مجادعه شعريه بين اسماعيل البشير وحدباى

والله كلامك جميل يا ود نور الله، وكلك حكم، يا منبع الذوق والفهم...

بالمناسبة بدر الكدك حالياً مقيم بالمملكة السعودية، وفي إحدى أطهر بقاع الدنيا على الإطلاق، ألا هي المدينة النبوية، على منورها أفضل الصلاة وأتم التسليم، وقد تواصلنا أنا وهو عبر علبة الدردشة بهذا المنتدى، والرجل بفضل الله قد جاء إلى المملكة بعقد عمل مجزئ، وهو مستقر في عمله وسكنه، ولله الحمد والمنة، ولكن يبدو لي أنه لا يجيد نظم مرابيع النميم ومسادير الدوباي، ولكنه بارع في نوع آخر من الشعر، هو الشعر الحضري الحداثي الرمزي، بالدارجية السودانية الحضرية، أو ما يسمونه بالشعر الغنائي!!!

أما حدباي فقد قبلنا عذره، وإن كنا لا نزال نطمع في تواصله معنا، لاسيما وهو يعمل أصلاً في صناعة البهجة والمرح وتضميخ الأجواء بعطر الفكاهة والمسرة!!!

أما محمد عبد الملك فهو مشروع شاعر مصقع، ولكن يبدو أنه هو الشاعر الوحيد في أسرة جدنا (نور الله ود المحينة) وتحضرني في ذلك طرفة ظريفة لعمه (عبد المطلب محمد نور الله) سأحاول أن أكتبها في بوست (قفشات عريجاوية ضاحكة) إن شاء الله تعالى...

أما شقيقي عمر البشير (أبو الماجدة) فهو قد تطور في الآونة الأخيرة بشكل مذهل وأصبح شاعراً لا يشق له غبار في مضمار مرابيع النميم ومسادير الدوباي... وهو - بفضل الله تعالى - يتواصل معنا حالياً في هذا المنتدى عبر ابنه الوحيد محمد عمر...

وصلتني هذه المربوعة الرائعة من شقيقي عمر البشير، من القضارف، عبر رسالة بالموبايل (SMS):ـــ

بعد هجعوا الخلوق لاح ليْ بريقاً بان
وهيَّـج شوقي لي بلداً ترابـو حنـان
الخلاني مدهوشاً بقلِّب في الفِكِر ألوان
جَدْياً بِرْعَى بالقليـز وغابْـةَ البـان

فنظمت هذا الرد الرائع عليها وأرسلته إلى عمر بذات الطريقة:ـــ

طريت حومَـة العشيَّة، ولَمَّـة الحِبَّان
ومخزون المَحنَّة، الفوق وجوهُـم بان
الخلَّى عيوني تذرف،والقليـب تعبـان
غزالاً ضَارْبَ أبودهيسير وغابْـةَ البان

مدالخوف خيوطو هشم رويحتي اللانت
وانقطع المطر بعد البلاد اذدانت
الخلاني اتبسم بعد الارض ماعانت
برقا شلع بين العريجا وبانت

mohammedmlik كتب:: مدالخوف خيوطو هشم رويحتي اللانت
وانقطع المطر بعد البلاد اذدانت
الخلاني اتبسم بعد الارض ماعانت
برقا شلع بين العريجا وبانت

هييييييييييييييييييييييييييييييييييع أبشر يا ود عبد الملك، وهاك المربوعة دي رداً على مربوعتك الرائعة:ــ

نوارة الفريـق اللي العشير ما خانت
خيولا مِشَنْكِتاتْ، وأسودا يوت تتْقانَتْ
سِت عِـزَّاً قديـم لا ادَّنَعَـتْ، لاهانتْ
منسَّلة خلطة بين أهل العريجا وبانَتْ

ابشر بالخير
cheers

لون الشب فوق السحابه مبرقع
راعيها زي اليانكي ديمه مدرع
الخلاني طول الليل سهر اتلوع
الزمهريره الوسط النجيمات ارتع

يا أخوانا ود الكدك ده قولولو عوووووووووووك... الراجل ده مش خلاص استقر في السعودية، والأحوال بقت آخر حلاوة... دحين تاني البمنعوا شنو ما يداقش معانا في الساحة الشعرية دي ؟؟!!

