رسالة إلى سوداني من مواليد بلاد المهجر

رسالة إلى سوداني من مواليد بلاد المهجر
========================
عارفك انت سوداني
ومولود في بلد تاني
دايرك تعرف السودان
وتنقل عني أوزاني !!
اكلت الكسرة باللوبه؟؟
بتعرف تقلب الهوبه ؟؟
وعمرك شفته راكوبه؟؟
في يوم فلقوك بي طوبه ؟؟
لبسته الجبه مقلوبه ؟؟
بتعرف يمّه حبوبه
وكت تمرق سعن روبه
لعبت شليل.. شليل وين راح ؟؟
عضم بالليل.. عضم وضاح
جهاله غبش نفتشو صاح
ونلعب يومى ما بنرتاح
بتعرف تمشي كداري؟
تسوق العجله سداري
وتركب في الحمار جاري
تشوت الكورة ضفاري
هوي يا بنيه قشي الحوش
ومشطي شعرك المنكوش
وخلي البيت دوام مرشوش
وفرشي في البرنده بروش
وكت حماد قعد صنقر
وحلب البقره واتحكر
ومرق العجلة من الكر
وقال للكلبه ابعدي جر
اشرح لي قولة (عــر)
معاها الدوكه والقنقر
وقندول الفريك اخدر
والفرة البتخلع فررر
ادليت عقرت خدار
ودحشك فر منك وعار
وحشيت في الجنينة عدار
وغنيت في الفجر مسدار
اكيد ما بتعرف الزغروت
وما جربت ضرب السوط
وﻻ غننلك البنوت
وﻻ غنمك رعن حنتوت
اياديك ناعمة ما حشن
وﻻ جربت مويه الشن
وما كسّيت غنم طشن
لقيتن في الخدار خشن
هل شركت لي طيره؟
وشركك قام قبض غيرا
قبض ديك عمتك خيره
وترقد صوف وفريرة
حصلت قرقرت زمباره؟
لعبت التيوة في الحارة
ولعبت الكار بكم كارة
سمعت الدنيا زوااره
تعرف اللبقة والتربال؟
شال طوريتو راس المال
وحزم التكة والسروال
وقال للواطه جوكي رجال
رجال تسقي الخدار بالليل
اياديهن خشن بالحيل
بياكلو حﻼل حليلن ديل
كرام والله زي النيل

» سودانا فوق
» تخيل كيف يكون الحال لو ما كنت سوداني
» رسالة الى الوالد
» عبد المجيد عبد الرازق، الصحفي المثابر، صاحب أنظف قلم سوداني
» البرقع أنسام تهب على بلاد الغال