مجادعه شعريه بين اسماعيل البشير وحدباى

زائر

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مجدى محمد حمد كتب:: ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا مجدي ياخي الراجل ده حنَّسناه جنس تحانيس، ونقطنا ليه العسل، وكسرنا ليه تلج عدييييييييييييييييييييل كده،،،

حتين - يا ربي ليك الحَمُد - اتحزم واتلزم وجانا داخل في حوشنا الوسيع ده،،،

تقوم تورطو في مجادعة شعرية مع العبد لله تخلي يطفش الطفشة الما منها رجعة تاني؟؟؟!!!!

أنا غايتو قاعد ليها بالمرصاد إن شاء الله تعالى

بسم الله الرحمن الرحيم

يا ود خالتي رقية هوووووووووويْ!!
اركز اركز اركز، وانعدل، واتحزَّم واتلزَّم،،،
أنا جيتك دافر، وتلَّبت في الساحة زي القطابي الخوَّى....

أنا استجبت للمواجهة الورطنا فيها ود فاطنة بت حامد ده، وجيتك شايل معاي مربوع دوباي عنتر ما يقدر يجاريه ولا يرد عليه (طبعاً المقصود عنتر ابن شداد، مش عنتر حسين ولا ولده البكر محمد تلتل)!!

ولهذا المربوع قصة تفيض بالوله والشوق والحنين إلى الأوطان،،،،

أنا متعود آخد لي رقيدة صغيرة كده بعد صلاة الصبح قبل ما أقوم اتجهَّز عشان أمشي الشغل. الليلة الغميد جافاني والنوم طار من عينني عشان دفق عليْ فيضان جارف من الحنين إلى العريجاء الحبيبة، لامن بكيت بالدمعة الغزيرة، وبدل الرقيدة الصغيرة والتعسيلة المعتادة، نظمت مربوعين من النميم، مليانات حنين وشوق إلى أرض العريجاء الحبيبة، حأكتب ليكم واحد منهن وأدس التاني لامن ناسكم يقدروا يردوا على الأولاني ،،،

المربوع بقول:

مـن تالا البلـد لاح ليْ سحــاب وبروق
وهاج الشوق عليْ،سوّيت حنين النوق
الخـلاني أزيـم بالعـبـرة يـوت مخـنـوق
فوسـيباً بقـوم فـوق تقنـت أم غـرنـوق

دحين حدباي بتاع تاتيبا ده كان قدر يجاري المربوع ده، ويرد عليهو؛ إياهو ده المقصود، وكان انفزر وقام طفش من المنتدى؛ ذنبو على مجدي محمد حمد، وكان صهين وضرب طناش، خلوا محمد عمر يوديهو لأبوه الفاروق، وخلوا بكري يوديهو لي مرغني موسى، ومحمد عنتر يوديهو لحوى النبي، وكلموا ليْ يوسف، ياحليل يوسف، يوسف ده حب العريجاء يجري في شرايينه،،،،

أوعى تقولوا ليْ يوسف ده منو !!!!!

نحبك يا بلد اصلا مكتوب علينا هواك
ومافى بلدا فى الدنيا بعجبنا ســواك
كيف يا ود الخال نومة الصباح ما تجفاك
مادام العود انبرى من الشوق وصبح مسواكy]

]حدباى دا صاحبى وصديق طفولة ودراسة وانا شايفو اتخر انا بحاول ارد نيابة عنه حتى يصل واتمنى المحاوله تعجبكم انا ما من اهل الشعر لكن بحب استماعه الله اجازيك يا ود حدباى كان ما ظهرت[/size][/font]

عدد المساهمات : 226 تاريخ التسجيل : 27/10/2010

اخى حدباى شاعر كبير بيكون العمل ماخد زمنو

المربوع ساهل عند حدباى

اذكر مره فى قناة النيل الازرق

قال مربوع طويل اذكر منو

نحن لادايرن سلطة لاثروة نحن دايرين نروى

كانت فى ذلك الوقت القرية تعانى من مياه الشرب

لكن يالكمبيلى محاولتك جميلة

وانا ودامى رقية كماظهر بستعين بابراهيم ودالجلال

القال ليك منو يا ود نور الله المربوع ساهل؟؟!!

هذا هو السهل الممتنع، والذي لا يعرفه إلا أهل هذا الفن، وأساطين هذا المضمار، ممن برعوا في نظم الغريض، وعرفوا دقائقه من ميزان عروضي، وجرس موسيقي، مع مراعاة جزالة اللفظ، وتسلسل المعنى، وروعة القافية...

