من هو عميد العزابة في العريجاء ؟؟؟!!

بسم الله الرحمن الرحيم

من هو عميد العزَّابة في العريجاء ؟!

أرجو الإجابة على هذا الاستفسار الودي !!!

كما أرجو تقبل الموضوع بروح أخوية دون زعل أو كربنة أو صَرَّة وش !!!

سابقاً كنت أقول للأخ حامد محمد أحمد الزين ( وهو قد تبوأ منصب عميد العزابة في العريجاء على مدى حقبة طويلة من الزمن ) كنت أقول له: (الحلة دي ما فاضل فيها زول عزابي غيرك إنت وود تمساح)، وذات مرة سمع هذا الكلام عمنا عوض عبد الله الضو فانفجر ضاحكاً، وجعل (يقرِّق) على حامد بذلك، وهو أصلاً صديقه ونديده ورفيق دربه... وسمعت أحمد نعيم يقول أن حامد أكبر منه سناً...

ثم تبوأ هذا المنصب بعد ذلك الأخ بشير محمد كرم الله (وهو أيضاً ابن خالتي، شأنه شأن حامد، كما هو معلوم)... فلما تزوج بعد عمر ناهز 46 سنة تقريباً، أرسلت له رسالة شعرية نصها كالآتي:

ود الخالـة يا قمـر العشـا الوضَّــاح
أخيراً تم عرسـك، وعـمَّـت الأفـراح
بعد ستة وأربعين، كان الحساب بقى صاح
حطَّمت رقـم علي وحامد،وود تمسـاح

بالمناسبة بشير محمد كرم الله أصغر مني أنا وحسبو بحوالي سنة واحدة بس، وهو أكبر من إبراهيم بخيت !!!

والآن يطرح السؤال نفسه من جديد !!!

من هو يا تُرى عميد العزابة في العريجاء ؟!

هل هو..... نوح إبراهيم ؟!

؟

أم هو..... الهادي أحمد الهادي ؟!

؟

أم هو ..... مديرنا أمير محمد أحمد ؟!

أنا غايتوا بفتكر ياخال انه عميد
العزابة نوح . ثم ينوبه الهادي . ثم
ينوبهم أمير . ملحوظة : كلمة ينوبه
معناها بعده مباشرة . بعدين في
واحد مامذكور هوقرشي ولا ما
بلحق الجماعة ديل .

أبو قدامة كتب:: أنا غايتوا بفتكر ياخال انه عميد
العزابة نوح . ثم ينوبه الهادي . ثم
ينوبهم أمير . ملحوظة : كلمة ينوبه
معناها بعده مباشرة . بعدين في
واحد مامذكور هوقرشي ولا ما
بلحق الجماعة ديل .

نوح كان ساكن معانا زمان في بيت العزابة في أركويت في أوائل ثمانينات القرن الماضي، وكان معانا برضو رياض، وعثمان محمد إبراهيم، وأخوه دفع الله، وعباس بخيت، وأبو شلة (أبْ لبب)، ومحمد أحمد إبراهيم.... وحسب تقديري الشخصي نوح ده بيكون أصغر مننا بسنتين أو تلاتة.... إذن فهو حتماً أكبر من الهادي وأمير...

وهناك أيضاً الهادي إدريس رحمة، وحسن الجاك، بالإضافة إلى عبد العظيم ود الفكي الزين !! ولكن أظنهم أصغر من الجماعة ديل !!!

طبعاً لقب (عميد العزابة) ده مقصور فقط على الناس الما ضاقوا زواج كلو كلو... أما الناس الذين سبق لهم الزواج من قبل؛ فهم لا يدخلون في هذا الوصف... عشان ما واحد يقوم يجيب لي ناس عثمان الزين والجماعة الكبار ديل !!!

زائر

قريت الكلام المكتوب عن العزابة لى ابوي كان ردة جزاه اللة خىر ود خالتى

علم الدين كتب:: قريت الكلام المكتوب عن العزابة لى ابوي كان ردة جزاه اللة خىر ود خالتى

مرحب حباب ولدنا علم الدين حامد (الإذاعي المخضرم)... طبعاً أبوك سماك بالاسم ده عشان يوافق اسم ذلك الإعلامي السوداني المخضرم بإذاعة جمهورية السودان (هنا أم درمان)...

نرحب بك عضواً فاعلاً في منتديات أهلك وناسك العرَّاجة، النارهم دايماً سرَّاجة، أهل الهمة الما بقعدوا فرَّاجة...

أبوك طول عمرو كان راجل ضكران وهميم وحنين وبقدر الخوَّة، وبعز أقاربه وبقدرهم... نعم ود الخالة حامد كان عميد العزابة لفترة طويلة، ولكنه بفضل الله تعالى تزوَّج وأنجب الأولاد والبنات، وها أنتم قد كبرتم، وأصبحتم رجالاً... تبارك الله ماشاء الله...

زائر

الهادي احمد الهادي

بدون منافس

السر الدسوقي كتب:: الهادي احمد الهادي
بدون منافس

قال ليك الصادق أخوهو الأصغر منو عندو بت عرَّست أو قربت تعرس !!!

» نوادر العزابة
» من طرائف بيت العزابة اركويت
» فريق العزابة بالعريجاء
» من طرائف ظرفاء العريجاء
» صورة الصغيرين مقداد وغيداء