!!

يقول حسبو: يوم الفلاتي دي قال لينا: إنتو كلامكم كلو أنا بفهمو، لكن أنا كان نضمت بكلام أهلي الهوسا إنتو ما بتفهموا فيهو أي حاجة !!!
قلنا ليهو: والله نحن لو اتكلمنا باللغة العربية الفصحى إنت حتقعد زي الأطرش في الزفَّة...
قال: والله أنا أي كلام (أربي) أفهمو...
قلنا ليهو: طيِّب قول لينا كلمة عربية بتبدا بحرف الدَّال...
قال: هَرْف الدال... هرف الدال... هرف الدال.... (ثم سكت هنيهة)... وبعدين قال: (ود الدِّئيتة)!!

حسبو قال نحن كل واحد فينا وقع على جنبة ومات من الضحك!!!

طبعاً هو بيسمعهم يرددوا اسم (بت الدعيتة) وهي نسيبة حسبو، و(الطيب ود الدعيتة) وهو عديل حسبو ....

هههههههههههههههههههههههههههههههههههههههه

اضحكو ليك كيف والله قطعت مصارينا من الضحك

هذه إحدى قفشات (حاج حسن علي) التاجر الدنقلاوي الشهير الذين كان يقيم في العريجاء، ثم ارتحل في سبعينات القرن الماضي إلى إحدى قرى مشروع الرهد الزراعي...

حدثت هذه الواقعة أيام لقيط القطن في الحواشات، وكان جنود القوات المسلحة منتشرون في الحواشات لحراستها من أصحاب الأغنام...
وكانت هناك قصص يرددها الأهالي عن حوادث قتل ارتكبها هؤلاء الجنود ضد بعض الأهالي في مناطق مختلفة من الجزيرة....

أدخل حسن علي بعض أغنامه في الحواشات (المقصرات) أو (القصاير)، وكان الوقت عصراً، وفجأة ظهر جنود القوات المسلحة بسياراتهم العسكرية وأسلحتهم الفتاكة، فما كان من حاج حسن علي إلا أن هرب وترك أغنامه لتواجه مصيرها، ونفد هو بجلده، مهرولاً نحو القرية، وكان هناك بعض الفتيات يترددن بين القرية و(أبو عشرين)، فضحكن لهذا المنظر....

فخاطب بعض المارة حاج حسن علي قائلاً: يا حاج حسن تجري، وتخلِّي البنات يضحكن عليك ؟؟!!!
فرد عليه حاج حسن الدنقلاوي على البداهة: أخير أجري يضحكِن، وللا أخير أقيف يبكِن ؟؟!!!

يقصد أنه لو وقف فإنه لا محالة مقتول، وهنا سوف تبكي هذه الفتيات حزناً عليه!!

هاهاهاها طرائف جميلة جدا ،والمجملة اكثر انها قصص حقيقية ، يعني ما زي الجماعة البنجروا من رأسهم

دي برضو نكتة للفلاتي محمد الشهير بود الشيخ حكاها لينا الخال ابراهيم الزين مفادها ان الخال ابراهيم سأله : انت يا ود الشيخ اذا فاتتك ركعة بتجيبا كيف ؟ وكان ود الشيخ قاعد علي الارض فوقف وقال له : ما بجيبا زي الناس ما بجيبوها . فضحكوا علية ضحكا كثيرا

» مسابقة عريجاوية جديدة لنج.......؟؟؟؟؟؟
» قفشات رياضية
» معلومات عريجاوية هامة
» ألقاب عريجاوية بحتة
» أقلام عريجاوية خبا بريقها