لذلك أقول لأخي وابن عمتي الكمبيلي...
ما قصرت تب، ويبدو إنك مشروع شاعر مصقع...
ولكن مربوعك عليه ثلاث ملاحظات: الأولى: اضطراب الموسيقى الشعرية، والثانية: وهن القافية وضعفها، والثالثة: خلو المربوع من ذكر معلم من معالم العريجاء، حتى يكون ذلك بمثابة تخليد للمعلم المذكور، مثل (أم غرنوق) في مربوع أخيك الذبيح...

عدد المساهمات : 226 تاريخ التسجيل : 27/10/2010

اخى حدباى الموضع عندو ساهل مربوعك دا ود نورالله الماعندو باع فى الشعر برد عليه

هاك المحاوله دى

من تالا الدبول شلعن على براق

فاض الشوق على وبقيت اعاين بالرقراق

الخلانى انين وسايل الدمع دفاق

حنتوت الحنيطره وعجورا شايل ارواق

محمد نورالله كتب:: اخى حدباى الموضع عندو ساهل مربوعك دا ود نورالله الماعندو باع فى الشعر برد عليه

هاك المحاوله دى

من تالا الدبول شلعن على براق

فاض الشوق على وبقيت اعاين بالرقراق

الخلانى انين وسايل الدمع دفاق

حنتوت الحنيطره وعجورا شايل ارواق

يحمد ليك يا (أبو أواب) إنت و (أبو منتصر) إنكم أحييتوا المجادعة دي، وضخيتوا دماء الحياة في شرايينها، في ظل تطنيش الجميع بمن فيهم صاحبها الأصلي (ود فاطنة بت حامد) والزول الرئيسي المستهدف بيها (ود الخالة رقية)،،،،

فلكما كل شكر وتقدير،،،

أما مربوعك هذا فهو غاية في الروعة، وهو أفضل من مربوع الكميلي بمراحل، وإن كان يعاني من اضطراب الميزان العروضي واختلال الموسيقى الشعرية، كما أن هناك خللاً في المعني، بإقحام عبارة (وبقيت أعاين بالرقراق)، ولكن قافيته جيدة جداً، وفيه تأصيل لبعض معالم العريجاء مثل الدبل و الحنيطرة،،،

ولو سمح الأخ محمد (أبو أواب) أن أحاول استعدال مربوعه هذا حتى يستقيم وزناً وإيقاعاً موسيقياً:ــ

مـن تالا الدبُـل شلعـن عليْ برَّاق
وزاد الشوق عليْ،تاوقت بالرقراق
الخلاني أكب سيـل الدمـوع دفـاق
حنتوت الحنيطـرة البراعمـو دقاق

عدد المساهمات : 226 تاريخ التسجيل : 27/10/2010

تشكر اسماعيل على التعديل

ما دام حدباي كب الزوغة، ود عمو مجدي يعيش حالة البيات الشتوي، وعمر البشير وقف حمار شيخو في العقبة، وحوى النبي ما قادر على إبراهيم ود الهادي، نقوم نخت ليك المربوع التاني الكنا داسنو منكم، والسبب في إخراج هذا المربوع تصدي الرائعان الكمبيلي وود نور الله للرد على المربوع الأول.

هاكم الصاروخ ده:ــ

حدَب الحلة خرَّف، وخدَّر الباجـور
وفاحتْ ريحتو صندل وزعفران وبخور
الخلَّى الدمـوع من عيني جارية بحور
بُرّيبـاً رتَعْ بين (ود عدول) و(الخور)

عدد المساهمات : 13 تاريخ التسجيل : 04/06/2008

محمد نورالله كتب:: اخى حدباى شاعر كبير بيكون العمل ماخد زمنو

المربوع ساهل عند حدباى

اذكر مره فى قناة النيل الازرق

قال مربوع طويل اذكر منو

نحن لادايرن سلطة لاثروة نحن دايرين نروى

كانت فى ذلك الوقت القرية تعانى من مياه الشرب

لكن يالكمبيلى محاولتك جميلة

وانا ودامى رقية كماظهر بستعين بابراهيم ودالجلال

شكرا أخي محمد نور الله . . وهاك يا حبيب :

من تالا الصعيد إتلامعن بـــــــــراق
وعاودني الحنين وإهتاجت الأشواق
الخلاني أنوح وأزرف دمع دفــــــــاق
قتيم ابكرمت الفوقو البهم ساساق