وهاكم دي واحدة جديدة فوق جَدْي النالة وحدَب بامبيدو:ـــ

فـرع المحلَـب التيرابـو عاجِـب سيدو
وا مـرَض القلـوب الابْتلـتْ بي ريـدو
الخلاني ذاهِـل، وطرفـي جافِـي غَميدو
جَدْياً بِرْعَى (بالنَّالـة) وحَـدَب (بامْبِيدو)

جزاك الله خيرا وتقبل مروري

عبدالرحمن قدالة كتب:: جزاك الله خيرا وتقبل مروري

سـرَّ البـال مرورك يا ولد قدَّالـة
يا سيد الجنيبة الفي المحاص قدَّالة
درَّاجـة المكـارم إنت ياك بدَّالـه
يا أب قلباً صميم زي كفَّة السُّندالة

بالمناسبة دي
نرجوا ان تالف لنا شعر عن قدالة

سلام ياملوك القوافي
هاكم الجدعه دي علي خلفيه العدوان علي هجليج

نحنا اهل الكوريك والجرايه والجنكابه
اهل العزه الفي الباجور انزرع تيرابه
عشان ويقود عشاء الضيفان بنحرق غابه
وعدونا نسكو بالعكاز يمين لادوشكا لادبابه

mohammedmlik كتب:: سلام ياملوك القوافي
هاكم الجدعه دي علي خلفيه العدوان علي هجليج

نحنا اهل الكوريك والجرايه والجنكابه
اهل العزه الفي الباجور انزرع تيرابه
عشان ويقود عشاء الضيفان بنحرق غابه
وعدونا نسكو بالعكاز يمين لادوشكا لادبابه

هيييييييييييييييييييييييع... أبشر يا ود عبد الملك...
بصراحة إنت عوَّضت غياب المعرِّد الأكبر والمعرِّد الأصغر!!
فأنت المغرِّد السجَّاع، الذي فاق ود الشوبلي وود نجَّاع!!

نحن تعولنا بتصُبْ في الخريف والصيف
ونحن بحرنا هادر، وديمـة كاسر القيف
نحـن أهـل الطبـايق والدَّرق والسيف
بنَحَرِق عنقريبنا عشـان نعشِّي الضيف
*****************

نحن أهل الملـود والتِّقْـدة والسلوكـة
نحن أهـل المُراح والحَرَكة والدَّبُّوكـة
بتعرفينا يا أم درعة المهابرة شروكـه
يوم دهجي أم سنابك،والرماح مشبوكة
*****************

المُراح: هو القطيع من الأغنام.
الحركة: القطيع من الإبل الذي يزيد على مائة رأس.
الدبوكة: القطيع من الإبل الذي يصل إلى ألف رأس.
أم سنابك: الخيل.

موضوع: الرد الخميس 03 مايو 2012, 5:51 pm

الأخ الغالي أسماعيل معليش داير أفهم المقصود ب(بنحرق عنفريبنا عشان نعشي الضيف) الحقيقة زي ما إنت عارف أنا غير ضليع في هذا النوع من الشعر لأسباب كثيرة تعرفها جيدا . والغريبة إنني أعشقه وأتذوقه إذا فهمته. علي كل حال إذا فهمت المقصود صح فأنا إعتقد الزول البيمتلك معينات العزومة للضيوف لازم يكون عندو حطب.

عبدالله بدوي المحسي كتب:: الأخ الغالي أسماعيل معليش داير أفهم المقصود ب(بنحرق عنفريبنا عشان نعشي الضيف) الحقيقة زي ما إنت عارف أنا غير ضليع في هذا النوع من الشعر لأسباب كثيرة تعرفها جيدا . والغريبة إنني أعشقه وأتذوقه إذا فهمته. علي كل حال إذا فهمت المقصود صح فأنا إعتقد الزول البيمتلك معينات العزومة للضيوف لازم يكون عندو حطب.

