عرس نفيسي
(قصة رائعة للكاتب طارق جبريل)
منقولة من منتيات أهلنا ناس القطينة
- طارق آآآولدي قوماك دلَّني لا تحت جنب جدودك في شجرة ناس ود جبارة.
- سمح قوماكي.
- أدَّني عكازي دا.
واندلينا لاااا تحت عند بير ود جبارة.
- عوض السيد: أهلاً بالمرة القاهري.
- مافي زولاً قاهر قدركم، الله لا تكسبكم.
- طارق أمشي أملالي حقتي دي صعوط من دكان العوضابي وجيبلي معاك سيجاري ألَّت برنجي.
- ود جبارة: انتِ لليلي تسفي وتسجري دحين مو حجيتي ؟؟!
- أيي حجيت واسجر واسف التمباك عندك مانع ؟؟!
- ود جبارة (يضحك): أصلك من يومك قاهري وماك نصيحي
.....
مشيت علي دكان العوضابي وخليتم،
خمسة رجال وامرأة... شيوخ على حافة القبر،
يقضون جل وقتهم في اجترار ذكريات صباهم،
يحكون عن أيام مضت منذ زمن بعيد،
لا يتحرجون في الكلام ولا ينتبه لحديثهم أحد،
يلقون الكلام على عواهنه؛ لا يعنيهم من محيطهم
غير طفل يرسلونه حيث يريدون، او امرأة تأتيهم بالطعام!!
.....
جبت الغرد ألِّيل نفيسي كان أسمعلك:
- عوض السيد (ميت من الضحك): عليك الله آآنفيسي عرستي ود عمنا دا كيفن ؟؟!
- كدي خلني اللَّسف واسجر.
- رابح: أصلك من يومك بتقدري علي المحن!!
- جيت يا عوض السيد مندلي لااا تحت شايلالي حرف أليل قراصي لي أبوي،
وجنب البير أكان القالك ود الطيب طالع وفي إيدو برسيم،،،
سلم علي وقلتلو: انت يا ود الطيب بقيت تحد زي النسوان كمان؟!
مرتك ماتت ليها سنين وانت لليلي مابي العرس !!
- عوض السيد: الله يقلعك آآآبتتقدري!!!
- ود الطيب: عندك لي عروس آآآنفيسي؟!
- انا مالي آآآبتعرَّس ... انت عميت ولَّا شنو ؟؟؟!
- تعرسيني آنفيسي ؟؟!
- ان بقيت دايرني كلِّم ابوي. الكلام لا يبقى فسو ساكت!
- خلاص ان بقيتي قابلابي عوجة تب مافي.
- عوض السيد: الله لا تكسبك آا مقطوعة الطاري.
- نفيسي: اندليت علي أبوي تحت يا عوض السيد ولقيتو يحفرلو تحت تمرة،
وقلتلو: أبوي ود ناس الطيب دا قال دايرني؛ دحين نجِّض معاهو الكلام في صلاة العشاء!!
- الحاج بغدادي (والد نفيسي): انت نان بقيتي للعرس آا نفيسي؟؟!
- نفيسي: كدي يابا شوف فهموا شنو، بعدين أنا هيني.
- رابح: آآآبتستحي من يومك !!
- نفيسي: والله آآآرابح العشي بقالي طويل خلاص وبقيت اتاوق علي جية أبوي من الجامع... ووكتين جاء ما قالي شي، اتعشَّى ورقد نام... وأنا الوردي والهسهاسي مسكتني!!
وراسي بقى يودي ويجيب؛ يا ربي أبوي أبالو، ولا السجمان دا ما فتح الكلام معاهو ؟؟!
صبحت الدني وانا أوجوج من هني لا هني علَّا الجدادي الدايري ترمي البيض!!
اندليت لا عند أبوي ما شفتو... شويتين أشوفو شايل طوريتو وجايي من لااافووووق،،،
حدرتلو زين وطلعت لي أهلي...
الواطة مغربت وانا أتاوق لي طلعة ود الطيب لامن شفتو طالع علي بيتم.
لفحتَ طرحتي ومشيت عليو قبل لا يمسك كُشر الباب:
- انت آآآود الطيب تكضِّب عليْ وتخليني أكلم أبوي وانت ما تكلموا!!!
- ود الطيب: والله آآنفيسي غلبني أقولو ... خِجـِلْ منو آآ بت الناس... يقول شنو انا بقابلك من وراهو عاد!!!
- الخجل اليقطـِّع مصارينك، والله الليلي ما تمشي قدامي هسِّي ليهو علَّا أكورك، وألم عليك خلق الله هني، وأقولهم ود الطيب يجرجر فيني من طرحتي !!!
- عوض السيد (ضاحكا بشدة): نجيضي... الله يقلعك... أهاااا
- نفيسي: والله آا ود الطيب قلَّع عيونه وبقى يرجف وشبكني: آآآنفيسي بمشي معاكي بس لا تضيعيني... وقلتلو ان بقيت راجل الليلي ما تجي، أنا سابقاك علي البيت.
- ود جبارة: الخرابة آآآبتعرفي الخوف !!
- نفيسي: جملة الايمان يا ود جبارة جاء وراي ودقَّ الباب وطلعتلو وقالي أبوك في... وأنا أكورك بي طول حسي: أييي يا ود الطيب أبوي لا جوة... فشان أبوي يسمعني!!
- دخـَّلتو علي ابوي ومشيت علي الطاقة اتصنَّت في كلامو !!!
- عوض السيد: أها شن قال؟؟؟؟
- نفيسي: أسمع فيهو يقول لي أبوي يا عم بغدادي أنا جاييك في غرد خير
- رابح: أها يا خرابي !!
- نفيسي: المهم يا رابح كلم ابوي وانا بقيت اوجوج من هني لاهني !!
وازازي بين الطاقي والتكل تقول بطني ماشي (عندي اسهال) لامن مشى لي اهلو..
- وابوي ناداني وقالي رأيك شنو ؟؟!
- عوض السيد: أها شن قلتي يا خرابة ؟؟!
- والله يا عوض السيد بقيت ازغرد لامن أبوي نهرني...وعرستو... تاني شن دايرين ؟؟!
- الجميع يضحكون: الله يجازي محنك آ نفيسي !!
للكاتب طارق جبريل ،،،
الإثنين 07 يناير 2019, 9:08 pm من طرف عبدالرحمن قدالة