جدع يا حدبدب

عدد المساهمات : 226 تاريخ التسجيل : 27/10/2010

روعه ياولد ياحدباى شعر جميل

الم اقل لكم حدباى المربوع عندو ساهل ظروف العمل بس

كدى ابكرمت دى فى زول بعرف مكانو

Admin عدد المساهمات : 302 تاريخ التسجيل : 30/12/2007

قولوا بسم الله جيناكم

الليله الصباح بلد التمور ممطور
زكرني الفريق بين البريق والخور
الخلاني في البلد البعيد مهجور
رضوة جدية الريل الماتاوقت من سور

محمد نورالله كتب:: روعه ياولد ياحدباى شعر جميل

الم اقل لكم حدباى المربوع عندو ساهل ظروف العمل بس

كدى ابكرمت دى فى زول بعرف مكانو

يا زول هوي أرعى بي قيدك،،،،

نحن ما بنعرف مكان (أب كرمت) براه، نحن بنعرف مكان اللقدة كلهن: (أب كرمت)، و(أبو هجيليج)، و(حريقة)، و(كبد اللتيم)، و (أم ألبل)، و (الليدين)، و(أبو دهيسير)!!

وكان قلت السوادر (العوالي)، نحن بنعرف مكان (بامبيدو)، و(النويلة)، و(الخيران)، و(أب راشد)، و(أب زليق)، و(مقعور)، و(شدير ود الجيلي)، والقائمة لا تزال طويلة!!

محمد حسن حدباي كتب:: من تالا الصعيد إتلامعن بـــــــــراق
وعاودني الحنين وإهتاجت الأشواق
الخلاني أنوح وأزرف دمع دفــــــــاق
قتيم ابكرمت الفوقو البهم ساساق

روعة يا حدباي، وأثبت للجميع إنك فعلاً شاعر مطبوع، وماك بتاع حلمنتيش وبس، وإنما قدحك واسع، وبحرك لا ساحل له، وبعد ده كراعك اتجرت وتاني ما فيك ليك طريقة فرفرة، يعني لازم تكمل المشوار للنهاية،، وهاك القنبلة الجديدة دي:ــ

تعول العينة فوق وادينا دودن وصبَّن
وعيش كبد اللتيـم قالولنا شرَّى ولبَّن
الخلاني أساهـر الليـل حزيـن ومغبـَّن
تقـيـرات المعـيـز المـن شـرابن غبَّـن

نحن قبيل شن قلنا؟؟؟ قلنا الطير بياكلنا

حدباي رمى ليه مربوع واحد من النميم وكب الزوغة، وشرد شردة لامن دربه حيَّر القناص !!!

والجماعة التانيين ناس ود نور الله والكمبيلي ناموا على الخط!!

أما مجدي محمد حمد فحدث عنه ولا حرج،،،

وود عنتر وخالد الجاك كلو كلو ما عتبوا الحتة دي !!

شمَخ شدر الهوير، في الحلة فكَّ نسيمـو
وفريق ناس ود اللعيسر قالوا فرهَد نيمو
الخلَّى قليبـي ولهـان بي غزالـو وريمـــو
فـوسـيـب كبـد اللتـيـم اللتـردم هضليمــو

بسم الله الرحمن الرحيم

ما قلنا ليكم المجادعة دي أخيراً حتصفى علينا نحن برانا (جابلو إنكتامة وحرَّه، نحن جرارقو يا ساتر على البي برَّة)!!!

وآهو ود خالتي رقية كبَّ الزوغة، وطلق المنتدى طلاق التلاتة، وكان لي ناس الكمبيلي وود نور الله فكل واحد منهم رمى ليه (بيضة ديك) وقال يا فكيك!!

أما مجدي ود أمْحُمّد حمد... أحيَّا وأحيَّا، لامن أعضِِّي إيديا... ده بس أطلق الشرارة الأولى، وأدانا غبشة كرعيهو!!
العجيب إنو ألف ليه مربوع نميم في بوست الترحيب ببخيت إبراهيم الهادي، نصه كالآتي:ــ

اقتباس :

ابو عمران مو مشحود على المنتدى واعضاهو
كان فات كان قنع نحنا البنجرى وراهو...
الفى الغرب خلو بعيييييد وربنا يرعاهو..
كعب الزول يسجل ويصد لى قفاهو....

شدر الخور عِلا،وعسَّف عبير نسَّامو
والمسكيت كجـر... قفَّـل ورا وقدامـــو
مكلــوف (جرجير) المعاصي لجامـــو
حليـل زمنـو البلاقينـا، وحليـل أيامــو

أخيراً الحكاية رست على عملاق فريق قدام ده براهو، أو عملاق الركن الشمالي الشرقي (فريق الطابونة والطاحونة)...