كلامك صحيح يا أبو مصعب، فإنه من ضرورات إكرام الضيف توفر حطب الوقود، وقديماً كانت العرب إذا وصفت أحداً بالكرم قالت عنه أنه (كثير الرماد)...

وقصة حرق العنقريب هي قصة منسوبة لأحد أهلنا الكواهلة، وهو رجل فقير ليس لديه إلا عنزة واحدة (منيحة) يحتلبها لإطعام أطفاله الصغار، وذات ليلة مطيرة نزل عليه ضيوف فبادر بذبح تلك العنزة الوحيدة لضيوفه، ثم بحث هو وزوجته عن وقود لإنضاج الطعام فلم يجدوا وقوداً جافاً حيث بللت مياه الأمطار كل أنواع الوقود المتاحة، فما كان من عمنا الكاهلي إلا أن فكك عنقريبه (المروق والوسائد والأرجل) واتخذوا منه وقوداً طبخوا به الطعام لعشاء الضيوف!!!

ياناس سلام حودو اقيفوا بعيد
جيناكم بالتقيل والليلة يومكم عيد
الشاعر الهمام شايفو باقى السيد
ابومسلم تمام تستاهل التمجيد

الخيـر ديمـة فـالك... يا صبـاح الخيـر
أحمـر عين مِدَرْوِش، وماشـي عكس السير
وحدباي من زمـان هـجَّ... وعمـل زُغبير
وبدر الديـن تقـول راكبلـو جنحيـن طير
********************

نقول البركـة في ود عبد الملك ود فاطنـة
فرتاق حافِـل العـوق.. أب دَناقْـراً راطْنة
عريس ست البنات الفي أم ضريوة مواطنة
ولداًّ عمـرو لا جاط الحروف ... لا جاطنا

Ismail كتب:

أبوقدامة كتب:: ياناس سلام حودو اقيفوا بعيد
جيناكم بالتقيل والليلة يومكم عيد
الشاعر الهمام شايفو باقى السيد
ابومسلم تمام تستاهل التمجيد

الخيـر ديمـة فالك... يا صباح الخيـر
أحمر عين مدروش وماشي عكس السير
وحدباي من زمان هـجَّ، وعمـل زغبير
وبدر الدين تقـول راكبلو جنحين طيـر

تسلمو يا شباب علي المجادعات الجميلة

إسماعيل البشير قال:ـ

يا العرجـا البشـايرك بابا ما بتقفَّـل
وطاتك ديمـة تَرْيانة، وضُروعِك حُفَّل
فيكي الرُّخْـرُخ المِن قام حَشيم ومَنَفَّل
وظبي العُنَّس التِّبْـع الرَّوايـا وسَفَّـل
*****************

فرد عليه شقيقه عمر البشير قائلاً:ـ

يا العرجا البشايرك ديمـة هالَّة علينا
هَطَّـالك بصُبْ،أصبـح ملان وادينـا
فيكي الرخـرخ المن قام صغير ماذينا
بنطـرَّاك دوام.. والله تب ما نسينـا
*****************

تقول لي (بدر الكدك) و(حدباي تاتيبا) و(أحمر عين)، ومن لفَّ لفَّهم من المعرِّدين ؟؟!!

