حكايات من حلتنا ..............
كل من عليها فان
السحب تنف والرزاز كاطفال العيد يتبادل الابتسامات
الغبار في لفافات كر وفر
القوم يثرثرون في امور الزراعه
يبصرون للسماء
يا الله
انهم لاينتظرون موشر البورصه في سوق الاوراق الماليه
ولا اضاءة شجره اعياد الميلاد في ريو دي جانيرو
انهم ينتظرون الحياه
واصواتهم تنخفض كلما ارتفع قصف الرعد
ونقيق الضفادع
أي تفاعل هذا
سبحان الله
الرزاز يتحول الي طل
النسمات تالف من حفيف اشجار الهوير وزقزقة طيورها ماعجز عنه بخ
انها انغام الترابله
وهم يقعقعون اسلحة الحصاد واغاني الحماسه تتطاير من شفاه الصبايا
كفقاقيع السمن في قدح الحاجه فاطمه بت احمد
وبدات نشرات اخبار المطر
الحاج احمد يعدل موضع قعدته ويصيح ابعداره قالو غرقت الغرق الواحد ده
طلق كلمني زول حسن حدباي قالي جاهو الخبر من عربو ديلك
المزن بدا في الجمهره في سماء قريتي كاطياف الحجيج
الطل بدا يحول الي الرِّهْمَة
الاغنام تهرول نحو كل باب مفتوح
والضان تجمع في كيمان ثابته
الحاجه فاطمه تفتح المخزن للتاكد من عدم تثرب المياه
وهي تسبح بي صوتا خافت اقرب للهمس من النضم
المخزن محمي بي راكوبه معتقه من الزمن السمح مكسيه بي لفافات قش مرصوصه بي خبره ومهاره
تتحكرها اجحار (اللدايه)
وتلونها اثار دخان العواسه
كان اللذي رسمها ليونارد دافنشي حين اراد لوحة مرادفه للموناليزا
باب المخزن من خشب الصنوبر يتمدد كلما لامسته حبيبات المطر
يا الله
كاننا في بطن الحوت في ليله دامسه في عرض البحر
طق طق طق
أي صوتا هذا
تضي بي بطاريتها في صندوق كبير من الخشب
وتردد بعض الادعيه يالطيف الطف
ياحفيظ
*يمه شنو الصندوق ده
كدي زح شويه ياولدي
*يمه الصندوق ده شنو
كدي اطلع في شوال العيش وافتحو شوف في مويه دخلت فيهو
الله اجازي الجنا شال مني القريشات وقال (قليبه ) واحده بتردمو
*يمه يمه ده مليان شاش ومقصات وحقن
وهي صامته
*يمه ليهو كم سنه الشاش ده
وهي تستغفر
*يمه يمه انتي مشيتي ولاشنو
وهي تهتذ حزننا
اخرجت راسي من الصندوق
وادرت ضوء البطاريه الي وجهها
فرايت الامطار تنزف من عينيها وتغطي ذالك الوجه الجميل الذي عصرته الحياه
ده صندق ابوك ابراهيم ياولدي
ادرت وجهي للجدار
وحولت ضوء البطاريه للصندوق مرة اخري
والتقط كتاب من بين زحمة الشاش والديتول والحقن
مكتوب عليه الشيطان يحكم
الدكتور مصطفي محمود
فتحت الباب بصمت
وجدت المطر وصل مرحلة التهتان
وتركت امطار عينيها مابين حميم وولي
و خرجت
اردد بصوت ممزوج بالحزن
اللهم اغفر لابي ابراهيم واسكنه الفردوس الاعلي
.......................................
اللهم اغفر الي امي فاطمه واسكنها الفردوس الاعلي
اللهم اغفر لجدي احمد ودالكدك واسكنه الفردوس الاعلي
اللهم اغفر لعمي حسن حدباي واسكنه الفردوس الاعلي
" كُلُّ مَنْ عَلَيْهَا فَانٍ * وَيَبْقَى وَجْهُ رَبِّكَ ذُو الْجَلَالِ وَالْإِكْرَامِ " (سورة الرحمن 26 ,27)
الإثنين 07 يناير 2019, 9:08 pm من طرف عبدالرحمن قدالة