نحـن أولاد فريقـاً جـاور الطـابـونـة
عمدتنا (الرباط)، و(أب سلكة) ياهو أبونا
حلقات النميم شاعرنا ديمــــة زبونـا
وإن غرزت، قسَـمْ بي شعرو تبقى لبونـة

الرباط أو الرباط العالي: هو أخونا حاج عبد الله ود البشير، وقد أطلق عليه هذا اللقب الخال عمر ود شقلي (عليه رحمة الله) حين وجده في حلقة المديح واقفاً مثل الأسد الهصور وقد تساقط كافة الدراويش من حوله، فقال كلمته المشهورة: (ده مالو واقف براهو ما وقع، ده الرباط العالي الما بتطلعوا موية وللا شنو؟؟!)
أب سلكة: هو عمنا عبد الجليل ود علي ود المحينة (عليه رحمة الله).

دي شكلها كدة بقت مجادعة بين إسماعيل البشير وإسماعيل البشير، أو ما يسمى بمسرح الرجل الواحد!!

ود خالتي رقية رجع خلف، وانفزر فزرة كعبة كلو كلو، ومما لقى الحكاية هنا مسخنة والكوع حامي، قام فك البيرق، وجرا اتضارى ليهو ورا حيطة اسمها (تاتيبا)!!

أما ود فاطنة بت حامد، أب عيناً حمرة وشرارة، فقد اكتفى بإطلاق الشرارة، ومن ديك وعيك، وباقي الجماعة مبلطين في الخط!!

من جيهــة البلـد لاح لي بريقـاً رفَّ
عاودني الحنين شوق الحبايب هفَّ
الخلى قليبي ولهـان والدمع ما جفَّ
بُرّيبـاً قـطـَـــع وادي النويلـة وقفَّـى

عدد المساهمات : 226 تاريخ التسجيل : 27/10/2010

الاخ العزيز الشاعر الكبير اسماعيل البشير

ودنورالله واصحابوا ماعندهم مقدره كبيره فى نظم الشعر انما محاولات وان كانت خجوله ولكن من باب انعاش المسرح

الشعرى فى المنتدى لاخراج الجميل المفيد

ولكن ود امى رقيه بت عبدالله

حدباى دا سيل الوادى المنحدر المابنقدر فى الشعر لكن اخى حدباى رجل يكافح فى الحياة فى السودان مابين التجارة

والزراعه لاوقت له وذلك بعد ان اتصلت به فقال لى ذلك

كسره

وحدباى كما قال بعض رجال العريجا اصلوا الله ماخلق ليه خلف اى لايرجع خلف قدام بس

ولكم جميعا الود الحب والصفاء ابناء العريجا الاوفياء

ولك الود الشاعر الكبير اسماعيل وانت تنعش المسرح الشعرى العرجاوي بكل جميل

الله يجبر خاطرك يا ود نور الله زي ما جبرت خاطرنا بعبارات الثناء والتقريظ التي قلدت بها جيدنا، وحقيقة نحن عايزين نحرر السوق بعبارات التحدي هذه، ونستفز الجماعة عشان يتلبوا في الساحة متل (القطابي أب صلعة)،،،

وتشكر ياخي على إخلاصك لصديقك (محمد حسن حدباي) ذلك السيل المنحدر، الما بنقدر... مرة قال لي واحدة زميلتو في جامعة الفرع حاولت تسخر منو: (مالي قالوا ليك أنا حبل عاشميق، و للا طينة لاصقة في قعر كوريق ؟؟!!)

عدد المساهمات : 226 تاريخ التسجيل : 27/10/2010

اسماعيل البشير حتى لاتصبح هذه المجادعه بين اسماعيل واسماعيل أو ما يسمى بمسرح الرجل الواحد!!

نديك المحاوله دى ولك حق فى التصحيح والتعديل

نحن اولاد فريقا جاور المدرسه والشفخانه
تايتنا الفكى وجارنا جرجير بحنان ضمانا
حلقات الذكر والفقه تايتنا ياهو مكانا
وان جانا المحل قسم مطمورتو تب مارقانا

تايتنا الفكى هو الفكى الذين على ودارباب وجرجير معروف للجميع

المحاوله الثانيه

الليله من جيهة البلد البراق تسوى شف
عاودنى الحنين للبقر والضان والحليب والعف
الخلى قليبى رهيف والدمع من عينى نازل تف
صوت فرطاق قطيع الضان المن الهواير لفى

نرجو المعزرة لهذا العك