محمد نورالله كتب:: روعه ياولد ياحدباى شعر جميل

الم اقل لكم حدباى المربوع عندو ساهل ظروف العمل بس

كدى ابكرمت دى فى زول بعرف مكانو

الأخ الشقيق عمر البشير جاري هذا المربوع من النميم أو باراهو كما يقول أهلنا في البطانة:ــ

إسماعيل البشير قال:

يا عريجتنا يوت واديـك مخـدِّر زرعو
شدرك في الهوير شايل الثمار في فرعو
وابل الخير عليك باهِل، محفَّـل ضرعو
فارسك في أم عجاج هز وقدل بي درعو

فرد عليه شقيقه عمر البشير بقوله:ـــ

يا عريجتنا العليك رابطنا الإلـه بمصاير
شدرك في الهـوير دايمـاً مخدِّر، وناير
فارسك في الملمـات، يوم كريهتك غاير
أكَّان ما القيـود جيتـك مجنِّـح طايـر

في ظل الغياب الدائم للمعرِّد الأكبر (حدباي) والهروب المتعمد للمعرِّد الأصغر (بدر كدك)، والاحتجاب المؤقت للقمر المنير الذي كان يضيئ سماوات هذا المربد، (محمد عبد الملك)، إليكم هذا المربوع الجديد من النميم وهو فوق قرية العريجاء الحبيبة:ـــ

كم طيِّعتِ صايل، واندفـن في مَقْـرِك
وفي العركة أم دموم دايماً بتلِّب صقرِك
توب العِـزَّة كاسيك، في غناكي وفقرِك
أولادك تلوب، ما بخلـوا خاتي يحقرِك
*****************

يا زينة القري انا يوت بطراكي
صوتكك عالي نضمك حالي عطرك زاكي
متحكره في القليب خمجانه جاهله ازاكي
شايلك محنَّه كضب البقول جافاكِ
مشكوره في العربان خيرك وفير متّاكِ
يرعاك الاله محنه ماتغشاك

badr kadak كتب:: يا زينة القري انا يوت بطراكي
صوتكك عالي نضمك حالي عطرك زاكي
متحكره في القليب خمجانه جاهله ازاكي
شايلك محنَّه كضب البقول جافاكِ
مشكوره في العربان خيرك وفير متّاكِ
يرعاك الاله محنه ماتغشاك

هيييييييييييييييييييييييييييع .... هلا ببدر الدين الكدك، وروائع ناس الكدك، وإشراقات الكدكاب، أهل الحربة والكوكاب...

وهاك دي واحدة قديمة فوق العريجاء كانت عاجبة أبوك علي ود الكدك (الله يرحمه):ـــ

عريجاة رحمـة ما تضوقي الهـوان والذلـة
بنيتي الثانـوي وقيَّمتـي بيهــو الحلــة
شبكتك مـدَّدوهـا... وتاني مافي تـرلَّــة
وبيارتك تســوق بابـورا غير منَفِلَّـــة
سحايب الخير تصب، والرحمـة خاتية القلة
وجاكي المركـز الصحِّي البـداوي العلــة

دي واحدة جديدة فوق شدر الهوير وظلاله الوارفة ونسائمه العليلة وأنفاسه العاطرة وأجوائه الماطرة، فهل من مجادعٍ يستطيع أن (يفتلها) أو (يباريها)؟؟!!

يا شـدَر الهوير الفاح عبير كافـورك
نسايمك منعِشة، وللحَجْرة مليان خورك
حليل زمناً قبيـل، يوم كنا يوت بنزوك
نخيِّم في الحِمَى ونسمع نشيد عُصفورك

ودي واحدة تانية بمثابة مجاراة ليها، وأنا طبعاً باريتها ما فتلتها، لأن الفتلة تعني الالتزام بنفس القافية كما يقول أساطين شعراء الدوباي...

طبعاً أنا من زمان كنت خايف من حكاية مسرح الرجل الواحد دي...

يا شـدَر الهوير يا الديمة ضُلَّك سايق
علقت روحي فيك، والدمعة فوق المايق
مفتون بالجَّـدِي الضَّارِبْ خمايلك فايق
وصابِر منو فوق حَرْبة، وتمانية طَبايق

ياشدر الهوير القلب هايم بيك
موجك سما وفرهد شدر وادييك
والنسام فتح عطر الرياحين فيك
ننساك كيف ونحننا يوت نبكيك[center]